Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

Zomi Te'n I Ngaihsut Ding Thu Pawl Khat

1382337 421644434608638 453738238 nAmasa in, kiteelna tawh kisai tawm gennuam hang. Kawlgam kiteelpi ding ni 20 kim bekin sam ta hi.( Kiteelna a om takpi ding ahih leh!). Mee piakna-ah a mi enzaw ding maw, a party enzaw ding cih tu laitak in mi tampi-in kibuaipih hi.  Party pawlkhat in ‘a mi en kei unla a party en un’ ci hi. Party dang pawlkhat inlah ‘a party en kei unla a mi en un’ cizel uh hi. Tua ahih leh e’n bang i en tam? Ke’n  anih in ethuai sa ing. Party i en a, mimal i en zong in thu nih bek etziau ding hoih ka sa hi. Amasa in, hih party/ mimal in gam leh minam avei taktak hiam? Gam leh minam aa dingin asem nuam takpi hiam? Aituam meetna ding ciang bek peuh a en lel hiam, cih et masak huai ka sa hi. Kawlgambuppi i et ciangin party tuamtuam lakah ‘hih party te in gam leh minam avei takpi hi,’ cih theih ding party pen muhkhiat hak khollo tawh kibang hi. Zogam ah zong party tuamtuamte’ thugenna leh sepna tungtawnin ‘hih party in gam leh minam vei pen ei,’ i cih ding omkhin kha ngel ding hi. Gam leh minam avei party leh mimalte mah mee piak huai hi.

Anihna ah, Pasian kihtak zahtakna anei, Pasian amuang party leh mimal mee piakhuai ka sa hi. Hih pen Kawlmi party sungah kizangthei khol kei in cin, ahi zongin Zogam ah party ahi zongin, mimal ahi zongin kizang thei ding hi. Lawh cinna, daupaina pen Pasian kiang pan ahih manin Pasian amuangte bek mahin i lam-et bangin gam leh minam aa dingin hong sem zo ding uh hi.  Pasian anei Zogam ah Pasian theilo makai khawng neih ding pen deihhuai masa hetlo hi. Zogam aa dingin bang party ahi a, kua minam ahi phial zongin Pasian a thei, Pasian a zahtak makai lunggulh huai mahmah hi.

 

Tu’n mailam kalsuanzia ding tawm gen nuam hi hang. Mimal kizopna, kimaingapna (interpersonal relationships) pen leitungah thupi mahmah hi. Pasian mahmah in zong mimal kizopna thupi sa hi. Bangzah ta in gina ta kei lehang Amah zuanin, Amah sang lehang Pasian in tapa zaa hong pia hi. Gina mahmah in pahtak huai keei ta lehang, Amah i awlmawh kei leh Pasian in zong hong awlmawh lopah hi. Pasian thupha i saanna dingin Pasian mai zon kul hi. Tua bang tektek in leitungah zong hamphatna i ngah nop leh thuneite mai i zonsiam ding thupi mahmah hi. “Ei kilawmpen hang, ei ginapen hang’ ci-a tut liuliau tawh hamphatna kingahlo ding bek thamlo-in kingahlo khin zo hi.  

Zogam ah district ngah dingin ei Tedim kilawmpen napi hangin Haka in ngah hi. Vanlengtual bawlna dingin Saizang khuataw a tualpi hoihpen napi Falam in ngah hi. Ei te in i kilawmna, i ginatna suangin i tut liuliau laitakin i lawmte in thuneite mai na zong uh a i hamphatna ding teng tuahkhia pahpah uh hi. Hih maitang zonna, mai vilna pen zuauthu tawh ahih kei nak leh Pasian zia leh tong khat zong himai hi. Joseph in a tunna peuhpeuh ah a pute mai vil zo ahih manin maipha ngah kawikawi a, atawpna ah Egypt gamah Pharaoh zom a lianpen hong suak hi. Esther in a pasal kumpipa mai vil zo ahih manin a mite sihna pan honkhia zo hi. Tua ahih manin, hih mi tawh kizopsiamna pen Kawlgam paizia bek hi loin leitung paizia ahi hi. Leitung ki-ukna bek zong hi loin biakna sung, innkuan sung dongah a kisam thukhat ahi hi. Tate sung nangawn ah nu leh pa mai a vil zote mah hampha pen lel uh hi.

Ei Tedim lam Zomite pen akhang akhang in thuneite mai vil cihte pawl kivazo phalo hileng kilawm hi. A kiphasak ihiam, a meidawi ihiam, gam leh minam avei zo taktak lo ihiam, kiniamkoih a mimai zon ding pen haksa kisa mahmah laizang hi. Mailam ah hih laimun i kipuahphat keileh bel hamphatna ngah ngei lo ding hihang. Angah huai hamphatna tampi i khahsuah pen i pil loh man, i tei loh man, i hauh loh man,mimal i tawm man hi peuhmah loin i lawmdangte banga thuneite tawh kizopzia i siam loh man hipen hi ci-in ka mu hi. Thunei pen hileng bel mimai vil kul lo hi. Tua ahih manin thuneipen mun tuhsawm ding maw, ahih keileh, thuneite maivil zawding cih thunih bek om hi. Thuneipen mun tuhzo leng bel hoih penpen hi. Kuamah maivil kul loin ei deih bangin vai kihawm thei ding hi. Tu laitak i dinmun pen thunei mun lah tuh zo taklo, thuneite lah maivil nuam lo, ei tumtak a gal ciakciak pongdan khat hileng kilawm hi. Hih bang dinmun tawh bel i mailam bing mahmah mai dingin ka um hi. I khuadak zek kei leh hong kimakhelh mangkhin ahih manin phazo nawnlo a i om ding dahhuai ka sa mahmah hi.

Tua ahih manin, mailam ah kiteelna tawh  akah ding gam makaite i hi zongin, kumpi nasem uliante ihi zongin Pasian muang sa in gam leh minam vei cihtaka i vei ding i kihanthawn nuam hi. Gam leh minam hamphat nang ahih nak leh hangtak leh kiniamkhiat takin ma pangciat dih ni. Thuneite tawh zong ki-it, kithei in, thuklut sawm ding hang a, gam leh  minam hamphat nading khat peuhpeuh maitang singhawl belh liang mahin phu tentan ding hi hang. Tua bang i sep manin zakiatlawh pah khollo ding hihang. Mordecai, Esther, Daniel te in sihdaan kipiathei ding dinmun panin gam leh minam veiina tawh khauhtakin adin uh ciangin a zakiat uh cih thadah thupha san lawh zawsop uh a, kumpite zomin ulian pipi suak uh hi. Zomi ta dingin Mordecai thak, Esther thak, Daniel thak khat kisam mahmah hi. Topa mai zongin, nakpi in thungen dih ni. 

By: Rev. Dr. Do Suan Mung, General Secretary of GZA

Posted by: Tongsan Media Group

  • comments