Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

Zogam (Chin State) Thuneite le Tedim Gam Leitang Neite Vai

puNLTMyanmar kumpi thak NLD kumpi in gamsung khantohna tuamtuam hong sepkhiatnate sungah Zogam (Chin State) sung zongah pawl khat nasem uh a, tuate sungah ei Zogam, Tedim huam Leilum khua ah Hotel inn hoih pawl khat lam ding cih thu Chin State, PM Pu Salai Isaac Khen in pulakkhia ta cih kiza hi. Tua bangin Hotel a lamsawmna munah leitang nei or innmun neite paikhiasak or sum tawm khat tawh lei maw (ahk) khua le tui khantohna ding paulap in khembawl gawp lel maw cihte Kumpi thak hunah ngaihsut huai mahmah thu ahi hi. Ahi zongin Innmun, leitang neite tawh thukimna le amau ngah ding kilawm hamphatna (Right) te tawh kizui in, asepsak ding pen Tedim gam a om Inn mun / leitang nei Zomiten pilvang huai mahmah ding hi. Chin State government in Leitang neite' or luahte deihna or thukimna tawh Innmun lei or kum bangzah sung leitang saap ngahsak ding cihte tawh kizui in asepsak ding thupi mahmah hi. Tua bang sepna pen Kawlgam thukhunpite sungah kiciantak a omsa thu ahi hi. Tua hi in, Zogam (Chin State Government) in Tedim gam khantohna ding cih thu paulap in a nuai abang thuteng sepsawm cih kiza hi.

- ZOGAM Tedim-ah Hotel lamtheihna dingin, Leilum apple-huang neite’ munteng laaksak sawm (Confiscate) uh a, tua pen Zogam (Chin State) le Tedim khuapi khantohna dingin a kivaihawm hi ci-in, Chin State, Minister khatin Tedim khuapi upate le thuneite tungah gen hi. Tua bangin thuhoih le khantohna ding vaihawm takpi uh ahih le Tedim kampau MP-te le Tedim khuapi pan Chin State MP-te’n a theihpih kha uh hiam cih lunghimawh huai thu ahi hi. Khuadang oe mi namdang mihaute’ khut sungah i Zogam, i khua i tui , i leitang hong kizuaksak ding i phal mah ding di’am?

- A beisa galkap kumpi hun lai-in, Prime Minister Pu Hung Ngai in a pianna gam Mindat leh Kanpetlet khua-te-ah Hotel & Tourism khantohna ding ci-in, Hotel and Tourism Business lam nasep vaihawmkhia in, mundang khua dang panin minamdang mihau tampite leitangh pia-in, khantohna paulap in semsak hi. Tua nasepna i et kikkik i etkik ciangin asem abawl Kawl /minamdang mihaute i neihsa hong suak ziau ta ahih manin, a khua a tui le a leitang khempeuh minamdangte' khut sungah leitung bei dong apiakhia suak mawk hi. Tua hi in, a mipite'n bel pu le pa khang a luahsa le tenna leitang luah thei nawnlo banah tua Hotel nei mihaute' nasem (Slave) khasum saang bek-in a om tawntung ding uh ahih manin khuangaih huai mahmah hi. Gentehna-in, a mipihte Hotel & Tourism business lam pantah-in nuntakna ding lampi honsak (or) a leitang neite 50% or percent a kilawm zah khat vaihawmsak hi le a khuapihte in tu khang ta khang dongah Business owner suak ding cih te ngaihsut huai mahmah hi.

Zomi MP-te le Tedim Khuanu khuapate’ Ngaihsut ding Thupi Pawlkhat:

1. Kumpi’ lamding ahih leh Tedim khua te’ neihsa ahih manin phalhuai hi. Tua business nasepna khempeuh-ah nasemte pen kumpi khasum sang suak ding uh hi.

2. Kumpi’ min paulap napi’n, khuadang mihau khat ii business ding ahih leh, tua mihaupa’ nasem suak ding i hih manin, kumpi nasep zah-in, khasum le hamphatna benefit om lo ding hi. Tua mihaupa in Tedim khua adingin, Kawlgam sum Teng tul val(US$ one million)official-in ong piakkhiat hang’ hawmthawh huai mahmah lai kha ding hi.

3. Pasian hehpihna tawh Zomi mihau tampi takin Tedim-gam sunga hotel lam zo ding om lua hi. Personal-in midangte’n lam theihna ding permit ngah thei ahih leh, ih MP-te leh Zomi thuneite in Zomi mihaute’n permit ngah theih nading vaihawm huai lo ding hi’am? Tender kisam aa a kidemsak ahih le zong, a hun lap-in mipi’ theih dingin, notice announcement a kibawl hi’am? Tedim khuasungah hih notice-te khuanu khuapa theih dingin a kizasak hi’am?

4. Galkap kumpi hun lai-in, kumpi min paulap-in, lokho-mite leitang teng mihaute’ tungah azuaksak uh tawh kilamdang lo kha ding hi.

5. Mipite in Tedim khua aa kumpi lam thuneite’ tungah muhkhialh loh ding kisam hi. Tungsiahte’ thu banga gamtat ding uh hi a, Tedim aa kumpi nasem makaite’n vaipuak or thuneihna nei lo uh hi. Tua mah bangin, Leilum khua mipite’ deihna lungsim pulakna nasepnate-ah (movement) Tedim khua kumpi lam thuneite a galbawl uh ahih loh lam, Tedimkhua kumpi thuneite’n a telsiam ding uh zongh kisam ding hi.

6.  Tedim gam sungah pupa’ logam leitang khempeuh akhang akhang Kumpi in Gran kibawlsak cih bang om ngei lo hi. Thuduh manin leitang lai, gran paulap aa thu bawlsawm cih te pen ngeina om lo hi. Tua ahih manin Mipi khempeuh kithutuak aa kipanpih tek ding kisam mahmah hi.

Sepkhiat Zia le Kalsuan Zia Ding:

1. Leilum khua mipite’ sung panin hih vai tawh kisai a lunghimawh teng Committee kician khat phuan-in kisemto thei ding hi. Tua Committee in Tedim khua kumpi lam thuneite’ tungah thuzaksakna lai piak dinga, theihsak-huai mun le zum khempeuh zongah Copy piak ding kisam hi.

3. Tedim khua, State Union level MP khempeuh le CSO, CVO kipawlnate-ah theihsak ding le kisam bangin huhna nget ding kisam hi.

4. State Councilor Daw Aung San Suu Kyi, Vice President Henry Van Thio, Chin State Prime Minister Pu Salai Lian Luai-te’ tungah personal huhngetna lai piak kul hi.

5. Zomi sungah Zogam leitang vai a lunghimawhte’n ong panpih theihna dingin, Zomi Social Media khempeuh-ah suahsak zihziah ding hi.

 

Zogam leitang vai-ah Zomipihte tawh akibangin kiu khat pan ka lunghimawhna teng Tongsan Media Group tungtawn in hong pulakkhia ka hi hi. I biak Topa Pasian in Zomi le Zogam leitang thupha hong pia hen.

By: Pu Taang Nang Lian Thang, USA

 

 

  • comments