Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

David Zong A Laam Ve!

DSC00246David zong laam hi! Hong nawngkaisak kei un. Nong zahpih vial uh leh Michal in hamsiatna angah bangin na ngah kha ding uh hi, cih vive tawh i kidawng hi. Kam tungnun kituhin pawlkhatte in, David a guaktangin laam hi ven; David banga laam ding na hih uh leh na guaktangun laam un, ci-in dawngkik leklek thei uh hi. Hih David laamna tawh kisai ciinpi-in i nei a, kidalna leh kikapnapi khat-in zong i nei hi. Ahi zongin David a laamna thu Laisiangtho in hong bangci gen taktak hiam, cih a sim kitawm mahmah vetse hi.

 Bang Hang David Lam Hiam?

Moses hun lai-a kipan Pasian in a mi Israelte a ompihna pen Thukham Singkuang tawh lak hi. Hih Singkuang a omnana ah Pasian om a, Pasian tawh a kimuhnop uh ciangin hih Singkuang omna ah hong pai uh hi (Exo 40:34-38). Eli hun lai-in, khat vei, Israelte in gal hong lel uh hi. Pasian Singkuang tawh galkuan le hang zo ni, cih ngaihsutna tawh galphual ah Singkuang hong pua uh hi. Ahi zongin Pasian in a thukhenna-a gal a lelhsak ahih manin Singkuang a puak uh hangin gal zosak tuanlo hi. Tua bang teng tawh Singkuang pen galte khut sung tung hi.

Khatvei Singkuang sung en kha uh ahih manin Pasian in mi 50,070 that ek hi. Tua ciangin Singkuang pua ngam nawnlo uh ahih manin Abinadab inn ah nusia uh hi. Tua tengah kum 20 sung nusiacip uh ahih manin Israelte lungleng mahmah uh a, Pasian phawk mahmah uh hi (1 Sam 6:19-7:2). Singkuang a om kei leh Pasian ompihna zong ngahlo uh!

Kum 20 khit ciangin David in a mite lakah a muan pen mi 30,000 telkhia a, Singkuang la dingin Abinadab inn ah hong kuan uh hi. Singkuang pua khia uh a, a paipih kawmun nuam lua mahmah uh ahih manin music tuamtuam tumin la sa kawm uh hi. Tua leh, Nacon buhcilna mun a tun uh ciangin Singkuang a pua bawngte kituk uh ahih manin Uzzah in Singkuang va len phei vat kha hi. Tua ciangin Pasian heh ahih manin tua lai munah Uzzah that pah hi. David in hih thupiang a muh ciangin Singkuang pua ngam nawnlo a, Obed-Edom inn ah nusia-in ciahsan phot hi (2 Sam 6:1-10).

Obed-Edom inn ah Singkuang kha 3 sung om pan hi napi Pasian in Obed-Edom leh a innkuanpihte, a neihsa khempeuh zong thupha pia hi. Tua thu a zak ciangin David hong kithawikik a, Singkuang puakhia-in David Khuapi ah lungdam tak-in lutpih hi. Singkuang puate in kalguk a suan simun bawngtal le bawngno go-in biakpiakna pia uh a (kal masa kal 6 a suanun biakpiakna pia, tua zawh pia nawnlo, aci zong om), David Khaupi ah hong lutpih uh hi. Tua ciangin David nuam lua mahmah ahih manin TOPA mai ah a tha neih khempeuh tawh laam hi (11-14). Tua hi-a, David pen Singkuang a tun ciangin nuam lua mahmah-a laam ahi hi. Banghang hiam cihleh Singkuang tungkik ta, cih pen Israelte aa dingin:- 1) Pasian in ompih kik ta, cihna hi-a, 2) Pasian ompihna bek hilo-in Pasian thupha zong kingah ta ding (Obed-Edom in Singkuang hangin thupha ngah), cihna ahi hi.

David Bangci Laam Hiam?

David laamna pen nihvei lian bek kimu thei hi – 2 Sam 6:14, 16 ah. Hih tenga ‘laam’ cih kammal pen hih mun tegel bek mahah kizang a, Laisiangtho sung koimah dangah kimu nawn lo hi. David pen a laam mawkmawk ciangbek hilo-a, laam le dian a thuah ahi hi. A tawndian zakzak-a laam hi a, a thaneih khempeuh tawh a laam ahi hi.

David A Guaktang In Laam Maw?

David pen a guaktanga laam hi peuhmah lo hi. 2 Sam 6:14 ah bangci hiam cihleh, David in saihadial siampipuan silh hi, ci hi. LST i et ciangin saihaldial siampipuan nam 3 om hi:- 1) siampite silh (1 Sam 2:18), 2) siampi lianpenpa’ silh (Exo 28:1-31), leh 3) siampite banga Pasian mai ah a siangtho na khatpeuh hih ding cianga a silh uh (2 Sam 6:14), cihte ahi hi. Tua hi-a, David in a kumpipuan suahkhia-in saihadial siampipuan a silh ahi hi.

A guaktanga laam, cih kammal pen koi pana hong pai ahi hiam? Saul tanu Michal kam pan-a kiza ahi hi. Hih tengah Michal pen David zi, ci-in khatvei beek kisam lo hi. A min 4 vei sitset kimu a, Saul tanu Michal kici den hi (6:16, 20, 21, 23). Michal in David laam-a, dianga om a muh ciangin a lungsim sungah zahpih hi. Banghanga zahpih hiam cih leh (1) David in a kumpipuan silh lo-in siampipuan silh zaw hi (Michal muhna ah David pen kumpi khat banga om lo), (2) Kumpi to tak a thaneih zah tawh laam in diang, cih pen tua hun lai-in Israelte sungah ahi-a, mi namdang tuamtuamte lakah ahi zongin a om ngeilo thu khat ahi hi, (3) Michal in David pen ama pa Saul tawh tehkak thapai dan hi. A pa thupisa lua ahih manin David pen Saul banga a omloh ciangin a zahpih hi kha ding hi. A pa mah thupisa lua lai ahih manin Michal pen David zi,kici lo-in Saul tanu kici tanghtangh se hi. Tua banah David in zong Michal kiangah na pa’ tanga kumpi hong suaksak TOPA mai-a laam ka hi hi. Na pa tawh hong tehteh ken, a ci hi mai hi (6:21).

Tua hi in, David siampipuan silh-a a laam pen Michal muhna ah a guaktang-a laam zah phial-a a zumhuai ahi hi (kumpipuan thupi sa lua aih cianga kumpipuan a silh loh teh guaktanga om zahin zumhuai sa). David hong ciah ciangin lungdam lua mahmah sa-a hong ciah hi na pi, a innkuanpih teng zong thupha pia ding a cih hi napi, inn hong tun ciangin Michal in zahpih nuam lua hi ding hi ven, na dawntuah pah lian hi – Israel kumpipa a guaktanga laam, nasia tham ey ... va ci dep hi. Hih tenga ‘guaktang’ cih kammal pen ‘kihong,’ kituam lo’ cihna hi a, ‘guaktang’ cih pah tentan ding zong hi khin lo hi. Michal muhna ah David in kumpipuan a silh loh pen puansilh lo zah-a a mu hi lel hi (6:20-23). LST in David a guaktanga om hi, cilo hi. Michal in a zahpih luatna-a a cih hi lel hi. Kumpipuan a silh loh hang hi lel hi.

David Laam, Ei zong I Laam Diam?

David laam ahih ciangin ei zong laam ni, icih leh hih bang LST khiatzia pen a dahhuai penpen khat ahi hi. Hih bang LST khiatzia pen ei bek ih neih hi kha mai ding hi. LST khiatzia nam tuamtuam lakah hih ei LST khiatzia (David laam ahih manin ei zong laam ni) kihel khalo a, hun khatpeuh ciang hong kihel phial le zong LST siamte’ hel hilo ding hi. LST siamte in hih bangin LST khia ngeilo uh hi.

Ngaih sun pak leng – David laam ahih manin ei zong laam ni, icih leh David mi zi sut ahih manin en zong sut ni, ici thei diam? Noah in lenggah zu kham ahih manin en zong kham ni, ici thei diam? Samson in Khasiangtho a ngah ciangin hat mahmah hi, ei zong Khasiangtho i ngah ciangin hat mahmah ding hi hang, ici thei diam? Saul in Pasian thu a man loh ciangin Khasiangtho in taisan hi, ei zong Pasian thu i manloh simin hong taisan ding hi, ici thei diam (Kua in Khasiangtho nei zo mawk ding hiam?) Tangthu pen tangthu hi-a, thukham pen thukham hi. Theih lel ding thu om a, zuih ding thu om hi. Thuciam Lui le Thuciam Thak, Israel le Pawlpi, Judah ngeina le Thu-um mite tatzia ding, cihte i khen kei leh Tapidaw maan taktak i suak thei kei ding hi.

Laam Ding Maw, Laam Lo Ding?

I laam leh, David laam ahih manin ei zong i ut bangin laam ni, cih ding hilo hi. Miriam le numei khempeuh laam uh ahih manin ei zong laam ni, cih ding hilo hi (San Tuipi a kantan khit phet uh). Jephthah tanu laam ahih manin ei zong laam ni, cih ding zong hilo hi (galzo-a hong ciah laitak). Moses mual tung pan a kumsuk ciangin Israelte na laam ngeingai uh hi – ei zong laam ni, cih ding hilo hi (bawng milim kimkot-a laam uh). Ahi zongin laamna tawh TOPA phat un, ci ahih mana laam hi zaw ni (Ps 149:3; 150:4). LST buppi ah laamna tawh TOPA phat un, a cih pen hih mun nih bek ah kimu thei hi. Tua hi-a, laamna pen Pasian phatna leh lungdamlahna nam khat hi lel hi. Pasian phatna le lungdamlah na ding nam tampi om ahihna zong mangngilh kei ni. Laamna tawh a kikhami zaw hi tuanlo a, milim biakna ah zong kilaam ahihna mangngilh kei ni. A laamlote Khasiangtho ngah lo, cih bang zong hilo hi. Khasiangtho a ngah cianga laam, cih pen LST mun khat beek ah kimulo hi.

Thuciam Thak sungah laamna mun nih bekah kimu thei hi:- 1) Pawibawl-a laam: tapa taimang a tun ciangin laam uh (Luke 15:25), 2) Birthday-a laam: A laamnu pen Herodias tanu Salome hi-in Pasian theilo khat ahi hi. A laamna hangin bang piang hiam cihleh Tuiphumpa John in ngawng tawnlawh hi. Tua hi-a, Khasiangtho tawh a kidimte, Khasiangtho a kimakaihsakte, leh Khasiangtho gah a gahte ih hihnate i et ciangin laamna kimulo hi.

Thukhupna:

I laam leh Topa mai-a laam hi ni. Phatna le lungdamkohna tawh a laam hi ni. Laamna hanga kikhami zaw tuan hilo a, thupha kingah tuam zong hilo hi (pumpi-a ding exercise i ngahna simloh). I laam kei leh a laamte zahpih kei ni. Pasian in mihingte hong bawlzia kibang lo hi. A gamlum diak, a dai diak, a kamtam diak, kamtawm diak, a nuamna a lakkhia diak, a lakkhia khollo – cih bangin i om hi. Kuakua hi ta le hang Topa sungah a tawntunga i lungdam ding bel hong kisawl ngiat ahi hi (Phil 4:4).

Ahi zongin pawlpi sungah i kalsuan zia ding hong kihilhna ah, Na khempeuh a kilawm a kituak in hih un, hong ci hi (1 Cor 14:40). A ‘kilawm a kituak’ cih ciangin ahi sitset, ahi dimdiam ding, cihna hi-a, hi zilzul gawp lo ding, cihna ahi hi. Pasian bia-a kikhawm ihih manin ‘nightclub’ tawh kilamdang hen! Pasian phat-a khat le khat kihanthawn ihih manin milim pasiante mai-a om khuankhuante tawh kilamdang hen! I theih sitset Pa a bia ihih manin theihloh pasiante bia-a om zilzulte tawh kilamdang hen! Thuciam Thak sungah pawlpi kalsuanzia dingte, kikhopna-a i sep i bawl dingte i et ciangin a diakdiakin thu 4 kimu thei hi: 1) Pasian thu gen/kihilh ding, 2) Thu ngen ding, 3) LST sim ding, leh 4) La sa ding. Hihte banah nekkhawm zong nek zelzel dingin hong hilh hi.

 

By: Dr. Lian Muan Kim, Ph D (President- Koinonia Baptist Seminary & Columnist of Tongsan Media Group)

  • comments