Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

Beel Pawl Gam Kigawmkhop Ni (Union Day)

16730128 1577974058885258 4246489355012163088 n Mikang gamkekte khutnuai ah a om ahi Kawlzang a om Kawl minamte le a kimkot khamtung gam aa om mualmi makai (tangmite) mailam gamvai kalsuan zia ding tawh kisai 1947, February 3-12 sungin kimuhtuahna nei ngeingai uhi. Tua kimuhkhopna tungtawn in 1947 Feb 12 ni’n Shan State, Panglong khua ah thukimna suaihkaihna (Kawl le Khamtungmite kikal) ah nei uh a, tua ni pen Beelpawlgam ni (Union day) ci’n kiciam teh hi.

Hih khawmpi pen Tangthu siam pawlkhatte in anihveina Panglong khawmpi na ci uhi. A masa Panglong khawmpi pen 1946 in Shan ukpite vaihawm kimuhkhopna hi in, Kachin gam le Zogam panin tangmite a vel (observer) in kihel uhi. Tua hi a Tangthu siamte in 1946 kum Panglong khawmpi pen ‘Panglong seminar’ ci uh a, 1947 kum aa pen ‘Panglong Conference’ ci’n ciamteh uhi.

Bang Hangin hih Khawmpi Kibawl? 

Hih khawmpi pen Gen. Aungsan le British PM Mr. Atlee te kimuhkhopna pan aa hong piangkhia ahi “Aungsan-Atlee suaihkaihna” panin a hong piangkhia ahi hi. Kawl tangmite in Mikang gamlianpi thuneite tawh London khuapi ah akimuhna uh ah “Kawl gam in Mikangte kiang panin suahtakna ngah ma deuh hun kikal sungin Kawlgam thu vaihawm Vuankyi pawl ah Khamtung gamte tawh kisai tanu (vuankyi) khat koih ding ngetna nei uhi. Mikangte in hibang dan in Khamtung mite vai ah amau theihloh pi in vuankyi khat koih ziauh pen amau mailam thu amau palo in thakhat thu in a khentat sak ihih loh ding thupi hi ci’n dawngkik uhi. Hi thu hangin Khamtung mite ngaihsutna diktak in theih nading in Aungsan-Atlee suaihkaihna sungah

“Ukna ki-ap ma le ki-ap khit hun kikal sungah note in sangzo ding i ci a na up uh Kawl gam vaihawm pawl (Myanmar government) te tawh kikop in vaihawmna zia ding tawh kisai in note muhna, ngaihsutna te genkhiat theih nading in kha thak sungin akibawl ding ahi Panglong Conference ah ahizong, (ahih kei leh hivai tawh kisai in a kituam bawl khawmpi ah ahizongin Khamtung gamte aa om mite makaite, tangmite dongcian ding” “Khamtung gamte le vuankyi te uk ahi Kawlgam pen tua munte aa om, a teengte' suakta tak aa thukimna tawh a sawtlo in kigawm thei ding hi ci’n Mikang kumpi pawl le Kawl tangmite kikal ah thukimkhopna ngimna pi om hi.” ci’n kihel hi.

Tua hi aa Zogam, Kachin gam cihte panin tangmi dingte Panglong khawmpi ah sawl na dingin 1947, January 11 ni’n ukpi, thuneite tungah sikkhau kisat kawikawi hi. Tua mah bangin Aungsan-Atlee suaihkaihna, thukimna te et/ vel kholh theih nading in January 29 ni in tangmi pai dingte tungah kikhak hi ci’n kiciam teh hi.

 

Panglong Khuapi ah Kituah Ngeingai Ta: 

Kachin makaite Panglong khua ah 1947, Feb 4 ni’n tung uhi. Tuani mah Shan ukpi Saik Shwe Taik makaih tangmi 5te in Kachin makai te va kimu uh a, amau geelkholh sa thusunte kikum uhi. Tua bek hilo in Kachin makaite khutsungah Shante in amau ngaihsutna te a gelhna uh laidal khat pia uhi. Shan ukpi te in ahih leh a sawtlo aa asuakta ding ahi Kawlgam tawh suahtakna la khawmlo in, gam khat in tuam din in Mikang te phal ahi Dominion ukna tawh ki ukna vaihawm ding cih ahi hi.

Shan le Kachin te kikupkhop a mansiang ni Feb 6 ni nitak lam in Zogam palai/tangmi te Panglong khua ah hong tung uhi. Panglong Conference sim dingin a pai Zo suan pupi te in Falam, Tedim, Haka khua te pan Pu Hlur Mung, Pu Thawng Za Khup, Pu Kio Mang te ahi uhi. Tualo Zosuan tangmi khat kihel lai pen Siyin Council le Chin Leader’s Freedom League tangmi Pu Vum Kho Hau ahi hi. Zogam tangmi te in Kachin le Shante kikupna thute encian uh a, tualo a dang thute behlap beh dingin ngen uhi. Tua te in:

1. Gambup siah tawh kisai in Shante tan bangin Kachin le Zomi (Chin) te in zong mimal phazah tawh kizui in ka deih uhi.
2. Zogam ah zatding sum a kicin kei leh Gambup siahkaihna te pan piaksak ding
3. Shan, Kachin le Zomi (Chin) tangmite kihel Khamtung mite kipumkhatna council phuat ding leh tua council in Kawl thunei te tawh kizopna ah thukhentat theihna ukna nei ding uhi.

 

Hih Thu thum teng Zogam Tangmi Pupi ten Thukimna Suaikai ( Sign): 

February 7 ni ciangin U Ciapuh, Maipon ukpi Sak San Thun, Sama Duwa SinWaNaung, PanHoh Duwa Zaw Lun, Pu Hlur Mung le Pu Thawng Za Khup te kihel subcommittee phuan uh a, tua in Mualmi te aitang dingin Kawl makai Gen. Aungsan te tawh kikupna ah thusung ding sub-committee ahi uhi.

Hi bangin Khamtung gam makaite thukikupnate in Kawlgam tawh kigawm khopna ding lam puk zaw ta hi. 
“A zenzen in hi teng kikupna ah ki beelpawl lo in, tuam din ciat ding thukim ciat bang hi le uh, Kawlgam tangthu, tulaitak aa i gamlim mahmah zong pen a kikhel/a tuamdang in a hong pai ding dinmun ahi hi.

Mikang kumpite in hih Panglong khawmpi ah akah dingin Arthur Bottomlay hong sawl uhi.

Kawl makai Gen. Aungsan le apawlte Feb 8, intak lam nai 8 in Panglong khua ah hong tung uhi.

 

Zaang le Kham Makaite Kikupna Kipanta:

1947, Feb 9 ni-in Shan, Kachin, Zomi (Chin) makai te kimuhkhopna nei uh a, tua khit ciangin Kawl makai Gen. Aungsan tawh hong kimu uhi. Gen. Aungsan in tua kimuhkhopna ah hih anuai aa bangin na gen hi. “Kawlgam aa om minam tuamtuam te kipumkhat theih nading deihna tawh London khua aa Mikang ulian te tawh kimuhkhopna ah no khamtung gamte vai tawh kisai ka kikupna te uh hong genkik ding in a hong pai ka hi hi. Kawlzang hileh suahtakna ngahta hi kici theiphial ta hi.

Ahi zongin no Khamtung gamte cian lai mawk hi. Khamtung gamte zong suahtakna apiak pah kei leh Kawlgam ii suahtakna pen a mawkna pi hilel hi ci’n ko Kawl minam tangmi te in London ah thu ka sung uhi. Khamtung gamteng Mikangte in direct in a uk uh pen ko Kawlte in hoih kasa kei uhi. Khamtung gamte pen khamtungmite mah in a uk ding uh ka deihsak uhi. Kawlzang in suahtakna a ngah phet mahin Khamtung gamte in zong suahtakna a ngah pah ding ka deih uh hi. Hi bangin kong genciang in Ko Kawlte in Khamtung gamte hong ukcip gawp nuam ka hi kei uhi. Kawl te tawh kibang in no Khamtung mite zong liangko kikim in thupha hong musak nuam ka hi zaw hi.”

“ Mivom ahi a, mikang ahizong in kuamah lau ding hilo hi. A zenzen in amaute in no khamtung mite hong dot uh ciangin suahtakna ngah nuam mah ungh na ci un. Hong lauthawn hang lau kei unla hong zol bawl uh hangin nem pah kei un. Khamtung gamte in zong Kawlgam bangin akikim hamphatna deih ungh cih ding hiziau hi. Tua bangin na gen uh leh zing ah thai ah suahtakna kici na ngah ding uhi.”

Kikupna hun mankhit ciangin Gen. Aungsan in suahtakna ngah khit ciangin gambup kumpi (president) masa ding pen Shan te hileh hoih lo diam” ci’n a lawmte hong dong hi. Shan ukpi teng na kikum unla no sung pan khat kumpi sem ding na kitel un ci’n zong vaikhakna nei hi. Hi bangin makaite Feb 10-11 dong mah akilam thak ding gam vai mah kikum ciatciat uhi. Lang khat le lang khat kisitna, kidekna tawh om ziahziah ta hi.

Kachin te in Kachin gam kiciantak in ciaptehna ding (Bamaw le Myitkyina, Kata zanggam teng Kachin gam cih sungah hel ding) le Shan te in a hun zui in inntuan khiat theih nading te Gen. Aungsan kam tung mahmah panin kamciamna deih in gen tantan uhi. Gen. Aungsan in amah bek in kamciam pia theilo, Hluttaw ah kikup ding hi cici mah taleh Kachin le Shan te in ci tantan veve uhi. Tua hi aa, Gen. Aungsan bang ciah dingin kithawi man liang hi kici hi. A sawt ciangin U Phe Khin hanciam na tawh Khamtung mite le Kawl te kikal ah kithukimna hong ngahkhia uhi. Kachin gam ciapteh ding vai pen a thu in thukim in, Hluttaw ah akcian in gamgi vai kikum ding. Tua kipawl pan inntuan nuam pah malen ding cih pen hitheilo himah leh, a thu in thukim pih in Hluttaw ah kikup beh ding cih ciangdong in Kawl makai Gen. Aungsan in a thu khiamsuk hi.

 

Zomite Na Lawp Lua Pahpah: 

Zogam tangmi in akah Zosuan pupi te in Zogam (Zo/Chin State) kician takin ciapteh nading/ngah na ding sangin Zo khamtung gam sung sumzekna ah huhna pen Mikang hun lai sangin a kicing zaw in ngah zawk nading, Sumzonna, Pilna lam, Cidamna lam le tangsung tangta khantoh nopsak ding te aading in Kawlgam panin huhna ngah na ding le Zomi galkap pawl (Chin rifle/battalion) te a ngei bangin a kipsuak na ding cihte ngen uhi. Pu Vum Kho Hau le Gen. Aungsan amau nih geel kihona ah zong thu tampitak thukim khin tuak uhi. Zogam (Chin State) vai ahih leh suahtakna ngahkhit ciang Hluttaw ah kikup aa khentat dingin thukim uhi. Tua hi aa Zogam tangpi te le Kawltangmi te kikal ah thukimna om khinta ah sign tup ding bek in a sam lai ahi hi.

Hi thu tawh kisai in Pu Vum Kho Hau in Shan Ukpi khat ahi Maipon ukpipa Sak San Thun a gen ciangin Ukpi pa in no Zomi makai tangmi te khattang in na lenkhia in thukimna letmat thu huai lo hi. Kachin te tawh kihel khopna meeting/kikupna ah hi thu sung zaw un ci’n thuum bawl ahih manin Shan le Kachin te ngak in Zomi tangmi te a om litlet khinta uhi. Hi bang dan thu teng tawh Feb 10 ni nitak lamin thukimna a hampi (draft) ngah ta uhi. Feb 11 ni zingsang lam Gen Aungsan in thusunna nei in, nitaklam ciangin gambup sumzek zia, ukna zekzia dan ding Khamtung tangmi te in dongh uh a, Gen Aungsan le U TinThuht te in dawnkikna nei uhi. Sumzekzia ah Khamtung gamte in Mikangte hun lai aa sangin sumlom tam ngahzaw ding ci’n kamciam kiptak in pia uhi. Tua zawh ciangin thukimna a huampi a laimal pawlkhatte laihna nei uh a, Feb 12, ni thumni (Wednesday) in thukimna suaihkaihna neih dingin khentat uhi.


Nitak Ankuang Umkhopna: 

Feb 11 ni nitak lam in, gualzawhna nitak ankuang umkhopna nei uhi. Tua mun ah Kachin, Karen, Chin (Zomi), Shan le Kawlte in kikal ah kimuhkhialhna kitelkhialhna nei mah tale hang tu in hileh tua bangte om nawnlo hi. I vekpi aa ding in ih mai ah hamphatna, suahtakna in hong ngak hi ci’n Shan ukpi pa khat in thukong honna hong nei hi. Gen. Aungsan in zong thugenna nei in, tua khit ciangin British gam tangpi Bottomlay, American tangmi Mr Packup, Sama duwa SinWaNong, U HalPhe, Pu VumKhoHau, Sak Shwe Taih, Sir Mawng Kyi le U Tin Thuht te in thugenna tomno tek nei uhi.

 

Panglong Thukimna Suaikai Ta:

1947 feb 12, nithum ni nai 11am hun in Gen. Aungsan, Kachin tangmite, Zomi (Chin) tangmite, Shan ukpi te tangmite le Shan mipite tangmi te in thukimna letmat tumta uhi.

Panglong thukimna laipi/thu(8)

1. Mual mi palai khempeuh Supreme Council of the United Hill People (S.C.O.U.H.P) thukimpihna tawh kumpipa in adeihlak khat pen mual gamte tawh kisai kumpipa thudotpi hi ding hi.

2. Tua kumpipa thudotpi pen zum vaipuak neih man hi loin Governor’s Executive Council ah member hisa hi ding a, gamdang vaite leh galkap lamah thukhun om bangin E.C thuneihna nuai ah lut ding hi. Tua mah bangin mual gam vaisainate ah zong vaihawm theih nading thuneihna nei ding hi.

3. Tua kumpipa thudotpi pen minam kibang lo adang nih in huh ding hi. A bulpi ah tua mi nihte in amau tawh kisai gam leh minamte vai sai ding uh a, thudotpipa in mual gam vai khempeuh hawmin thukhun om bangin na asep khop hun uh zong om ding hi.

4. Thudotpipa pen mual gam palai om sun hi mah ta leh a huh mi nihte zong amau gam tawh kisai thute kikup ding a om ciangin Gambup E.C thukikupnate ah kihel ding uh hi.

5. A tung a thukimna om bangin Gambup E.C in vaihawm ding hi mah ta leh mual gam sung ki-ukna leh vaihawmnate ah tu a a suahtakna uh pen them khat zong nawngkaisak lo ding hi. Mual mite’ ki-ukna leh vaihawmnate ah za ah za thu a neih ding uh kithukim hi.

6. Hih gampi khat sungah Kachin gam pen gamgi bawlin kituam uk ding thu ah Hluttaw in a khensat ding ahih sam hangin hi bang a atuam om ding pen hoih kisa hi. Kum 1935 Burma thukhunpi om bangin hih tawh kisai thu ah thudotpipa leh ahuh nihte tawh Myitkyina leh Bhamo District sung ki-uk dan tawh kimematin kikum khawm ding uh hi.

7. Mual mite in democracy gam mite’ ngah ding suahtakna leh hamphatna bulpite ngah peelmawh ding uh hi.

8. Hih bang thukimna sungah Kawlte siahpiakna pan Kachin leh Chin Hills te ngah ding sum le paite kipelhsak lo ding hi. Kawl gam leh Shan gamte mah bangin Kachin leh Chin Hills te zong sum le pai kivaipuaknate ah bangci ciang hi zo ding cih pen Gambup E.C in thudotpi leh ahuhte tawh encianin kikum khawm lai ding uh hi.

 

Suaikai (Letmat) Mekna Nei Teng:

1. Gen. Aungsan (Kawl) 
2. Sak Khun Pan Seng (TawngPai Sawbua, shan)
3. Sak ShweTaih (NgiauShwe Sawbua, Shan) 
4. Sak Hong Phah ( TeinNi leilulam Sawbua, Shan)
5. Sak Nwew (LeChia Sawbua, Shan) 
6. Sak San Thun (Maipon Sawbua, Shan)
7. Sak Thun Aye (TaMaKham Sawbua)

8. U Phiu (Tathong Sawbua tangmi)
9. U Khun Phong (Shan mipi tangmi) (Haw Wa Duwa) 
 10. U Tin E (Shan Mipi tangmi)
11. U CiaPuh (Shan Mipi tangmi)

12. Sak Yein Pha (Shan Mipi tangmi)

13. U Thun Myint (Shan Mipi tangmi)

14. U Khun Saw (Shan Mipi tangmi)
15. U Khun Thi (Shan Mipi tangmi) (9)

16. Sama Duwa SinWaNaung (Kachin tangmi)
17. Duwa Zaw Yit (Kachin tangmi) (10)

18. U Deng Za Tang (Kachin tangmi)
19. Duwa Zaw Lun (Kachin tangmi) 
20. U Labang Garawng (Kachin tangmi)
21. Duwa Zaw Lah (Kachin tangmi)
22. U Hlur Mung (Zomi/Chin tangmi)
23. Pu Thawng Za Khup (Zomi/Chin tangmi)

24. Pu Kio Mang (Zomi/Chin Tangmi)

 

Duwa Zaw Lah pen damlohna hangin letmat tupna ah amin akihel hangin tua ni kihel theilo hi. Khawmpi sungah akihel Zosuan palai Pu Vum Kho Hau pen tualaitak in kumpi nasem ahih manin tua laitak ah letmat tum kha lo hi. Tua zawh kha khat khit ciangin letmat tum kik hi. Hi bangin Khamtung mite le Kawlmite thukimna suaihkaihna thu pen thukim huai hi ci’n British palai Bottomlay in London ah sikkhau sat in zaksakna nei hi.

Panglong thukimna bang danin Khamtung gamte tanupi ding pen Sak San Thun kiseh pah hi. ahuh ding nih te pen Kachin le Zomi (Chin) te ding ci ahih manin Sama Duwa SinWaNaung le Pu Vum Kho Hau te pen Kachin le Zomi (Chin) councellor council te ah hong kihel pah uhi. Ahi zongin Gen Aungsan kisuam in, U Nu le u Ne Win te hong kahtoh tak uh ciangin Khamtung mite le Kawl mite kikal kamciamsa te tuibua bangin hong mangthang deudeu ziau ta hi.

Tua hi aa, ih gam ah Panglong kamciam pelhna hangin tuni ciang dongin tualgal a hong om ahi hi. A sawtlo in hih kamciamna te tangtun ding in hong kisepkhiat theih nading ei mimal khat ciat i masuan ding le tawsawn ding vaipuak inei hi ci’n ka ngaihsun hi.

 

(Theihsakna; U LaNan Bauk at Panglong khawmpi tawh kisaite Zolai tawh letkik in ei tawh kisai zaw deuhte kilakhia kik ahi hi. Panglong thukimna suaihkaihna thu 8te pen Tedim post tanute letkhiatna pan phalna om bangin kila hi.)

Laigelh:  Tg Nang Khan Lian

Ref; U Lanan Bauk, ‘Kachin pinee phitpawLapong’
Tedim post, 'Panglong thukimna'

Posted: Tongsan Media Group Inc.

  • comments