Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

Zomite' Lungsim Puakzia Ding I Lunggulh Thu

17991172 10211620166247183 3094519247335778180 nSia Kam Khaw Thang a kipan hong nusia sa, Zomi lakah ih mipil, makai tuamtuamte tungtawnin ka ngaihsut theih zel thu pawl khat ih Zomi pihte lakah kong hawmsawn nuam hi.  Kei ngaihsut bangin a ngaihsun kha zong tampi om dingin lamen ing.

 

I minam sungah ki kholh pih zia, ih khan hun leh ih omna mun tawh ki zui-in a theih huai pipi kuamah ih ki theih kim loh hangin ei mi phazah tawh kizui-in mipil misiam leh mi hau zong tampi om khin zo hihang.  Kaamsiatna ih ci ding hiam, Pasian deihna ih ci ding hiam tuate' lakah mihingte' mitmuhna ah a hun cing nailo pipi in lamet loh laitak hong nusia leh Sia Thang dan maha khangcingsa zong hong nusia tampi tak mah om hi. Tua hong nusia sa ih makai, mipilte in kuama phawk loh laitakin a pil a siamna leh a tha neih zah un na hanciam uh a, ih lamet ngam loh zah donga a thupi sepna leh pilna na nei mah uh hi. 

Ahi zongin tua a etteh taak pilna, sepnate pen a sihma, a damlai sangin a sih khit teh ki thei zaw, mipi aadingin ki pholh khia pan tamzaw uh hi. Ahang kan ciat leng ih muhna tuamtuam om kha thei ding hi. Keima mimal upmawhna ah; ih mipil ih makai leh ih mihaute pen hong nusiatma sangin hong nusiat khit teh tha kipia, ki pahtawi, thu kidong nuam, pammaih kisa pan zaw in ka mu hi.  Tua banah a misipa leh a pahtawi nuam pan leh a huh nuam phingte aadingin zong phattuamna om nawn in zong up huai khollo hi.

Paunak Lai Siangtho a lian sawm, a neu nga sungah; "A hun-a an a lapa mipil hi a, an lak hun-a ihmu-pa in maizumna a ngah hi." a cih mah bangin a hun lai a, tha ki piakna leh pahtawina in phat tuamna hong pia zaw tham ding hi.  Ih sih cianga ki pahtawi zah in ih dam lai in ki panpihin ki pahtawi zo leng phattuamna tampi om zawkan lai ding hi.  Pasian huhna tawh ei Zomite zong ih cihmawh luatna panin Pasian in hong phongto a, tu in tagah nawi muh bangin nuntakna tampi ki lamdangin ih lungsimte zong ki lamdang hi.  Nidanga ih ngaihsut ngei lohte zong ki ngaihsun kha in, pau ding zonga ih ngaihsut ngei lohte zong ki pau khial kha thei hi.  Zomite khan tohna ding ih manawh laitakin ih mipil ih mi siamte, ih mi haute, ih makaite thadah nading kammal leh lai peuh suangtat sat ngam, ak eek lawngngam banga ih gelh khak loh ding thupi phadiak hi. 

 

Kuamah ih kihuh zo kei zongin ih kammal leh laigelhna hang peuh tawh ih makaite leh, mipilte, mihaute ih thadah sak khak loh ding kidop huai hi.  Mi thupi ih sak hat pen a sih ciangin ih pahtawi nop leh a dam lai in zong ahithei banga pahtawi kholh theih ding thupi mahmah hi.  Ih mipilte leh mihaute in a dam sungin a hih theih tawp un Zomite' aading ma hong pan ding uh lampi khak lo in hon sak den ding hanciam ni.

 

Imipil leh mihaute in zong ih mite omzia leh thanemnate theih siam a, ih nuak , ih thangpaih lak het loh ding pen ciimna leh mipi cing hihna zong mangngilh kei ni. Khangnote leh ngaihsut kholh theihna a neilo khat leh nihte' laigelh, kampau peuh tawh na ngim na tupna, Zomi te aading na deih saknate thakiam sak het lo in saipi banga, na kalsuan ciatciat ding a thupi ahi hi. Nasepna thupite a ki khaktan theih nadingin makai thupite ki khaktan masak ding Satan vanzat lian pen ahi hi. Satan molhtumte lakah a ki zangthei kim pen leh a gualzo pente in; Ki phatsakna, Ki hazatna, Thumaan lohna, Angsung bek khualna, Hun tomno sung bek khualnate a kipan a tuamtuam tampi omlai hi.

 

Ahuampi in gen ni cileng, Zomite a tamzaw pen, mipi aading khualna sangin aituam kikhualna ah minam dangte sangin muibun zaw hihang.  Ahi zongin a tawpna enleng, Kawlte' pauciin khat om ngei mah bangin; "Mi tampi aading a semte in ama aading lawhcing hi"  cih pen ih ngaihsut ding thupi hi. Leitung mipite lakah khat ahi, sisan luan kullo a, suahtakna a lathei India kumpi, Mahatma Gandhi kammal namnga te: (1) Na ngaihsutna(your thought) kidawm in, na kammal in zui ding hi.(2) Na kammal(your word) ki dawm in, na gamtatna in zui ding hi. (3) Na gamtatna (your behave) ki dawm in, na zongsatna in zui ding hi.(4) Na zongsatna( your habit) kidawm in, na manphatna  in zui ding hi. (5) Na manphatna (your value) kidawm in, Na tawntung mun ( your destiny) in zui ding hi.  

Hihte pen Lai Siangtho a hih loh hangin mihing nuntakna ah a ki pelh theilo thuman thutak vive hi a, ih upna or ngaihsutna leh ih tawntung mun ding a ki zom paisuak nahi gige hi. Tawmvei sung ki mang ding bek ih ngaihsut leh a tawpna ah tua mah hipah dinga, a tawntung aading ih ngaihsut leh tua mah hong hipah ding hi. Zomite ih khantoh nading ngaihsun kawmin ih tawntung mun ding vangam zuatna zong ih ngaihsutna tungtawn mahin hong tangtung ding a, ih vawh bang khaici ih at ciat ding hi. (Gal. 6:7-10) Hih lai nong sim sak ka lungdam hi.  A hoih lama lak siam dingin Pasianin thupha hong piakim ciat tahen.

By: Rev. Mang Khan Khup, Canada

  • comments