Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

Zomi in Bang Tan Huam Hiam ?

1382337 421644434608638 453738238 nTu sawng teng email sungah, ‘Zomi in bang ciang huam hiam? Zomi leh Chin a kibang hiam? Zopuan vai,ctp.’ tam sim sim ka sim kha hi. Thu sungte mipil vive ahih manin thu tampi ka theih lawh a manpha ka sa hi. Thu lamdangpi kong gen theih loh hangin kei zong tawm kong kuppih nuam pong hi.

Zomi’ Huam:

Zogam hong sik masa leh Zomite thu akan masa Mikang te Sir Henry Yule (1508), Father Vincentius Sangermano (1783), Col T.H. Lewin (1871), Dr. Francis Buchanan (1835), Bertram S.Carey, H.N. Tuck,ctp. in Zo (Zomi) agen uh ciangin Chin State sung ate bek zong hi loin, Kawlgam, India, leh Bangladesh gamgizul a teeng mualtung mite genna in na zang uh hi. Hih mite ciaptehna mah Kawl mipil pawlkhat leh ei Zomi mipil
pawlkhat in siksanin thu na gen uh hi.

Hih Mikang mipilte hong ciaptehna pen kineuseek thei lo hi. Bang hang hiam cih leh pau leh ham, pu pa ngeina, i taangthu,nuntak khuasak zia, lungsim kuan, mel leh sa cih dongin thu tampi (criteria) en a minam khat a hong koih uh ahi hi. Kizop, kikawmna atawm luat manin a kigamla suah tektek ihi bek a, atung a thute i-et ciangin mikhat, sakhat bel hi lua mahmah hihang. Kawlgam sunga Falam, Haka, Mindat,ctp. te sang nangawn in India a Gangte, Simte, Vaiphei, Thahdo (Kuki) te bang tawh kamphen kullo zahin kinai hihang. Saklam a i sanggam Paite te bel ei lian mah hilel in genvet zong kullo hi.

Kamphen kullo teng bek minam khat hihang cih tawh kisai in ngaihsut huai thu om sa ing. 1975 kumin Evangelist Pumzathang (Dr. Pumza Tombing) Tedim ah gupna thu genin hong pai hi. A thugen cilin Paite kam a agen pen Tedim kam in kiphen tazen hi. I nung ngaihsut ciangin nuihzak huai abat hangin tua hun lai in kikawmna om vet lo ahih manin Tedim gam mi atamzaw in ei pau veve Paite pau pen kithei pha hetlo mawk hi. Tuhun teh bel kikawm kiphakna tamta ahih manin Sia Jamkothang’ tei Laisiangtho bang Paite pau hizaw hiam, Tedim lamte pau hizaw hiam, cih ding phialin om hi. Tua bek tham lohin, tu teekteek mahin zong, Tedim gam sunga izat awkaih tuamtuamte ikiho ciangin
kamphen akul dekdek pawl bang om hi. Tua ahih manin kamphen kullo teng bek minam khat cih pen ngaihsutphat huai kha ding hi.

Ataktak in bel, Zomi in Kawlgam, India, Bangladesh gamgizul a teeng singtang mi teng ahuam ahi hi. I pu i pa te in tua lungsim na nei uh ahih manin ‘Zomi’ nuai ah na kigawm thei uh hi. Amau mun tekah kilawhna tuamtuam a neih uh hangin ‘Zomi’ mah minbul pen hi cih zong mipil, thukante in asaan uh ahi hi. Ahi zongin, hun hong pai toto a Zomi pawlkhat in ‘Zomi’ hong deih nawn lo uh hi. Ei theihpih/ theihpih loh ahang tuamtuam om ding hi. Pu leh pate minphuah sa bang Zomi te min ahi ngiat lo khat tawh kilaih zawzen hi.

Tua ahih manin, tu tadih, Zomi a ut lote Zomi hi uh teh, va cihcih ding zong piang nawn lo hi. E’n ihuam sawm hangin amau ut lo phot ahih teh heh zawlai ding uh hi. Atunga igen minam te lakah Zomi a ut teng bekmah Zomi ihih phot kul ding hi. Sak lam a isanggamte bang nidang sangin Zomi kicih ding utzaw tham uh hi. Tu laitak a Zomi ut lo te cik teh hong utkik ding hiam kithei lo hi. Utkik pak kei le uh kilawm hi. Nikhat ni teh minam min khat nuai ah ikigawmkik diam, ahih keileh, a kikhen paisuak ta mai ding ihiam, cih nangawn kigenthei lo hi. Bangbang hileh, ei lam panin, unau sanggam ihihna, mikhat sakhat i hihna phawk tawntunga tua lungsim tawh amaute ikizoppih ding deihhuai hi.

Zomi leh Chin: 

Zomi leh Chin a kibang hiam cih zong dotna khat ahi hi. Zomi leh Chin kibang lo hi. Zomi pen taangtawn a kipan ei leh ei ikilawhna i minam min hi-a, Chin pen a pualam pan a hong kipia i min’khem’ ahi hi. Mikang ten lai sungah tua tawh hong ciamteh masa mawk uh ahih manin Kawl kumpi leh leitungin tua min tawh hong ciamteh hi-a poi mah mah hi. Khamtung mite kuamah amau leh amau ‘Chin’ a kici khat beek om lo hi. Zogam khuata a piteek khat kiangah.’Bang minam na hiam?’ cileeng ‘Chin’ hing, hong ci peuhmah lo ding hi. ‘Zomi hing, Lai mi hing,’ cih bang khat in hong dawng zaw ding hi.

Thukhat ah Kawlgam sungah Zomi leh Chin i’ huamkhak minamte bel a kibang hi cih theih hi. India lam ah Chin azang kha zenzen pawlkhat a om hangin kitamzat hetlo a buaihuai lo hi. Tuhun in Zomi pawlkhat in nidang a azat uh minam min paai in Chin mi kici tazen uh hi. Lah nuihzak huai, lah khasiat huai hi. Nam tom vai lua mahmah hi. Hun tomkhat sung meet nadingin minam min tawh lei zawzen pen namniam vai lua hi.

Ei mi pawlkhat in Chin a hong kithei sa ahih teh Zomi khawng cihcih kul kei cithei hi. Tua ding hilo in, Kawlgam sung leh leitung bupah Zomi a hong kiciapteh nang hanciam ding hizaw hi. Leitung mun tuamtuam ah zong minam min, gam min, khua min,ctp. a min maanzaw a kitheih teh a kilaihlaih lel mah ahi hi.

Zomite Mapan zia ding:

Tu laitak lianin eilam Zomite, i lawm Chin a kici te sangin mun tam simsim ah ziakai zawdeuh hileeng kilawm hi. Hih pen thu lamdang lua a ngaihsut ding hilo hi. Akua mapeuh in hun a kinei ciat hi-a tu laitak amau hun hikha ding hi. Kum tampi sung ei lamte i madawk khin hi. Amau bang hangin hong makhelh uh hiam cih ikankhiat ding kisam hi. Tua panin kipatphat kul ding hi.

I madawk kik theih nading ilawmte mah bangin minam veina ineih ding kisam hi. Kuamah ngawh tuan ding a om kei a, ahi zongin, ei i madawk lai in akua mapeuh in tu-a ilawmte zahin gam leh minam aa ding i ci veuveu pha kei hi. Mailam ah gam leh minam veina ineih phat mahmah ding kisam hi.

Kisangkhaina leh niamkiatna Pasian kiang pana hong pai ahih manin Pasian mah muanpi in muang ni. Pasian awi in gamta ni. Pasian thupha piak taak dingin om ni. Thu ngen ni. I lawmte in a thungetna uh a ngah ahi hi. I lawm te in eite sangin Pasian thu leh thu khat peuhpeuh ah hang takin ma pang ngamzaw uh hi. (gtn. Haka singlamteh vai). Ei
mite pen a tamzaw kitapkual han pong in vaipite ah hang takin kiding ngam pha lo hi. Hih zong kipuahphat ding kisam hi.

I lawmte zia izuih loh ding khat om hi. Mi deidanna, mi langbawlna, ei angsung bekbek etluatna cihte ineih loh ding thupi hi. I daupai laitak i kilal sak luat leh sauvei lo in kikiam ding hi. Zomi a ci tenten pawlkhat bang pen ilawmte hong bawlna na sa lua mahmah uh ahih manin Chin cih kammal pen aza thei ngiat lo tuam uh ahi hi. Mite in bangbang in hong bawl taleh, Pasian tate ihih manin ei lam pan mawhna imaisak zawh ding thupi hi. I muhdah tuan loh ding thupi hi. Tua bangin Khazih lungsim na nei lehang Pasian eilam hong ngakik dinga hun nuam hong musak kik ding hi.

 

Khazih leh Zomite sungah,

 

Rev. Dr. Do Suan Mung

  • comments