Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

Zomi International Concert Makaipi tawh Holimna (Interview)

U Philip Mawng tawh ZOMI IC vai holimna – Part 1.

(Theme: Late - 96:2)

A masa in hibang hunhoih hong pia ih biak Pasian tung leh a hun manpha uh hong hawm U Phillip Maung leh Lia Zam Sian Nem (Nempi) tungah Zo Sunni Media min tawh lungdamna lianpi ih ko hi. U Phillip Maung penZOMI IC Founder hi in, tua kawm mahin Hornbill Sepkhiatna zong amah mahin hong pankhia hi. Tua banah Malaysia ah Zomi ansaithum nei hi (Taungzalat -2, Ching Taungtaan – 1). A minam Zomi a khual leh a it mahmah khat hi in, ama panpihna tawh Zomi tampi Malaysia gam lungmuang takin hong tung thei uh hi. Tulaitak a innkuanpihnu Nuampi tawh tapa khat nei in, Malaysia ah om uh hi.

Holimna kipan ta ni! (ZS - Zo Sunni, PL – Phillip Mawng, LN - Lia Nempi)

ZS: ZOMI IC pen bang ngimna tawh hong pan khia na hiam?

PM: ZOMI IC pen tukum a thumveina hi ta hi. ZOMI IC cih ciangin  Zomi International Concert cihna hi. Hih tawh kisai ka bulphuh leh ka ngimna teng bel gen ngei khin ingh. Kei ngimna bulpi a hileh ih Zomi lasiam tengin a siamna teng uh suakta takin mipite maiah lak uh henla, mipite tawh gualnuam takin lam khawm lasa khawm ding a deih ka hihi. ZOMI IC hun sungah hong kihel peuhmah a neupen pan a lianpen dongin  kuamah deidan om lo ding a, kipibawl tuam kizahtaak tuam cih bang om lo in liangko kikim in suakta takin nui khawm nuam khawm leh a deih ka hihi.

ZS: Zomite lungnop suahtaak ni  dan khat suak in thupi sa ingh.

PM: A tom in genkik lehang ZOMI IC kibawl ni pen Zomi hong kihel thei khempeuh a dingin lungnop suahtaak ni a hihi. Hih hun sungah a zalian a zaneu cih bang deidanna leh khentuamna cih peuhmah om lo ding hi. ZOMI IC Founder ka hihna tawh kizuiin ZOMI IC pen Malaysia bek hi lo Zomite omna leitung mun tuamtuam leh Zogam sunga khuaneu pen naleng-ah zong a vaihawm nuam a om naak leh phalna ka pia a,  ken mapanpih theih zah in ka panpih ding hi. Tukum in Malaysia gamah Zomi kipawlna khat ahi ZRC in June 12 ni in hong bawl ding uh hi. Tua banah tuhun ciangin gam tuamtuamah ih Zomi lasiamte zong ih mipih Zomite mah in na sam ta uh hi. Hibanga ih Zomi lasiamte ih laptoh pen ken tha ka ngah mahmah hi.

ZS: Hih thu pen a  lungdam huai thu hi mawk mah ei. Nang cih takin ih Zomi lasiamte pen tuhun ciangin Zomite omna gam tuamtuamte ah kisam ziahziah ta hi. Khantohna nam khat mah hi takpi hi.

U Philip Mawng tawh Hornbill Sepkhiatna vai holimna – Part 2.
(Theme: Efesa – 4:2)

ZS: Tua leh tulaitak a na buaipih Hornbill Sepkhiatna cih pen bangci dan hi a, na kipat zawh a sawt khin ta hia? A thu a kicingin nong gen thei dia?

PM: Hornbill Sepkhiatna ih cihpen Zomite aa dingin ih Insuarance khat ahihi. Hih Hornbill Sepkhiatna pen neihsa lamhsa om hi cia a kipan ka hi masa kei hi. Ih mipih pawlkhat te’n a hih zo dingin zong hong ngaihsun lo kha ding uh hi. Bangmah hi kei zong hong cihsak mah ding uh hi. Ahizongin ih biak Pasian leh ih mipih Zomite ka it ka veina tawh a kipan khia ka hihi. A taktak in cileng hih Insuarance pen kei pat ding hilozaw a, kipawlna golpipi ih neihte pat ding hizaw hi. Ka kipat tungin ka khua Suangpi min tawh kipan ingh. Kum khat a cin khit ciangin Malaysia a om Zomi UN Card nei leh nei lo teng a huam dingin min thak Hornbill Sepkhiatna tawh tukum (2015) in a kipan ka hihi. Tun kha 4 a cing hi ta hi. Member zong 400 val kinei khin in, tulaitak cina luna ka buaipih uh mi 3 om hi. Kha 4 sungin Member sungpan hong nusia khat om khin hi.

ZS: Tua ahileh Hornbill Sepkhiatna sungah hong lut thei ding Zomite bek mah maw, ahikei leh namdangte zong hong lut thei uh maw?

PM: Hornbill Sepkhiatna pen Zomi teng khualna bek tawh a kivaihawm hi in, Zomi lo buang lut thei lo uh hi. Hih nasepna sungah ka taklam khut banga ka zat ahi Lia Nempi in zong tampi hong gen thei ding hi.

LN: U Phillip Maung hong gensa mah bangin Hornbill Sepkhiatna a kipat zawh kha 4 bek pha pan hi. Zomi te pen ih khasum bek tawh kinungta zo lo hi. Natna satna nei lehang ih khasum zah sangin a tamzaw tham a bei hun tam mahmah hi. Tua hun ciangin sum leitawi zongin kivakvaai a, mu kei lehang ih kibawl zo kei hi. Hih munte ah Zomi a huh ding leh a panpih ding pen Hornbill Sepkhiatna a hihi. Tua ahihmanin Hornbill Sepkhiatna ah Zomi khat aa dingin lut huai mahmah hi.

ZS: Malaysia gam a om Zomi UN Card neite’n UNHCR te vaihawmpihna tawh nat leh sat ih tuah ciangin hong huh dingin Tune Insurance cih khat nei uh hi. Hornbill Sepkhiatna pen Tune Insuarance sangin thupi zaw hiam?

PM: Thupizaw thupi lo zaw cihte thutuam ci ni. Ahizongin hih Hornbill Sepkhiatna ah lut lecin haksatna na tuah ciangin Mangpau, Kawlpau, Senpau, Chin pau cihte zat kul lo a, ei Zomite pau zat a hi T-Tedim pau eimau pau tawh thu kigen in kivaihawm hi. Zomi sungah Genvai kipawlna tuamtuam hong om pen thupi ka sa mahmah hi. Zomi te pen luang a kiphaam ngekngekte ih hihna kilang in lungnop khamuan huai ka sa hi. Ken hih Hornbill Sepkhiatna tawh ka sep pen luangphaam hi masa lo in cinat lunat tuak ih Zomi pihte pen Member hong lutna sum uh tawh Policy om bangin a huh ka hihi.

LN: Tua banah Hornbill ah hong lut lecin Insurance te buaipih loh ahi natnagil AIDS, TB, Cancer cihte leh Naupai, Nausia cihte zong a hithei zah in sumlehpaai tawh kipanpih hi. Hih huhna pen Insuarance dang piak loh hamphatna ahihi.  Ei Zomi sung bek ahimah bangin kitheihsiamna leh kihehpihna cihte zong Insuarance dangte sung sangin om zaw ding cihpen theihsa hi.

ZS: Tua leh Lia Nempi aw Hornbill Sepkhiatna sungah bangci dan in kilut thei cihte e nong tel gen thei diam?

LN: Hornbill Sepkhiatna ah Member na lut nop leh Taungzalat ansai ah nisim in kilut thei hi. Taungzalat ansai  cih pen Malaysia a om Zomi khempeuh phialin thei khin ding uh ahihman in a kuama peuh a hunhun hong pai thei uh hi.

1)      Kum khat ai, kum 10 nuaisiah - RM15,

2)      Kum khat ai, kum 10 pan kum 18 kikaal – RM20,

3)      Kum khat ai, kum 18 pan kum 60 kikaal – RM100,

4)      Kum khat ai, kum 60 tungsiah – RM15, cih dan hhi.

Tua banah kumpi zato a lumte sumbei khempeuh Hornbill in huh a, Private zato a lumte pen a Percent (%) in huh hi. U Phillip in a gen zelzel pen hih thu hi “Hornbill Sepkhiatna pen Zomite a ding bek a kivaihawm ahihman in Zomite Insuarance a hihi. Kei zong Zomi ka hihna tawh Hornbill Sepkhiatna ah Member khat ka hihi” ci ngiat hi.

ZS: U Phillip nang Hornbill Sepkhiatna tawh kisai gennop na nei lai hiam?

PM: Gennop bel tampi om lai mah e, ahizongin hih Hornbill Sepkhiatna sungah Member hong lut dingte tel ding ka deih ah “Hornbill Sepkhiatna sungah a thu na theih leh hong lut ken la, a thu na tel ciang bek in  hong lut in” cih thu hi. Ken hih nasepna ka kipat dingin kum khat val bang ka ngaihsut ahihi. Member khat bek a om zongin Hornbill Sepkhiatna pen kikhawl tuan lo ding hi. Malaysia sung bekah hi lo ih Zogam mahmah ah zong Hornbill Sepkhiatna kipat zawh ding pen ka sunmang ahihi.

ZS: Thupi mahmah ei. Nasep thupi khat ih sep naak leh hong gensia hong langpan zong om ding cih pen theisa tiuteu a ih sep ngam veve ding thupi hi. Tua pen pilna leh hangsanna kigawmna hi. Kong dotnop uh honkhat om laiven, hun ih ngah lai dia U Phillip Maung?

PM: Tua bel no thu hi lo dia! Nong dot khempeuh uh ken hong dawng gai ding maw dawng gai lo ding cihte bel thutuam  ci ni! Haha.

U Philip Mawng tawh Khantohna ding vai holimna – Part 3.

ZS: Malaysia Zomi sumbawl a lawhcingte lakah nang zong a kihel zo himawk na hih teh tua tawh kisai hong dong nuam ungh. Bangbang ahizongin leivui pan hiciang dong hong domto ih biak Pasian tungah lungdam mahmah hang mete. Zomite ih khantohna dingin thupi na sak phat deuh a om hiam?

PM: Zomite pen nidang bang nawn lo hihang. Mi sep bang kisem in, mi neek bang kine in, mi phakna tan mah kipha in gam thupite ah zong tampi ki om ta hi. A lungdam huai thu hi mah hi. Kei pen mi hong muhna ah sumbawl khat ka hihman in tua lampan kei muhna tawh kizuiin thu hong gen ding hi ingh. Hong sangkhial kei un! Ih khantohna dingin kisam ka sak thute pen:

1.  A thupi pen in ih biak Pasian muan ding mah thupi pen hi. Tua khit ciangin ih omna peuhah Insurance neih ding thupi ka sa mahmah hi. Bang hang hiam cihleh gam khangto khempeuh in Insuarance na nei kim ciat khin uh hi. Insuarance ih neih ciangin ih lungnuam in ih lungmuang tuam mahmah hi. Insuarance nei lehang Innkuan sung leh ih minam sungah zong kikhangto mahmah ding hi. Zomi te’n Insuarnace kisam hihang.

2. “A hun leh amun tawh kizuiin gamta siam lehang” hoihsa pen ingh. Hih thu ih tel theih loh ciangin Zomite pen ih khantoh ding zah in kikhangto zo lo hi.

3.  Ei Zomite sungah makaite thumang zo kitam nai lo hi. Mi khat hong khangto pian leh midang teng khempeuh bangmah in mu nawn lo phial zah dongin hong kampau in hong gamtaang mawk hi. Thu ih kiman zawh ding thupisa ingh.

4.  Ei Zomite pen Pasian thu um hang ih cih pong hangin um taktak kei lehang kilawm ka sa hi. bang hang hiam cileh cihtakna a nei kitawm ta in, zuauthu bekbek tawh a nungta kitam mahmah ta hi. Ei sungah mahmah ah zong ei leh ei kimuang zo lo mawk ih hihman in midang namdangte in hong muan zawh ding uh hamsa mahmah hi. Hih pen ih khantoh theihlohna khat hi.

5.   Pilna siamna kisin tek teei napi ih siamna leh ih uuk lam kizui lo hi. Gentehna in ‘Halleluia’ cih tawh a hau zote ih muh ciangin ki-eng ahihmanin en zong ‘Halleluia’ ci nuampah ngeingai hi hang. Pilna a nei khanglui khangthakte in ih Zogam ah nasem nuam lo in gamdang bekbek lunggulh uh a, Zogam nusia khengkhang uh hi. A pil a siam teng gamdang tung gai mawk leh kua’n ih Zogam zuun in puah mawk ding hiam? Zuun loh ih Zogam pen khangto ngei lo ding hi.

6. Bangbang ih ci ta zongin gamsung hoihlohna hangin Zomi tampi tak Malaysia tung khin in UN ih lunggulh ciat hi. En hih lai a hiangkhat pan ih nawknawk sangin in munpi a om ih Zomi mipil misiamte in UN munpi mah na nawk in nong na phuut pih zo uleh hoihsa pen ingh. Namdangte zong tua dan mahin na kiphuutpih uh ahihmanin avai uh tampi lem thei pah hi. Kihuh diamdiam zo lehang hoihsa ingh.

Hong sau pian diatduat mawk ei mete hahaha.

ZS: Zaknop lua in a sau lam bang phawk kha kei liang hang ei.Tuni a nong gen thute thupi thei mahmah ei U Phillip Mawng aw. Lai tawh na ciamteh pah ngelhngelh ungh ei. Bangbang hileh khua zong hong zaan pian ta mawk ven, khawl bawl phot lo dia mete.  Lungdam mahmah ei maw.

Ref: ZO SUNNI Media

Posted: Tongsan Media Tanute

  • comments