Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

Zomite le Zubilee

DSC00246‘Jubilee Pawi’ pen Judahte pawi ahi hi. ‘Jubilee’ cih kammal pen Hebia kam ‘yobel’ pan-a hong pai hi-a, ‘tuu tal,’ ahih kei leh ‘tuu kii,’ cihna ahi hi. Tua hi-a,Jubilee kum kipat-in tuu kii mut uh a, a mut uh ciangin sawtveipi awi-in gingsak deda uh hi. Judahte in kum 7 sungah a kum 7-na pen Sabbath kumin ciamteh uh a, Sabbath kum 7 vei khit ciangin Jubilee Pawi a bawl uh ahi hi. Sabbath kum 7 vei cih pen kum 49 hi pah a, a kum 50-na lian pen Jubilee kum ahih manin kum 49 a bei khit, a kum 50-na ah Jubilee Pawi a bawl uh ahi hi. Tua hi-a Jubilee khatvei a kibawl nak leh kum 50 a bei pahpah ahi hi.

Jubilee tawh kisai a thukhun pawlkhat en le hang Jubilee kumin lokho lo ding,  leitang tawlngasak ding; Na zong semlo ding, kum khat sung pum om ngiat lel ding uh, cih kimu thei hi. Tua banah Israelte khempeuh, mihau mizawng, sila to, numei pasal a vekpi un amau gam/mun ciat ah ciahkik ding uh hi (gamdangmi silate bel neisuak thei uh). Innmun logam a zuaksa teng uh zong kipiakik ding a (kulh sung lam-a inn kizuakte a kitatkik zawh kei leh kitangsuak thei. Ahi zongin Levi mite innte bel kitangsuak theilo), kua mah in tangsuak theilo ding hi. Banghang hiam cihleh Pasian in Israelte leitang pen keima gamh ahi hi, ci hi. Tua ahih manin innmun logam, sila nasem, cihte a kilei uh ciangin Jubilee kum cianga piakkik ding ngaihsutna tawh kilei uh hi – Jubilee kum a tungbaih ta ding ahih leh tawm man; a tunhak lai ding leh tam man,.. cih dan!

Tua hi-a, Pasian in ami Israelte Jubilee Pawi a bawlsakna pen mihaute in mizawngte’ inn le lo khempeuh a ngahmang loh na ding uh leh zawn man-a sila a suakte zong sila a suah tawntung loh na ding uh ahi hi. A tomin ci leng mi khempeuh in kum 50 ah khatvei ta, a thak-a kipatkik khuan a ngah na ding uh ahi hi. Mihaute ahi-a, mizawngte ahi zongin khatvei a kipatphatkik na ding uh ahi hi. Mihaute in a beisa kum 49 sunga a ngah uh innmun logamte piakik ding uh a, silate zong a innkuan ciat uah ciahsakkik ding uh hi. Mizawngte in a innmun logamte uh ngahkik thei ding uh a, sila hi nawnlo ding uh ahih manin a thak-in khatvei kipanphakik thei ding uh hi.

LST Lui hun lai-in leiba nei khat in a leiba a loh zawh kei leh a innmun logam kilaksak thei-a, amah ngiat zong sila suak thei hi. Tua bangin kikoih suak hi leh mihaute in innmun logam khempeuh ngah mang ding uh a, mizawng khempeuh sila suak mang ding uh hi. Tua hi-a, Israelte lak ah Jubilee Pawi a kici om kei leh Egypt gam-a a saltaan mah bangun mizawng teng saltang ding a, mihaute hau semsem in thuneihna khempeuh ngah ding uh hi. Leisung tokikte in bangci uh hiam cihleh tua hun lai-in mihaute le mizawngte kideidan lua hi. Mihaute tuam om uh a, mizawngte zong tuam om uh hi. Mihaute innte gol thei mahmahin hoih thei mahmah a, mizawngte ahih uh leh veng tuam ah kikoih khilkhial-in a innte uh hoih vetlo hi, ci uh hi (De Vaux, Ancient Israel).

Kamsang Isaiah in bangci hiam cihleh mun awng a om nawnloh donga inn khat le inn khat a zomte, lo khat le khat a gawmte in gimna thuak ta uh hen, ci hi (5:8). Mun nuam ah a tuam-a teng mihaute a genna ahi hi. Kamsang Amos in zong, ‘thumaan mite ngun tawh khek uh a, mizawngte khedap kop khat tawh khek uh hi, ci hi (2:6). Mizawng khat le khedap kop khat - a manphatna uh a kikim hong suak mawk hi. Hih bangin gamta thopthop uh ahih manin Pasial teeltuam mi khat, a mit nauta banga a it-a akep Israel mi khat pen a sum neihloh manin khedap kop khat tawh hong kikim ta hi. Tua ahih manin Jubilee pen a kisam mahmah khat hong suak-a, a kisapna dung zui-a Pasian in a piak ahi hi.

Ahi zongin Judah siapite’ laiciaptehna ah Babylon saltaanna pan a ciahkik khit ua kipan kua mah in Jubilee bawl nawnlo uh hi, ci hi. A khangtangthu ciaptehna khat bang uah kum 7-a khatvei ta a neih uh Sabbath kum nangawn – a saltaan ma limun nei nawnlo uh hi, kici liang hi (Gordon Wenham, Leviticus, NICOT). Zeisu hun lai-in Jubilee bawl cih bang kimu lo a, pawlpi le Jubilee ahih leh a kisaina om vetlo hi.

Tua ahih leh ei Zomite leh Jubilee i kisai hiam? Thu-um mite leh Jubilee i kisai hiam? I bawlbawl Jubilee pawi tuamtuamte en pak le hang - kum 10 cinna Jubilee, Kum 20, 25, 30, 40, 50, 75, 100 cinna Jubilee cih khawng ahi hi. Kua pat masak ai tam? Kua hong hilh masak ai tam! A min bel thupisak ve hang in, a Jubilee tawl-omna, Jubilee suahtakna, innmun logam kipiakkikna, cihte peuhmah thulak ah hel vetlo lai hi hang. A Jubilee min bek mah i la a, a dang khat beek i la kei hi. Jubilee thukhun khat beek i zui kei a, zong i zuihsawm kei hi. Zuih dinga hong kipia ahih loh hang zong hi kha ding hi. Ahi zongin banghangin a min thupisak sese ihi hiam? Banghangin Pastor-te khatvei beek letsong pia ngam ngeilo pi-in Jubilee bawl na ding tulza tampi pammaih sa lo ihi hiam? 

Mission sep zawhna ding innkuan in thungen ngeilo napi, bang hangin Jubilee bawl zawhna ding antang in thungen liang i hi hiam? A kisam bangin sa ne zolo napi hangin, bang hangin gaih zawhloh zah dongin Jubilee sa go ziahziah mawk i hi hiam? Pasian hong piak nasep ding tampi sem lo napi hang in, bang hangin Jubilee bawl khin peuh leng lungkim lua kisa-in singam liang ihi hiam? Khawmpi khawngah Pasian thugenna, lasakna, thunget na ding hun manpha tampi, banghangin Jubilee thu le la tawh khek mawk ihi hiam? Pasian thu a kigen ziahziah ding kim lai, banghangin mimawhte kiphat niloh-in nitumsak mawk ihi hiam? I gamtatzia tampi ngaihsut phat huai mahmah hi.          

Zomite pen mualsuang phut nuamte, min deihte, a khang/lian masa kei hing e, a cinuamte ihih man-a hi banga gamta hi kha thei ding hi hang. Pawlkhatte in Topa hong makaihna lungdam ka kohnop man hi, Topa hoihna mualsuang ka phuh nop man hi, ci-in Topa paulam hi hang. Jubilee min paulamin sial/gan tam gozo i kidem laidep hi. Jubilee min pua se lo-in lungdam koh theih na ding lam tam mahmah ahih leh Jubilee min pua-a i sep i bawl, i zat sum le paaite, i gim i tawlna, i hun manphate ngaihsut phat huai kha ding hi.

By: Lian Muan Kim, PhD (Columnist of Tongsan Media)

  • comments