Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

Minam Limlang Lai

Thukong honna:  Tukum laigelh kidemna thulu ka lungngaih ciang, minam le lai a kikhen theilo ahihna thu ka phawk hi. Mihing khatin silh le teen, nek le dawn a kisap mah tawh kibang hi. Lai a neite minam kician khat hi a, lai lamah a khantoh leh minam khangto hipah hi. Minam limlang LAI ahih leh a beisa hunah bang dinmun tungin, bang teng sep kul lai ding hiam? Hih tawh kisai-in Zomi leh Zolai bulphuhin, ì Minam, Minam Limlang, Minam Limlangin Zolai leh Zolai tawh sep ding mabanteî cih thu 4 tawh thusunna kong nei hi.

1. MINAM:  Minam pen ama thu tawh a piang tawm (Evolution) hi loin, Pasian bawlsa(Creation) hi (Pian.1:26;3:22). Khang thu sutte in, " Zomite Joseph tapa Manasseh suante hi" ci hi. Ka pianna khua Siampu Lal Khua Zuan in dawithoih in a phuisam ciang, " Zomite pupi PuManasseh aw," ci-inphuisam zel hi. Zomite Pasian tel minam i hihna hong lak hi. Minam le pau tawh kisai Pastor Thangpi in Zolus No.17, 2013 sungah, "Leitungah pau 7105 om a, Sino-Tibetan sungah pau nampi 250 om hi. Tibeto-Burman sungah pau nam 400 omin, Zo pau zong nam khatin kihel hi" ci hi. Rev. Khup Za Go in a gelh, "Leivui Panin " cih bu ah, Minam khatin gam khat, ngeina khat, minpi khat, lai khat neih kul hi" ci hi. Minam khat hihna pen lai le pau tawh kiciamteh ahih man, Zomite minam kician khat i hihna kilang hi.

Zomi: Kawlgam Kumpi in Zomite minam khatin hong ciamteh a, gam le lei a tuam neihte i hi hi. Tanglai-in Zogam pen kuama khut nuaiah om loin, amau le amau ki-ukte hi. AD 1550 pawlin Pu Gui Mang in Tedim khua satin hausapi sem a, a sawt loin Tedim khuapi suak hiîcih thu ZOLUS 2013 ah kigelh hi. 1896 in England kumpi in India leh Kawlgam uk a, siah kikai ahih man "Ukpi hun" kici hi. Tedim gamah Pu Kam Hau in ukpi sem hi. 1948 ciang Kawlgam in suahtakna ngah a, Zogam pen "Chin Special Division" kici a, 1974 in " Chin State " kici kik hi.

1948 kumin Pinlong Agreement ah Zomi makaite kihel a,Kawlgam in suahtakna a ngahna Zogam makaite panpihna hang hi, kici hi. 1989 ciangingam makaite in minamkhantohna ding ngimna tawh Zomi National Congress (ZNC) phuan uh a, 2012 ciang, "Zomi Congress for Democracy " (ZCD) tawh laihkik uh hi. 2013 in Zomi Youth Association (ZYA) pen kumpi in theihpihna pia hi. 2014 kumin Leitungbup Zomi Innkuan USA (LZI) te UNO in minam khatin kipsak hi. Zomite Kawlgam leh leitung theihpihin minam kip khat hita hi. Akip semsem nadingin Zo vontawi teng vaipuak hita. I minam dinmun hong lak limlang thu tawm lungngai kik ni.

2. MINAM LIMLANG: James 1:23,24 ah, Pasian thu limlang tawh genteh a, " Limlang ah a ki-en mipa dinmun lak thei hi " ci hi. Pasian thu in mihingte hihna hong langsak hi. Tua hi a Zomite khantohna lai tawh tehkak leng kithei pah ding hi. Lai le laibute in pilna ding lam hong lak meivak hi(Late 119:105). Lai-in mite thutheihna, up theihna, nuntakna, lungmuanna cihte hong pia hi ((Rom 10:17). Lai-in pilna tha khauhsak, pilna siamna hong pia, hauhna le minthanna hong ngahsak hi(Pau. 4:7,8; Heb. 5:13,14).

Dinmun:  Lungsim lampilna nei khatin, " Mi khatlungsim puakzia pen a puansilh, a kampau, a gamtatna tawh kithei hi " ci hi. Tua mah bangin, mi khat, innkuan khat, biakinn khat, khua khat, minam khat leh gam khat dinmun pen laigelhna pan kisit thei hi. Rev. Khup Za Go in a gelh, Leivui Pan in- cih sungah hih bangin gen hi, " Mi khat, innkuan khat, pawlpi khat, khua khat dinmun na theih nop leh a inn ah pai in la, kawmpek, kawmzawl tungah lai a kigelh bialbual hiam, innsung innpua ah vante mun le mual nei loin a kithehthang zelzul hiam? Biakinn sungah ettheih ding lai gual khat zong om loin, leivui kaiin pulpit lam van senna lelin a kizang gawp hiam? Pawlpi hun geelna leh thuzaksakna laite kicianlo, simtheih mel loin a om hiam? Khua khat na lut kuan ciang khua mualsuangte ah bang thu kigelh a, khua sungah bang laite kigelhin, inn le lote bangci danin kilam hiam? Tua lai kigelhte tung tawnin mite gina ginalo, khuapil pillo, mite nuntakzia khang maw khangto lo cihte limlang et bangin kimu thei ding hi" ci hi.

Tua banah, sabuai tungah Thukizakna laidal, Lai Siangtho, laibu manpha leh Bizu dimin laibu a om zihziah leh, mipil miteite omna hi, kici ding hi. Biakinn sung pulpit lamah thubulphuh laisuante hi sitset, mailam kalsuanzia ding geelna nei, zum inn leh laibu sal neiin, thangahhuai kammalte a kisuan leh a khangto ding innkuan leh khuate hi. A hang pen, makai khat mipil khat kici buang, laigelhte kicianlo kiphiat nemnum, laigelhzia ngeina (punctuation) te don loin lai a kihawmkhiat leh, midangten limlang et bangin thanemnate theipah ding hi, "ci hi.

Minam khat kici buanga eima lungtang pan a phul khia gam thu le leitung thu, minam thu le biakna thu, cidamna thu le nek zonna thu tuamtuamte gelh loin, nam dangte gelhsa nangawn teikhiat sawm kei leng, minam picing kisuak thei ngeilo ding hi. Hih minam dinmunte na et ciang, Zomite namdangten a pil a siam, a khangto a picingin hong mu thei ding uh hiam? Hih thute banah limlang et banga ki-etkik theihna ding thute in bang teng hi lai ding hiam cih zong lungngaih huai ka sa hi. Lai lam nasepnalimlang et bangin kician takin hong musak hi.

3. MINAM LIMLANG IN LAI

(1) Lai: Zomite lai tawh kisai thu thumin kikhen thei hi. " Akhatna: 1440 AD hun pawlin, "Savun Lai" khat om a, uipi in tua savun netum ahih man lai kinei nawn lo " kici hi. A nihna: 1902 kumin Pu Pau Cin Hau mangmuhna pan a kingah hi a, " Zo Tuallai " kici hi. A thumna: Sangmang (Missionary) J.H. Cope in 1914 kum a Roman Alphabet tawh hong bawlsak Tedim Lai hi a, tu in "Zolai " kici hi. Hih lai in Zomite minam khat hihna hong lak a, dinmun kician khatin hong bawl a, i gamh lianpen khat ahi hi. 1919-1938 sung, a masa pen Tedim Thukizakna (The Chin Hills News) hong bawl hi. Sangmangpa leh Zomi makai pawlkhatte hanciamna tawh lai lam pilna kingah hi.

(2) Zolai le Zola:  Zo Paunak ah, " Thu in la, la in thu hi " a cih bangin, lai i cih pen la zong ahi hi. La cih ciangin tanglai pu le pate tung pan a kineisa la te hi. 1910 in Cope topa le makai pawlkhat in Mikang la hong letkhia in Tedim Labu i nei hi. Kum 1970 khit ciangin Zogam sungah kha khanlawhna hong tungin, mikangte laphuahte " Chorus " letkhia in i sa thei ta hi. Khanlawhna tawh kitonin, " Tualsuak la " tampi hong piang khia a, tu ni dong thu um mite hong nosuaksak hi. Kum 2000 akipan in Zola aw kaih tawh Pasian min i phat thei ta hi.

(3) Lai Siangtho: 1914 kumin Dr. J.H. Cope in Zolai sim bu hong bawlsak a, 1915 in Matthai bu hong bawlsak banah, 1931 kumin Zo Tuallai tawh Mualtung thuhilhna hong khetsak hi. Kum 1932 in Thuciam Thak buppi hong lehkhiatsak khin hi. 1964 in Late kikhen a, 1967 in Thuciam Thak leh Late kikhen hi. Kum 1977 in Lai Siangtho buppi kikhen hi. 1980 in Zomi Christian Literature Society kiphut a, " Zolai Zunna "nasep kipan hi. Kum 1983 in Lai Siangtho bupi kikhen kik hi. Kum 2005 in Lai Siangtho bu minte a kibang ding deihna tawh ki-enpha kik hi. Kum 2010 in Hilhcianna tawh kithuah Lai Siangtho bupi kikhen a, 2014 kum in Dr. H. Gin En Cin hanciamna tawh Zokam Inter- national Version kikhen kik hi.

4. SEP DING MABANTE: Lai tawh kisai sep ding mabante i cih ciang thu leh la manpha, tangthu manpha i zakte pulakin laibu ah gelhin, gam le minam khantohna dingin a hun lapin sem ding cih nopna ahi hi. Lai tawh nasepna a khantoh theihna dingin bang teng sep kul hiam? I ngaihsut khop dingin thu pawlkhat kong sung hi.

(1) Zomite sungah Thukizakna lai bangzah kihawm khin ta hiam?

(2) Zolai tawh laibu bangzah kibawl khin a, la khui bangzah kihawm khinta hiam?

(3) A okihawmsa laibu le khuite sungah bang thu teng kihel a, bang thu kihel nai lo hiam?

(4) Mipiten bangh thu lunggulgh hiam?

(5) Mipite phattuampih ding bang hi a, bangci kikhawng baih ding hiam?

Zomite Zolai gelhpu khat ahi Dr. Gin En Cin in, " Zolai en gelh kei leng, sim kei leng, zun kei leng, bawl kei leng, lei kei leng kuan hong lunghimawhsak ding hiam? " a cih pen man mahmah hi. Hih thute lungngai in, a sawt loin ka zaitha hong kiam ding a, ka mipihte bang thupha bawlsakin, bang gamh nutsiat thei ding ka hiam cih lunggeel hun mahmah ta hi. I pil i siamnate laibu sim theih khat beek taswh khangthakte gamh ding kisam in lunggulh huai peuhmah hi.

THUKHUPNA:  Zomite minam kician khathi cih ciamteh theihna pen gam khat, minpi khat, ngeina khat, lai khat leh ki- ukna khat tawh a khangkhia minamte ihi hi. Minam khat hihna a kilat theihna dingin paukhat, awsuahkhat leh laikhat zat kul ding hi. I kibat lohna awsuah neu cikcikte nawl khinin, a tam zaw kibatnate i bullet kul ding hi. Siam gante in khau zawng (colour) tuamtuam gawmkhawmin puan etlawm tak gan hi. Lim gelh siampa in zong tuamah bangin lim hoih leh etlawm gelh thei a, inn lampa in zong van tuamtuam zangin inn hoih leh kip lam thei hi. Leitungbup huap minam lian i suahzawhna dingin a genthei, a gawm khawm thei mipil leh makai kisam hi. Minam lian i cihte pen mun tuam gam tuamah kithehthang tase leh zong a Pasian, a ngeina, a min leh lai kiplet tinten in,tu le ta khangsawnte tung dongah a hilhsawn thei minamte ahi hi.

By: Rev. Cin Ngaih Thang (ABC, Tahan-Kalaymyo)

 

  • comments