Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

Nipini Kikhopkul Sese Maw: Pawlpi Ka Nuak Lel Diam?

DSC00246Nipini kikhop pen biakpiakna kicilo ahih leh kikhop kul sese ding hiam, cih dotna hong om pah lian hi (Mi pawlkhat bang in nipini kikhop bek pen biakpiakna sa uh a, ahi zongin kikhawm nuam tuanlo lailai uh hi). Mun gamla pipi pan vai thupi tuamtuam nungsia-in sum le paai tampi zangin mun khatpeuh ah biakpiak kikhop kul sese ahi hiam?

Kul mah hi. Banghang hiam cihleh...

1) Pasian thu kihilhna, thu-um mite tawh kikholhkhopna, leh nekkhawm neknate neihloh a phamawh ahi hi (Acts 2:42-46). TV, Radio, Internet, Digital tuamtuam tawh Pasian thu kihilhna ngai kha mah ding hi hang. Ahi zongin thu-um dangte tawh kikholhkhopna (fellowship) piang theilo hi. Nekkhawm zong khatkia in inn ah kine thei lo hi. I pastor pa in i inn ah hong puak kha mah ding hi. Ahi zongin nekkhawm pen inn-a kipuak ding hilo hi. Nekkhawm nek ni bek-akikhop ding zong hilo-a, nekkhawm in hong khamisak zaw, hong damsak zaw,Pasian maipha hong musak zaw zong hilo hi. Thu-um mite kikaihkhopna bek-a nek ding hi-a, Zeisu phawkna-a nek ding bek ahi hi (Acts 20:7; 1Cor 11:20-26).

2) Kikhop ding pen Pasian hong sawl hi-a, thupi i sak kei phial le zong Pasian thu i manna-in i kikhop teitei ding ahi hi: “Mi pawlkhatte bangin biakpiak kikhopnate tawpsan kei ni. Topa Ni hong naita hi cih thei na hih manun khat lekhat than a kipia semsem un,” ci hi (Heb 10:25). Pasian sawlna i manna tawh Pasian deihna khat a sem kha ihih manin a hampha ihi hi. Kikhop nuam kei. Thugen lasak zaknop kei. Biakinn nuam kei. Hong ki-welcome kei. Hong ki-awlmawh beek kei. Nekkhawm zong kine ngap kei. Mi kitawm ta buang in. Khualum/dam lua mahmah lai, ctp., cih ding hi vetlo hi. Pasian in nop nasak uh leh kikhawm un, hong ci ngeilo hi.

Hih Hebrew 10:25 a kigelh hun lai-in kikhop ding limlim pen haksa mahmah hi. Kikhawm le uh bawlsiatna tuamtuam thuak uh hi. Singlom hen bangin kihenin kihal-a, a kihalna meikuang pen pawibawlna meivak bangin zang uh hi. Savun si banglai khawng tawh a hingtangin zialcip uh a, ui gilo gilkialte khawng nesak uh hi. Bungbu lehkhai-in a kal pan a lu dong sing-attem tawh a phelkhap uh zong om a, numei pawlkhatte bang a humsam uh tawh khuam tungah a sih dongun khai uh hi. Suangtum oksak-in tui sungah a khiat uh om a, ippi sungah khitcip-in tui sungah a khiat uh zong om hi. Sathau sa sungah a kan uh om a, sikbel sa mahmah sungah a hulkan ngiat uh zong om hi.

Tua hi-a, a kikhop uh ciangin luangkham lianga kikhawm uh ahi hi. Tua ahih manin Christian pawlkhatte in kikhop ding haksa hong sa uh hi. Kikhawm selo-in ei tumtak tekin om lel leng; i upna pulaaklaak se lo-in um khinkhian lel leng bawlsiatna le thahna  tuamtuam thuak kha lo ding; vantunggam lah tung veve ding, ci uh hi. Kikhawm le uh a kithat thei lua mahmah ding hi na pi, Zeisu in, kikhopna tawpsan kei un, ci veve hi. Kikhawm le uh cin na nuntakna un sawng kha mah in teh; bawlsiatna le thahnate thuak kha mah un teh – ahi zongin kikhawm veve un, hong ci ahi hi. Mite in kikhop khat pen a nuntakna uh tawh khekngam liang ahih leh banghangin en haksa sa lai ding ihi hiam?

3) I pianthak ciangin Khazih pumpi nate ihi-a, Khazih pumpi nate a vekpi-akizom dimdiam ding leh amau mun ciat-a a gamtang diamdiam ding ahi hi (1Cor 12:13-20, 27). I pumpi dang teng a kim hangin i khepimuk om kei leh kiplo hihang. I pumpi sungah a om lam kiphawk kha khollo napi, om kei takpi leh a poi mahmah tampi om hi. A taktak-in ci leng a nasem taktak teng pen a kimulo teng hi zaw lai hi. Khazih pumpi nate hi khin na pi, pumpi na a dangte tawh i kigina zop kei leh Khazih pumpi cidamlo ding a, ei mahmah pen natna/natna piangsak i suak ding hi.

4) Zeisu pen pawlpi ih innkieu suang hi-a, tua tungah nungzuipite hong dingin tuate tungah thu-um mi dangte a kilamto diudeu ahi hi (1Pet 2:5-6). Kikhawm lo-in pawlpi mite tawh kikhawl kei leng Innkiu Suang Zeisu tunga kiciang ihih sam hangin na dangte tawh a kizomlo hi ding ihih manin i kip thei kei ding hi. I tungah zong kua/bangmah kilambeh theilo ding a, i nuai ah zong hong kidom hong kinang thei nawnlo ding ahih manin i puk pah ding hi. Ei bek zong puk lo-in Zeisu pawlpi i dengpai kha mai ding hi. Thukhenna kuan thuakzo ding!

5) I pianthak tunga i ngah Khasiangtho letsongte pen pawlpi kilam na dinga hong kipia hi-a, ei nopsak mawkmawk na ding hilo hi (Rom 12:5; 1Cor 12:7; 14:3-5, 12, 17, 26; Eph 4:12). Kikhawm lo-in thu-um mite tawh kipawlkhawm kei le hang i Khasiangtho letsong ngah koi ah zang ding ihi hiam? Pawlpi kilamtoh na dinga hong kipia hi ven – kikhawm kei leng pawlpi koici lamtoh ding? Keiguak in inn ah LST simin thugen leng nuam sa zaw ing, ci-in i kikhamisak mahmah hang Khasiangtho a zahpihte i suak ding hi.

6) Kikhopna lo tawh kikhami theilo hi. Zeisu tawh i kisut pen hun in itna i lah khiat hun, mawhna i maisak hun hi-a, midangte tawh kikhawlkhawm kei le hang kua tungah itna lak khia-in kua mawhna koici maisak thei ding ihi hiam? Pasian in pawlpi sungah khat le khat a ki-it ding (1John 4:12), a kihanthawn ding (Heb 3:13), na hoih a kisepsak diamdiam ding (Gal 5:13), thu a kihilh ding (Rom 15:14), a kipahtawi ding (Rom 12:10), a kihehpih diamdiam ding le mawhna akimaisak ding (Eph 4:32), kiniamkhiatna puan a silh ding (1Pet 5:5), thu a kingetsak dingin hong sawl hi (Jas 5:16). Khat le khat tua bangin na kibawl un, ci- a ‘khat le khat’ kammal a zat pen 70 vei bang hi-a, pawlpi sungah pawlpi mite khat le khat i kibawlzia ding hong hilh ahi hi. Kikhawm ngei kei leng hih Pasian deihnate koici zuih thei ding ihi hiam? Khatkia-in kikhami thei vet lo!

7) Pasian phatna late, biakna late leh khalam late tawh khat le khat nakihanthawn un la, Topa phatna lasa un, ci hi (Eph 5:19). LST sunga Pasian phatna la a tamzawte pen mipi mai/lak-a kisa vive hi-a, mipi mai/lak mah-a lasa dingin zong hong kisawl hi (Ps 111:1; 1Cor 14:15; Heb 2:12). Mipi tawh ahi-a,mipi mai-a lasakna tawh ahi zongin khat le khat a kihanthawn ihi hi. Kikhawm keile hang koici bangin lasakna tawh midangte thapia thei ding ihi hi. Mipi la i sak ciangin i vekpi-in Pasian min a phat ihi-a, i vekpi mahin khat le khat a kihanthawn ihi hi (Mipi lasak ciang sak thadah kei ni). Vantung mite in Pasian phat-in, “siangtho, siangtho, siangtho,” acih uh ciangin zong khat le khat ki-en uh a, Pasian siangthona pen khat le khat tunga kiko ngiat uh ahi hi (Isai 6:3). Mipila i sak ciangin zong tua bang mah ahi hi.

Tua ahih manin pawlpi nuak kei ni. Piangthak taktak ihih nak leh pawlpi kinuak theilo hi. Pawlpi i nuak sangin si zaw le hang hoihzaw lai ding hi. Gina kei kha mah in teh – thungetna leh sep theih bangbang tawh puah ni. St. Augustine in, “Pawlpi pen numei kizuak hi-a, ahi zongin ka nu hi,” ci se hi. Gina kei mah, ahi zongin pawlpi lo tawh kha thu ah kinungta zolo hi. Pawlpi gina, pawlpi kicing,paubanna neilo pawlpi omlo mah ding hi. Banghang hiam cihleh ‘nang’ pawlpi mihi ve cin!

Ahi zongin Zeisu in pawlpi nuak ngeilo-in taisan ngeilo hi. ‘Nang’ hong taisan leh hong taisan zaw kha phial in teh – a pawlpi ahih leh taisan theilo hi. Ama phuh hi-a, ama lam ahi hi. Ama pat hi-a, bei ngeilo ding hi. A pumpi hi. A zi/mo hi. Pasian mai-a a dinpih ding ahi hi. A it tawntung, a gup tawntung hi-a, a sihpih ahi hi. Zeisu in pawlpi aa dingin a nuntakna a piaksa ahi hi. Tua ahih manin pawlpi a ginat zawhloh hangin Zeisu in puah tawntung hi. Tawpsan ngeilo ding hi. A pawlpi hong puahpuah lai dinga kawkbang lo-in hong bawl ding hi. Tua ni ciangin a hoihpen, a kilawmpen, a ngaihbangpen, a minthangpen hong suak dinga vantung mite mai ah Zeisu in, ‘en dih vo, ka pawlpi, ka zi, ci-in hong kisilhpih (kicua) ding hi. Tuuno mopawi hong siim khempeuh in zong ‘Oh, Pawlpi, pawlpi; Zeisu mo, Zeisu Zi; Etlawm mah si teh maw! Kua in nang hong nuak ngam ding hiam? Kuan hong taisan ngam mawk ding hiam,’ ci ding uh hi.

Hih article pen “Nipi Kikhop Biakpiakna Kicilo” cih ka gelh masak tawh simkhop ding …

 

By: Lian Muan Kim, PhD (Tongsan Columnist & President of Koinonia Baptist Seminary)

  • comments