Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

Pu Lun Za Pau (Chief Engineer) Tawh Holimna

11350658 739590949518217 4937457688508900228 n

Zomi sungah sumbawl sumzonna lampi tuamtuam tawh nasem tampi i om a, ahi zongin Tembawl lam nasepna tawh kitam hetlo kawm kal pan Zogam, Tedim gam huam Pimpih khuami Pu Lun Za Pau, Naulak in leitungbup kim vel a zin kawikawi Tembawpi Pacific International Lines (Pte) ah nasep ngah bek tham loin, (Chief Engineer) dinmun ciang dong hong ngah ahih manin, Zomipihte in theih huai le pahtawi huai khat ahihna hangin Pimpih Khua Page te tawh a Holimna (Interview) a nuai abang in Tongsan Media Group pan kong suah khia kik uh hi. Pu Lun Za Pau pen Sia Thual Khaw Thawng (JAT,Rtd) leh Pi Khup Hen Cing te sung pan piang hi in unau 10 a phakna lak ah, a (3) na ahi hi. Tua banah 2014-2015 kum Tan 10 All-D hong ngah Lia Cing Deih Lun (Khek Khek) ii pianna zuapa zong ahi hi. 

Holimna (Interview) na -ah a theihnop dingin Lun Za Pau pen tom lakna (LZP) ci-in, Pimpih Khua Page pen (PKP) cin i Tom lak hi.

PKP:  A masa in na min leh na za (rank), tua ciang na Company min nong gen thei diam?

LZP:  Aw... Ka min pen Lun Za Pau hi in, Tembaw ka zuihcil pan kipan tunidong ka zuihna ahi, Pacific International Lines (pte) Ltd. ah Chief Engineer rank tawh hi ing.

PKP:  Tulaitak koi ah tenga, ta bangzah nei? Innkuanpih teng i min tawh nong gen thei diam?

LZP: Tulaitak Yangon Yuzana Plaza nung Mingalar Taungnyunt tsp ah ka innkuan un Topa hehpihna tawh teng ung. Kazi Nu Niang Khan Man hi in, tanu 4 leh tapa 1 nei ung.

Ka tate:

1. Cing Deih Lun.
2. Cin Muan Kiim.
3. Hung Sian Sung.
4. Thawng San Cing.
5. Zam Sian Lian Suum.

PKP:  Pilna sinna leh tembaw zuihtheih ding na hanciamzia te tomkim cing hong hawmsawn lecin lunggulh ung ei.

LZP:  Ka neulai Primary sangkah pen tuazahpi in ka gen luatdi ka theikei aa, ahizongin pianna khua Pimpih leh ka Pa Tahan SMS No. 2 ah hong tung ciang, tu-ah kahin tan 5 leh tan 6 pen khua Pimpih ah kah ing. 1977 kumin khuanu khuapate leh hausa upate deihsak leh vaihawm siamna tawh i khua ah Tan 5 Private Sang hong kihong hi. Sia pen Sia Kung Za Mung (Ciimnuai Boarder sang neipa) khat bek kicialzo hi. Amah pen tuahun lai in pawlpi khat (EFCB) hihna, deihsakna bulphuh in hong sem hi a, khatveivei sum zong kipia zolo in aktui peuh kipia hi. Ama ii hong pattah hong deihsakna tawh mi aa dingin bangmah hita keileh hibang ciang a tung thei ka hi hi.

Tan 7 leh 8 pen SMS Dolluang ah kah in, tan 9 leh 10 pen HSH No.2 Tahan ah kah ing. Tan 9 ka kah akipanin ka Nu in Pu Tun Za Dal (Laibung) engineer gen thei zel a hihman in RIT ngah zawh ding ngaihsun in keilam pan hanciam theihzahin ka hanciam hi. Ka pa in tuition zong haksapitak mah in kahsak hi. 1983 kum Tan 10 phi zawhteh result out dong khua Private Sang ah lai tawmvei hilhin, result out zawhteh inn pan zinkhiat akipan hi ing. Tuangoo ah ka ngang Suang Khaw Ngin te kiang ka tung masa a, tuapan in ka Pa Khai, TSKhai in Rangoon hong paipih in Yankin Pu Kham (Kham Kho Thang) ten om in, tuapan Navy sung ka lut hi.

Navy ah line tampitak om in, tualakpan mi deihloh penpen line ka ngah sawnsawn hi. Ahihangin tuabang mun mah pan Topa'n lampi hong honsak in, kum 4 sung Navy Ship Yard ah kasep zawh ciang Dock Service ngah in, ka ut mahmah RIT sangman BE Mechanical (Bachelor of Engineering) te tawh lai ka phikhawm thei hi. Halelujah!.. Topa'n lunggulh mahmahna tawh hamciam in Amah muang taktak peuhleng a lamdangin matutna hong pia veve hi.

Navy sung ka om sungin nasep tamna pen Department hi in, tua mun ah galkap khat hihna tawh Security duty cih omlai in, tua kawmkal mah sang zomto in nitaksang (Engineering) ka kah thuah lai hi. 1988 kum gambup buainapi (National Revolution) hong piantak ciangin sangte kikhak ahih manin MOT phi in, 1990 kumin MOT ka ong a, tembaw zuihtheina dingin Junior Engineer letmat (Certificate) ka na ngah hi.

PKP:  Mailam ah tembaw zuinuamte ading bangci danin lamlak in advice pia nuam na hiam?

LZP:  Tuhun ciang kuamah zong tembaw zuinuam mel zong om sa nawn keng e. Ko lai in tembaw zuihtheina ding pen ol vetlo hi. A pualam pan cih peuhmah om vet lo. Tuhun ciang bel ol lua himai. A uk taktakte adi in a hitheilo a piangtheilo omlo hi. I lunggulhna leh hamciamna tung tawnin Topan thupha hong pia ding aa, lampi kihong ding hi. Ko lai in ei sung ah sum leh paai nei kuamah ki omlo in sum pen 10% amet piakdi zong a omlo hi. Kei bang Pasian hehpihna tawh Pu Hau Suak gamdang pai hong tun teh, deihsakna tak tawh sum hong zangsak thei hikei leh ollo hi.

PKP:  Ei Zomi sungah tembaw zui in Chief Engineer rank a ngah mi bangzah bang pha in na um a leh?

LZP: Ka theihkhialh keileh Ei Zomi sungah Chief Engineer rank tawh tembaw zui pen Pimpih khuami keimah bekmah hipan in ki um ing. Hakha, Lusei te bel a om diam cian keng. Topa hehpihna bekmah tawh hi.

PKP:  Pimpih khua ading na vei mahmah thu 3 nong gen thei dia?

LZP:  Nidang pek pana na kasak mahmah, kavei mahmah pen i khua i mi ih batlohna;

1) Pimpih khuami kawlgam sungah gazetted officer om neilo.

2) Bawlung suihna ah uham ulian te in khatvei zong a khatna first prize kingah ngeilo.
(Hite nih bel 2010 kumin PimpihNet ah maw, at ngeizo ing in, kiphawk lai in um ing.) Tun bel a numbat (2)na bel Topan hong piata a hihman lungdam mahmah hang, Hallelujah!
A nambat (1) na zong Topan a sawtlo in hong piata ding cih lamen hang.

3) A thumna ah, leitung pilna secular lam ahizongin Laisiangtho Theology lamah degree sang ngah, mi theih i om nailoh mahmah zong hi.

PKP:  Zomite ading na vei mahmah thu khat?

LZP:  Zomite i kithutuak theihloh mahmah vei pen ing. Banghang ahitam ci in ngaihsun theizel in, keima mimal muhna ah bel khat leh khat kithupit sakna, ki zahtakna (respect) a omloh man hiding hi, ci in ka ngaihsun hi. Amah bang hituan hiam, a kici nuam vive e. Tua lungsim in hong kithutuak sak theilo hidingin um ing. Zomite kithutuak nang mahmah vei ing.

PKP:  Khangnote na thapiak nopna kammal khat leh nih hong gen sak ve.

LZP:  Khangnote tungah bangmah kahihloh hang keima ii ka nuntakna ah Topan hibangciang ka tun theihna di in hong lamlahna tawm tawh tha pia nuam ing. Amasa pen in pianthak ding thupi pen sa ing. Christian i hih mahbangin Pasian kammal Laisiangtho mah nuntakpih ni. Thuman in citak ni. Lungkia pahpah kei ni. Sia Hau Lian Kham in "Lungkia pahpahte gualzo ngeilo a, a gualzote lungkia ngeilo hi" na ci hi. Na khat peuhpeuh ah thasia pahpah kei ni. Topa muang in, i mailam ding ap in, kalsuan ni.

Nuntakna ah "Ambition" i neih di thupi sa mahmah ing. Khantohna di kal masa hih hi dingin zong um ing. Tua Ambition na neihkei leh, na nuntakna a khantoh loh ding pen 80% bang hiding hi. Khat veivei nuamsa lel or nopsak bang peuh aa om thong lel cihdan hi thei hi. Tuapen "Comfort Zone" kici aa tuapan kalsuan khiat ding thupi mahmah hi.
Ka innkuan, Khua, minam, pawl khantohna ding ken sem / pia nuam ing cih ngaihsutna tawh kalsuan in nasem ni.

PKP:  Na nuntakna ah na letkip thu or na nuntakpih kammal nong gen thei dia?

LZP:  Ka nuntakna ah kei pen lai pillo /hatlo kahih manin Topa muanna bekmah tawh a kalsuanden ka hihmanin "Try and try again and again you will succeed at last" cih pen ka motto hi. Laisiangtho Paunak 3:1-10

PKP:  Hih bangin hun manpha tampi hong piakhia in, kong dot bangbang uh nong dawn kik manin lungdam kipak mahmah ung ei. Topa'n a thupha tawh hong tuam semsem ta hen.

 

Source: Pimpih Khua Page

Edited & Posted: Tongsan Media Group

12003235 739590996184879 6772149641667116545 n

  • comments