Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

2015 Kawlgam Kiteelpi ah Zomite Kipuah Hunta!

Pu Zo Khai2015 Kawlgam Kiteelna hongnaai hiaihiai, Zomite-in amau' dinmun ki-et, kipuah hunta!

Kumpi' Naseem pan-in Mipi' Naseem Suahtheih Nading Lampi:

Dictatorship cihciang-in "thuneihnaletcipna" hi-a, dictator cihciang-in "thuneihnaleencipmi" cihna ahihi. Leitung buppi-ah thuneihna letcipna lamsang namnih om-a, khatpen ama' deihsak zah-in aminam adeihsakding mi omlo, mulo ahihman-a thuneihna letcipna ahihi. Gentehna-in nungzek-a asi Singapore Gammakaaipipa leh Haile Selassie (Ethiopia akhangtosak Kumpi Solomon' suan) cihtepawl ahihi. Tualo ataangpi thuneihna haipih, amau' sang-a apilzaw, thumuzaw, asiamzaw a-omleh paampaih, nawlkhiin, that, tuading-a a-upmawh a-omleh khaaktan-khol, ahihkeileh ama' ading ui-khawi zawngkhai bang-a khawi, tuabang-a khawi athuak nuamlote that, paampaih cih-tawh thuneihna leencip-hi.

Kawlgam thuneihna aleencip mite-pen Kawl Gaalkaapmaangte hito den-hi. Gen. Ne Win pan-in kipan-in tuni ciangdong ahihi. Amau' thuneihna letcipzia-pen: Kawlgam-pen Mualmi ci-a minvawh minampi tampi-tawh akiphut gam ahihman-in tua minampi tampi' lak-ah Kawlte atampen ahih-tawh kizuui-in Kawlte' thuneihna-in vukcip den ding,

Mualmite peuhmah-in Kawlgam-ah thuneihna lianpen leen ngeilo ding,
Mualmite' thuneihding khaamkholhna-in Mualmite' kithuhualna khenkham ding,
Mualmite khenkhap nading minam kitukalh sakthei Idea tuamtuam zangh ding,
Gaalkaapmaang vaaihawmna sung-ah thumaan agen, mipi' thuneihna agen peuhpeuh langbawl, nawlkhiin, paampaih, pawlkhat khumcip ahihkeileh that-ding,

Hihteng Post-Independence Idea hi-a, BSPP hongkhan ciang-in hihteng aphungvuh baan-ah, Mualmi lakpan ama' minam a-it simsimte nawlkhiinna, ulian simsim, pil asak simsimte-uh Kawl Numei-tawh naakpheh vawhna cihte ciimsan tak-in hongnei hiat-hiat uhhi. 1988 kum-a Kawlgam Mipi Sosaanna Khit ciang-in -

"Khazihmi (Christian., Kharityan) ahihleh DSA luut theiloding,
"Buddhist asuakleh luutsakding,
"Mualmi ahihleh Maj kheng theiloding,

Hihte pen laiphah tawh taangkona aneihloh hangin akiza akithei hi a, aza naailote inzong nana ciamtehpah le uh cin thutheihna behlapna leh kidaalkholhna ahihi.

Hong nihthuahnate kilanghtang mahmah ahihman-in tuabek aki mitsuan laaitak mah-in atung-a minam khenkhapna gaalvan muiibunhpen ahi namkee minvawh pattahna (lahpak dingin, Chin State sung-ate bangpen Gaalkaap Kumpi' mawkbawl 1983 Census-ah minam sukkhap nading a-uutteng namneu code nana-pia gawpmang cbt)-pen naakpi-in ngalhaat mahmah-a, Kawlgam thuneite' cihlohsa-in eileh-ei akingaap, akilang,akipingpavei ding-in akhun-uh giinkhau naakpi-in hong zangg mahmahhi.

Post-independence Idea-pen akip ding-a phungvuhna hunbii kum 60 vaal honghih-tawh kituak-in atung-a minam asusia namneu minvawhna in naakpi in Zomi sung hongvaat phadiak hi. Unau behkhat, sungkhat suak vive kimlaai, Tedim, Dim, Khuano, Siyang, Guite, Zo, Thado cihbang-in code hongpiak-pen "minam sukkhapna" nasia penpen ahihi. Hinapi-in, tua thu eimi mahmah ngiat-in kitheihmawhbawl-in tua-thusia pomkip-a tuamdin nading lampi bekbek saat-in, kizuihsawm dinmun hongtun-hi.

Tua sungah Kumpi naseem ulian honkhat-in atua minam sukkhapna gaalvan-mah pomkip kenkan in, Tiddim Chin cihnengneng mah-tawh minam hongvaat den-hi. Hihbang mite pen Kawlgam thunei adiak in Gaalkaap Kumpite' silate ahihi. Atote' thunsa, atote' naakpheh vawhsa bang-a gamta kampau-uh ahihi. Ataangpi-pen Zomite leh Kawlgam mite-in "Kumpi Naseem (A-so-yah won-thaán)" teng hiphadiak-hi. Tuate bekmah khauhpai zawdeuh-hi. Thuneihna aleencip (atung-a I-gelhsa) Gaalkaap Kumpite' Naseem taktak-mah himawk-uh ahihman-in mipi' na seemlo uhhi.

Gam leh minam vaaihawmna sung-ah Kumpi' Naseem peuhmah Kumpi' sila ahihi. Mipi' naseem - mipi' deihna kumpi-ah apuakluut, agenngam, apulaakngam mite mipi' naseem ahihi. Kumpi' naseem khempeuh kumpi' sila ahih mahbang-in mipi' naseem khempeuh mipi' sila ahihi. Kawlgam a ulian khempeuh (khatlehnih minam' ading avei, aphu a-omteei haang-in) ataangpi in kumpi' sila ahihi. Tua kumpi I-cihpen 1962 kum panin Gaalkaapmaang Ne Win leh anungzuuite ahihi. Thuneihnaleencip Ne Win' silate cihna ahihi. 1988 kum-a kipan-in gaalkaap puan asuah vetlo Gaalkaapmaangte-in hong ukto leuleu a, thuneihnaleencin Gaalkaap Kumpi mah hong hito suak hi.

2010 tak ciangin Gaalkaapmaangte mah makaai-in Union Solidarity and Development Association panin Union Solidarity and Development Party (USDP) min tawh gaalkaap vaaihawm Kawlgam Kiteelna ah ulian tutphah 1154 lakpan 883 hongluah uh a, amakaai Thei Sein-in Kawlgam President hongseem pongmawk phot hi. Thein Sein pen gaalkaapmaang hi-in Ne Win mah bangin "gaalkaap puan asuahpak" gaalkaap mah ahihi. Tuu vun asilh keiivom ahihkeileh Civil puan asilh Gaalkaapmaang ahihi. Tua ahih manin 1962 kum panin tuni ciangdong "Kumpi' Naseem khempeuh Gaalkaap Kumpite' Naseem" cihna ahihi.

Hih "Kumpi' Naseem" idea pen Kawlgammi khempeuh' khuak sungah naakpi a zungthuuk akha khinzo thusiahuai mahmah khat hi a, "Kumpi' naseem i hihteh kumpi' deihbangbang sep ding akizawh hiilhialna" uplehsaanna in hong uk hi. Thumaan mahmah bangin kiseh hi. Kawlgam buppi akhantoh theih lohna abulpi pen "Kawlgam Ulian khempeuh Kumpi' Naseem Hi uh" ahihman ahihi. Kumpi' na seemlo a mipi' na aseemding cihthadah Kumpi' na sep kawm a, mipi' nasep tawh thuahding nangawn "Kumpi' thu nialna" ci-in Pasian' naseem kicite nangawn in "akhial" bangin genta kuunkuun laaideep uhhi. Biakna lam ah makaai upate-zong tua Kumpi' Naseem lungpuakzia mah-in nelhsiah ahihlam kilangh-hi.

2015 Kiteelna lawhcing dinghiam, lawhsam dinghiam kithei naailo-hi, kei mimal' muhna-ah ahihleh thutanna-tawh kituak lawhcinna kimu loding-hi. Azenzen-in, 2010 Kiteelna mahbang-a hong hihtohgawp uhleh Gaalkaapte mah-in ukna hong leento lelding uhhi. Kua party bang party akah zong-in akah khempeuh-in mipi' na hongseem lo-in kumpi' na-mah hongsep zeelleh Kawlgam buppi kikheelna peuhmah piang deksuai loding-hi. Zomi lak-ahbel gennavet omlo lelding-hi.

Atung-a kum tampi Kumpi' Naseem I-cihte' lungtang-ah minam hong suksiat nading tua Gaalkaap Kumpite' gaalvan: Tiddim Chin, Falam Chin, Hakha Chin cihte leh namneu Code hongpiakte naakpi-in belhcip-in kheengcip bikbek-hi. Ci tung-a abelh civom ahihkeileh meima-pawn bang-in belhcip-hi. Tua ngaihsutna paihkhiat nading naakpi-in haksa-a, meima-pawn temta-tawh at-khia lehang anat mahbang-in tua ngaihsutna-pen Kumpi' Naseemte' lungtang pan-a laakkhiat nading naakpi-in naasa uhhi. Kuamah-in lakhia ngamlo-hi. Naasa lua-uh ahihman-in tua khaici phungvuh vet uh-a, honkhatte-in Kumpi' gaalvan hawmthawh-in, Zo Chin, Siyin Chin, Khuano Chin cih nangawn-tawh behlap toto liang uhhi.

Hihte ahiding mah a uplehsaanna I-neih naakleh eizong Kumpi' Naseemte' sawltaakte (servant of the servants of government) i hi dinghi. Tua Zomite-in "Kumpi" acihteh Government (Gamukte) acihna hi-a, tua Gamukte-pen Gaalkaapte ahihi. Tua ahihman-in atung-a minam sukkhapnate "thumaan a i seh" naakleh eizong Gaalkaap Kumpite' sila (slave of Military Government)mah i hi dinghi. Tua-hi. Democracy khawng kam dimdim a, i lawhlawh hang-in tungsiah maaivil, nuaisiah nencip paizia-mah ahihi.

Tuabang lungsimpuak-tawh vaaihawmna peuhmah Pasian in zong deihlo ahihman-in, Zomite in anuai a Khiaap ding Thu Sagih te sephun ta hi.;

1. Tungsiah maaivil, maai-et, "khial" taleh pumgup, mawkpan cihte khiam ta-ni!
2. Nuaisiah bang-a I-seh mite' thugen "maan" taleh awlmawhlo, dawntaak salo, nehpiik, zahpih, langbawl, siatgen, zahko cihte khiam ta-ni!
3. Gaalkaap kumpite' gaalvante "ahi, amaan" sa-a, I' kingaapna, I' kitangpeekna, I' tuamtatna abeisiang dong-in khiam ta-ni!
4. Biakna lam-ah, ei' kikhopna-a hong kikhawmlo mite Satan bang-a sehna, gaal bang-a neihna khempeuh abeisiang dong-in khiam ta-ni!
5. Pulpit tung bek-a Pasian' na akiseem, upaphualpi khawngbek-a minam' na akiseem I' sakna/I' kisakna, mipi' maai-a thugen   lasakna leh Pasian' thugenna aneilo mite mi-maimai-a sehna khempeuh khiam ta-ni!
6. Akual akhawk, abeh aphung, akhua atui bih-a mi piimuhna leh neumuhna khempeuh abeisiang dong-in khiam ta-ni!
7. Mindeihna, dawknopna, "pil, siam, hau, thukhual" hong kicihding lunggulhsiatna khempeuh abeisiang dong-in khiam ta-ni!

-Tua-tawh kiton-in Saangkhan ding Thu Sagih te in;

1. Pasian-in Zomi cih minam lian khat-in bawl khinzo ahihman-in tua Pasian' maaipha zonna-ah Zopau, Zongeina, Zola leh Zomi Pupa' cihtakna lamsang saangkhaan ta-ni!
2. Thumaan genngam-a, thumaan it theih nading leh "akhial" te gaalbawl lo-a, amaan apomkip nading itna-tawh pulaak ciatciatna lamsang saangkhaan ta-ni!
3. Behlehpung, sunghlehpu, tuù-leh maak-a kizom vive I-hih man-in tong kisaang, zaila awi-khawm tengbeek ngaattak-a pankhopna lamsang saangkhaan ta-ni!
4. Biakna lam-ah, ei' kiang-a hong kikhawm lote-zong I' beh I' phung, I' tuú I' maak, I' sungh I' pu-mah ahihna phawk-a kizop siamna lamsang saangkhaan ta-ni!
5. Pulpit hitakeileh, Lai Siangtho tawi-a thugen hitakeileh, upaphual-a vaaihawm ulian hitakeileh mipih sapih khempeuh Pasian' maai-ah akibang/akikim ahihna phawkthak-a, mikim zahtaakna piak siamna lamsang saangkhaan ta-ni!
6. Koi-khua, bang-khawk, bangbeh hitaleh tong kisaangthei ahihnaakleh "kei-tawh unau hive hang-e" ci thei-a, itna-tawh kimuak siamna lamsang saangkhaan ta-ni!
7. Pilna, hauhna, siamna, thukhualna maantak lunggulh thei-in, tuate ngahtheih nading lamzing maante hahkat tak-a zuihzawh nading lamsang saangkhaan ta-ni!

Khiapding thu 7 leh Saangkhaanding thu 7-tawh Zomite baanzaal ziat suankhawm-in maaciang suankhawm theile'ng Tuunnu' Zogam niibang luun-in paalluun dinghi. Tua ciang-in Gaalkaap Kumpite' Sila hihna pan-in Zomite' Naseem Muanhuaite I-suak ding-a, Zomite Piangsakpa naakpi-in lungkim dinghi. Pulpit tuhngah kuul sese lo-in, upaphual tutphah luah sese kuul lo-a, "Nahibang-in, kahibang-in" Pasian leh Zo Tuunnu-in hongngaak gige-hi!

 

By: Zokhai (Australia)

  • comments