Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

Kawlgam Zomite le Sim lam Zogam

Zomi Innkuan Singapore malaakna leh Zomi Language and Literature Society panlaakna in nisim April 13, 2015 in Vaigam Zomite mitnauta Lamka khopi nusia in Kawlgam Zomite lungtang Tedim khopi ah siamsin naupangte Mangkam (English) sinsak dingin Zomi tuailai 21 kikuankhia hi. Tedim leh Kawlgam buppi galkaap pawlte vaihawmna nuai a om ahihna ah imi-isa tamzote omna himahleh Vaigam Zomite lakah Tedim kia gentaklouh Kawlgam sung ava siikkha leh Kawlgam a i Zomi pihte omnate leh khosakziate ava mukha kitam hetlou ding hi. Hiai ziak mahin tampite’n Kawlgam Zomite leh Simlam Zogam apan thute kitheitam lou ahihna toh Tedim khopi a Mangkam sinsak dinga ka kalsuanna ua thiltuahte pansanin Kawlgam a i minam dinmun, Zomite tenna gamte, leh i mi-le-sate nuntakzia ka muhdan hiai thugelh tungtawnin taklat i sawm ding.

Kawlgam Zomite Nuntakzia leh Lungput:

Kawlgam a Zomite'n tulai teknologi zanga khawl leh set tuamtuamte toh nna a sep hang un, i Zo ngeinate, Zo values, leh tangthu tampite kemcing uh a, Vaigam Zomite mah bangin siamna thak leh thil thakte pakta mahle uh van lui leh thil luite manphatdan mangngilh lou in tampi tak ana keemcing lai uh hi. Ipu-ipate’n ana thupingaih mahmah uh zindousiamna tunitan in Kawlgam Zomite’n ana hinpih mahmah lai uh ahihdan Lamka apan Mangkam sinsak dinga kuate'n ka tuak toutou uh hi. Tamu, Kawlpi/Kaleymyo, Tedim le Cikha ka omsung ua ka giahna, ann nekna leh vaak kawikawina lam peuh uah Zomi Youth Association (ZYA) min hiam, ahihkeh mimal in hitaleh, a zindousiamna uh muhtheih leh khoihkhaktheih phial a phawk theih dingin om mawk hi. Ka omna leh hohna lam peuh uah mahni inn a om banga ka kingaihsuttheih ding khop hial un zindousiam uh ka sa hi.

Kawlgam Zomite a vek phial un Khristian himah le uh i khanglui pawi (festival) leh hun poimoh tuamtuamte ana zuih lai uh tampi om a, tuate lakah haici/khaici tuh zoh cianga pawi kibawl, Lawm Ann Nek pawi bang pibawl mahmah lai uh a, kou Mangkam sinsak dinga zinte zong hiai pawi siim in ka va kuan kha uh hi. Hiai pawi siimna hun ah kou kia hilouin tuailai dang hong paite kiangah hiai pawi omzia gencetna inntek lam apan om a, tua khit in kou Lamka lama pan Mangkam sinsak dinga kuante hiai anuai bangin khanglui lakaih in ladawng khat inntekte apan Nu Ngem Khan Man in hon sakkhum hi.

A gam vangla hih tan a khaubang ciah ding,

Lumsuang dawh ding tulta nah phah nuam veng e;

Lumsuang dawh ding tulta nah phah nuam veng e,

Taangni kaat ding lummei in sung nuam veng e!

Ahon sak zoh in hiai lavui omdan hon hilhcian a, kou lak apan mit hul heuhhauh a ana omthei lou bang ka om hial uh hi.

Kawlgam Zomite aneu-alian in lungkimna leh kipahna a neihte uh lahkhiak ding a kidaam hetkei ua, Mangkam sinsakna class ka neihzoh teng bangun naupangte’n, “Lungdam ing ei, Sia. Zing teh kimukiik ni maw,” ci kawm in hong cibai sauhsauh thei zeel uh hi. Hiai banga kipahthu genna pen aneulam (Class III apan Class V kikal) ah uang diak hi!

Hun saulou cik sunga kho tuamtuam leh inn tuamtuam ka phakkhakna uapan Kawlgam Zomite'n siamsinna ngaina leh ngaisang mahmah uh ahihdan muhtheih mai hi; inn ka phakkhakna khempeuh ah, khota neucik a innte leng tel in, limlak kitakte ah graduation limlak lukhu neelkai toh a kilaknate uh omlouhna ka mu kei hi! Pilna leh nekzonna hoihzaw zongin tuailai tampite Kawlgam khopite leh gamdang (foreign) tanpha a kitheihdalh uh a; hiai ziak mah ahi ding e, Tedim khopi sung mahmah ah zong tuailai muh ding tawm ka sa mai. Inn cih apan khat beek in gamdang a siamsin ahihkeh nekzonna nei mah abang ua, Malaysia ngial ah houh min khumluut Zomi milip 30,000 vaal om cih hitel ei!

Kawlgam kivaihawmna pen mipi vaihawmna (democracy) kiciantak ahih nailouh manin Vaigam Zomite'n ngeinadan a i koih khenkhatte Kawlgam Zomite ading in thil lamdang leh theihsiam haksa khat suak thei hi. Etsakna: Mangkam sinsakna neih sungin siamsin naupang Pawl VII apan Pawl X kikalte lak ah 'social' leh 'public opinion' cih kammalte etsakna tawh ka hilhcet dek ciangin theihsiam baih a sa hetkei mawk uh hi! Hiai naupangte mah a hinkhua ua a tup uh (aim in life) ka dot ciangin engineerahihkeh daktor a ci tangpi ua, galkaap/sepaih a ci khat leng ka tuakkha kei hi.

Kawlgam Kumpi (Government) in naupangte siamsinna ah Kawlpau ngen a sinsak atup ahi a, Mangkam (English) pen Vaigam a Hindi subject i neihdan in subject khat in nei lel uh hi. Ei Zokam bel a Kawl Kumpi in siamsinte sin ding deih vetlou hih tuak. Hiaite khawng puaknat a nei mimal bangzahhiamte'n naupangte' Nipi Khawl (summer holiday) sungin Maths, Science, English leh i Zolai sinsakna mun tuamtuam ah pan uh a, lohcing mahmah a theih in om hi. Hiai panlaaknate ziak ahi ngei dinga, naupangte'n Maths, Science leh English a thubulpite (fundamentals) ei Zokam mah in hilhcetna hon pe thei mawk uh hi. Himahleh galkaapte opkhum ahih ziaka a ngaihtuahna uh suakta zou ciahlou ahi diam ka ci a, class a Mangkam a thu i dot ciangin mimala dawnna piak ding pen haksa sa mahmah uh hi. English Grammar sang mah in Spoken English lam ah naupangte'n taksapna lianzaw nei uh hi in muhtheih hi.

Tuabang kawmkaal lakah Vaigam (adiak in Manipur) sangin Kawlgam pen muanna leh bitna lamah ana thovengzaw tham ci le'ng kigenkhial lolou ding hi; Kawlgam ka luut uapan Vaigam kong luutkiik dong uh kaal khat sungin Kawl galkaap khat zong ka muh lam ka theikei hi. Kawlgam sung ah army check post icihte khat leng ka muh lam ka theikei a, ei Manipur sungah bel tua check post-te cimtakhuai khop dingin tam hi.

Minam Itna:

Kawlgam Zomite lakah minam itna leh Zomi mina nna hoih sep utna uang ahihdan ka va ciam kha uh hi. Thupi ka sak mahmah khat, Kawlpi/Kalaymyo ah hilhkhol lou pi a Zomi Youth Association (ZYA) ofis ah ka va luut mawk uleh Minam vaai a zin ka hi uh cih a theih phet un a makaite mobile phone tungtawna hong kisam kual vengvung uh a, minit 15 sungin President leh Secretary cihlouh hong kim thrap uh, kikhopna hon neihpih ngal uh hi. (President leh Secretary bel New York, USA a United Nations khawmpi a va tel ahih ziak ua hong hoh theilou uh ahihdan makai dangte'n hon hilh uh hi). Khentuam neilou a sisan hopna leh panpih ngaite panpih a kipei ahihdan uh ZYA makaite'n genna nei uh a, tua khitin tulel a project lian mahmah aneih uh, Kawlpi khopi sunga Zomi Hall & Stadium khat Kawlgam sum Ks.55,50,00,000 bei a bawlkhiak dinga pan la lellel ahihdan uh zong gen uh hi.

Proposed Zomi Hall & Stadium, Kawlpi/Kalaymyo:

Tulai a Kawlgam Zomite laka gamdang NGO-te toh pangkhawm a minam khantouhna ding vaai nasem hoih mahmahte laka khat a muhtheih Zomi Development Foundation (ZDF) hi ding hi. Hiai pen Tedim khopi pansan a Sia Cin Lam Pau @ Zomi Paul Pau in a makaih Zomi NGO khat hi a, gamdang apan huhna amuhte ama hamphatna dinga azatlouh pen a Zomi pih khenkhatte'n pilsa law khollo uh hih tuak hi! Tulel in ZDF in Tedim, Tonzang leh Cikha township-te (ei lam a sub-division i cih toh kibang) a mun khat ciat ah Tedim Zatopi/Tedim Damdawi Innpi naih phaloute a dingin health center hong uh a, maban ah mun tamzaw ah hon touh sawm lai uh hi. Minam picing hihna dinga ceptehna a kineite laka khat laimal (script/alphabet) ahi a, Zomite'n zong i Zotuallai (Pau Cin Hau script) nei ihihna uah Zomi tuailaite lakah hiai laimalte zatdan sinsakna nna ZDF in Tedim khopi ah tu April kha in ana panta hi. Hiai pen tua i Zolai gelhna dinga kizang Roman/English alphabet-te khekkhe ding cihna hilou-in, ei a icih theih om ahih ngalleh a zatdan beek theih sawm ni, ci a pan la uh ahi hi.

Minam vaai toh kisai a kalsuante Kawlgam Zomite laka pawl/kipawlna (organization) makaite kia in ana aangvan ahihlouhdan theihtheih in om hi. Tedim khopi a ka om sung un lawmte van lei/bawlsak dinga a kuanna khenkhat uah dawr neitute'n sum ana la utlou, cih bang zong om hi. Minam itna ziaka gam hiaitan a hong kalsuan, na kipiakzohna uh thupi lua, ci a sum ana la utlou uh ahi hi. Kawlgam ka om sung ua minam it a ka theih ka tuahkhakte'n a Zomi pihte mahmah uh it uh hi in ka mu a, mahni innlum taisan zena a Zomi pihte uh nopsak zawkna dinga motor sunga giah leng poi salou uh ahihdan ka mit ngei in ka mu hi. Tuabang kawmkal lakah Vaigam Zomite mah bangin Kawlgam Zomite lak mah ah zong Kumpi pompih minte (Government-recognized names) a kiciamteh suk maimai a, tulel a i omdan bangbang a om suk ding a deih pawl zong omlou hituanlou hi.

Kawlgam Zomite khopi poimoh khenkhat:

Kawlpi/Kalaymyo Khopi, Sagiang Division: Kawlpi/Kalaymyo khopi ah milip 3,00,000 bang om dinga tuat hi a, tuate lakah Zomi 1,50,000 vaal pha dinga gintak ahi. Zomi minam hihna ciantak a pomte a lom a tampen i teenkhopna uh Kawlpi/Kalaymyo khopi hi ding hi.

Kawlpi Khuapi a om Kalay University:

Kawlgam Zomite adinga khopi poimoh pen ci leng i genkhial kholkei ding a, hiai khopi pen Zomi Council of Myanmar, Zomi Youth Association of Myanmar, Zomi Christian Literature Society leh Kawlgam sunga Zomite kipawlkhawmna tuamtuamte adinga a phualpi uh leng ahi hi. Hiai khopi ah Zomite tampen ihihna ah ki-inntek mahmah a, Tahan a kicihna veng a Zomite kilomten deuh hi. Khopi sunga lampite lian leh tang thei mahmah a, singkung zong tam hi. Hiai khopi galmuang mahmah ahihna ah zaan sawt hak mahmah hi. Tulel a Kawlgam a khopi khangtou haatpen nga (5) teelkhiatna ah Kawlpi/Kalaymyo zong tel pha hi.

Tedim, Zogam/Chin State: Tedim khopi ah milip 26,000 bang om dinga tuat hi a, Phaipi/Imphal apan kipan Tedim Road icih a tawpna mun ahi. Lampi khat zuul a khopi kiphah ahihna ah a khua dung asaau mahmah hi. A khopi pen veng tuamtuam in kikhen a, tuate Leitawhtan, Leilum, Lawibual, Myoma (Tedim venglai) leh Sakkollam cihte ahi uh hi. Khopi siangthou mahmah cih ding ahi dia, ka omsung un lampi ah nektheih hawng kipai ka muh lam ka thei kha kei hi. Mun sang leh zou mahmah ahihna ah khopi sunga mun khenkhat ah ngeisok pak pou muh ding om zezeuh hi.

Tedim Khuapi:

Tedim khopi leh a kiim naicikcik ah mun etnophuai tam mahmah a, hiai khopi a ka omsung in Zomite khanglui tangthute ahuih a diik kha bang mai in ka kingaihtuah hi. Tedim khopi apan a gamla loua om mun etnophuaite:

Siangsawn Khua: Tedim khopi toh kizom a khua ahi a, hiai mun ah Pau Cin Hau in a phuan biakna zuite amau ginna toh kituaka khua a bawl uh ahi. Mun lungluuthuai mahmah ahi a, Zomite tualsuak biakna zui mi 300 khawngte tenna mun ahihna ah, amau biakna toh kisai kia hilouin Zomi namte inn lamdan (Zo inn) bang zong ettheih dingin om hi.
Lamzaang Khua: Tedim khopi apan khe a tun phak ding khua ahi a, Lamka lama Lamzaang pau icih hong kipatkhiakna khua ahi, ci uh hi. Hiai khua ah 1912 a amau haaltawm teeklei/leiseek (brick) a kibawl Lamzaang Hausapa Kulh (Lamzaang Fort) tuni tan in ettheih dingin omlai a, tua kia hilouin Zomi Salpha Thualzen' inn zong hiai khua mah ah ettheih dingin omlai hi.
Lamzaang Kulh leh Thangmual/Fort White :

I Zomi khangthu a mun-le-mual poimoh mahmah a kigen Ciimnuai, Geeltui, Khawvaiphei, Laitui cihte Tedim khopi apan gamlalou ah om uh a, tua kia hilouin i khanglui tangthu a kigen Thanghou leh Liandou, leh Naantal-te haan zong muh theih in omlai hi.
Thangmual/Fort White: Kawlpi apan Tedim khopi zotna lampi a mun etnophuai mahmah ahi a, February 4, 1889 a British Imperial Army - Upper Burma a Major General George White nuai a Kulh (Fort) kibawlna mun ahi. Hiai Kulh pansan in Zomite'n British Imperial Army i daalna ua a panmun poimoh uh Siallum Kulh kici May 4, 1889 in la zou uh a, tua hun apan British Imperial Army in Zogam pumpi uk suak zou hi. Hiai Thangmual apan in Zomite pawlkhat in meipi ana zap uh ahihdan zong khangthu suutte'n gen uh hi.
Tedim Golf Course: Tedim khopi apan mallam gamla lou ah golf kimawlna mun (golf course) mun nuamtak khat om a, a lungluut khempeuh va kimawl thei zeel uh hi. Hiai golf course sung ah mawng kung bangzahhiam a kivual a pou om a, khangthu suutte'n hiai pen nidanglai a Khuangnung khua hi ding hi, ci uh hi.
Cope Topa tenna inn: Tedim khopi laizang a Cope Memorial Baptist Church huangsung ah Kawlgam Zomite laka Tangthupha pawluuttu J.H. Cope (Cope Topa) tenna in leh ama vanzatte tuni tana ettheih dingin om hi.
Suangsua’ng suangpi: Tedim khopel Teeklui khonuai ah suangpi khat om a, hiai pen i khet ciangin a gin tuam mahmah hi. Khanglui tangthu ah hiai suangpi tungah Zogam sim dinga Meitei Guun tawna hong kuan Meitei Lengpa a din laitak in Zomi Salpha General Za Tual in ana kaaplum kici hi. Tua lai in Zomite'n Tedim kiim a taksing omte a naai pawt theihna dingin saat uh a, khomial nuai ah tua taksing naaite a baan haal ciangun a gaal a Meiteite'n amau dou sawma Zomite meiphual mun tampi a sem zena kisa uh hi ding, ci in a Lengpa uh a sih toh laau in taizaak uh, kici hi. Hiai ziakin Zomite'n meithal tampi leh Meitei be (beans) kineihlawh kici hi.
Lih Diil: Tedim khopi apan tumlam a kilehphakna mun ah Lih Dil om a, Zogam a mihing bawltawm hilou diil lianpen hi ding hi.

Thukhitna:
Tedim khopi zuan dinga Lamka ka nutsiat tan un ka lungsim ah gamdang/foreign hoh ding dan in ka kingaihtuah a, himahleh Tamu ka tun uapan Behiang ka luutkik tan un ei pau, i Zokam kia mah kiza den ahihna a ka cipih-sapihte kiang va hoh ana hi ka hihlam ka theician thakthak hi. Vaigam Zomite'n i min tawpna uah i behmin uh i koih pahpah ziak uh ahi diam, Kawlgam Zomite'n beh ngaina di hon sa pahpah ua, amau leh amau ahong kipulaak ciangun a beh uh leng hong gen zeel uh hi. Tuabang hunte ah behmin lamdang deuh om hiam ci a ka na ngaih ciangin Lamka khopi leh a kiim a i behmin teng kaan uh adang zakbeh ka ve nei hetkei a, unau khat ihihna uh ka va cian semsem hi.

Zomite gam kivaihawmna dan tuamtuam (mipi vaihawmna leh galkaapte vaihawmna) a kikhosa ahihna ah i khanglui tangthu leh khanggui pen kibang mahleh tu ciangin leitung pilna-siamna zonna leh khosakzia ah kilamdanna tam mahmah hi. Vaigam Zomite hihtheih leh sepsiamte Kawlgam Zomite a dinga haksa pi hithei a, tua mah bangin Kawlgam Zomite adinga a baihlam mahmah thil khenkhat Vaigam Zomite a dinga haksa pi zong hithei hi. I tempaina lam leh i tenna gam toh kituaka i septheihte kitheituah a, i haatlouhna lamte ah kihuhtuah dinga Zomi tuailaite i kisak thak uh hun mahmah ta hi. Gam khat vaihawmna nuaia Zomite omkhawm vek ding cih pen a baihlampen hong hi khollou ding ahihna ah, political re-unification kia cih pah sangin emotional re-unification i bawl phot uh poimoh ka sa; tua Mangkam sinsakna hun bang hiai kizopna dinga kalbi manpha hong suah ngei leng ka lamen hi.

Khangthak Zomi tuailaite'n i gam omna uh dinmun paulap in kithazoisak nawnkei ni, Kawlgam leh Vaigam a om Zomite lungtang a kizopna hoihtak toh kalsuan thei hita hang, i pilna-siamnate uh kihawmtuah kawma kalsuankhawm dingin hanciam thak ni. Zomite hihhaatpa Khrist tungtawnin hihtheihlouh neilou ihi (Filipite 4:13), Amah ah i muanna nga peuhle, cih phawk kawmin kisathak ni. Hon daaltu bangmah omlou, i lungsim ngaihtuahna lel ahi ahon daal thei cih thei ni.

By: Nang Muan Sang Lethil, General Secretary of Siamsin Pawlpi, Lamka

Source: Phualva Times

Posted: Tongsan Media Group

  • comments