Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

Insein Kidona le Zomite

FB IMG 1511240166739

Myanmar gam in suahtakna ngah khit sawtlo in tualgal piang pah a tuni dong tua tual gal bei siang nailo hi. Hih tualgalte lak ah a minthang pen phial le Myanmar kumpi ading a lauhuai pen ahi Insein kidona ah Myanmar gam hutna dingin Zomi i pu i pate bangzah ciang kipiakhia uh cih thu khangthak ten i phawk kiktheihna ding lunggulhna tawh a nuai abangin hong kisuaksak hi.  


1. Chin Battalion:
  Gamkek mikangte in 1889 pawlin Zogam (Chin hill) hong sim uh a, i pu i pa ten zong a tha neihzah tawh na do uh hi. Ahih hangin galvan le tha le ngal kikimloh luatna hangin guallel uh ahih manin,1894 kum akipan Mangkangte in Zogam (Chinhill) hong uk ta uh hi. Tua ciangin Zogam gam kem dingin Gurkha galkapte tawh Chin Battalion hong phut in Burma Military Police cih minpia uh hi. Tua galkapte pen damdam in Zomite tawh laih uh hi.
Leitung galpi nihna ciangin tua BMP pan Chin Battalionte pen Burma Frontier Force ci-in Japan te'n Myanmar gam hong sim hun ciangin zanggam lam a om galmai ah puak uh hi. Leitung galpi khatna lai in zong Zogam khua kiim phial pan mikhat ciat kaikhawm in, France galmai ah Chin Labour Corp ci-in 1917 kumin phut uh ah France gamah galmai nawk nasem dingin paisak hi.

Tua galpi khatna lai pekin khanglam Zomi pawlkhat Burma Rifles ah lutin Mespotimia (tuhun Iraq) galmai ah om uh hi. 1921 ciangin Zomite tawh No (4) Chin Battalion cih khat phutkhia a,1924 kum ciangin phiat kik in Tedim le khanglam Zomite gawmin, No (1) Burma Rifle le Hakha te No(2) Falamte pen No (3) Rifles cih bangin ah kikhinsak uh hi. Leitung galpi nihna abei khit ciangin Falam khuapi ah Falam le Hakhate gawmin No(1) Chin Battalion,Tedim khuapi ah Tedim lamteng pen No(2) Chin Battalion ci-in phut uh hi. Myanmar gamin suahtakna lakzawh ciangin Chin Battalion 1,2,3, ci-in battalion thum omta hi.

2. Insein Kidona: 1949 January 31 ni-in Myanmar kumpi galkapte le KNDO te Yangon khuapi Insein - Khawaichian le Tamaing kikal tengah kikap uh a, KNDO te'n Seminary hill lam pan pangin do uh hi. 1949 Febraury 1 ni-in KNDO te in Insein zum le District zum kimteng nasia takin do uh a, Febraury ni 2 ni-in KNDO ten thukante zum kim teng lazo uh hi.
Tua bangin Myanmar gambup ading a thupi mahmah gal kidona hong om ciangin Mingalardone bulphuh in Twinthee lam a om No(1)Chin Battalionte in Insein gal maiah panmun la uh hi. Hih No(1) Chin Battalion te'n Khawaichian, Gyukung teng si masa uh a, Yangon khuapi ading a galdalna thupi le mun hoih ahi Sawbuakung tengah phualsat in panla uh hi.

Hih gal kidonate ah No(5) Burma Rifles, No (1) Chin Battalion te' len saklam ah No (2) Kachin Battalion te in munla uh hi. 1949 March kha pawlin Tathon le Mawlamyine galmai ah kuan No(2) Chin ten a battalion bup un a maban uh No(2) Kachin te' tungah ap in, Vanleng tawh Yangon ciah uh a Insein gal maitang ah pan mun la uh hi. Hih mun tengah No(2) Chin te in No (1) Chinte mah bangin panmun la uh hi. KNDO ten Yangon,- Insein le Pyi lampi kikal aa gal panna ding mun hoih tengah pan munla in kigingsa in om uh hi. Amau ngimna in Yangon khuapi la in Myanmar kumpi khia dingin a mau kumpi asem ding uh hipah hi.

1949 kum April kha kipat lamin thukhual Kayin makaite lep tuahna hangin Insein a om Kayin makaite in kumpi tawh kilem na ding thu hong sunna uh kumpite in sang uh hi. April 4 ni-in Kayin makai Saw Ba Uu le Mann James Htun Aung ten Rev. Francis A Mya makai in Isein pan paikhia hi. Kayin makaite a paikhiat akipan kumpi galkapte in kap nawnlo hi. Tua bek tham loin thukimna om bangin, a paikhia Kayin makaite hoih tak kemin hih thu kikup sungin suakta takin thu angentheih na ding un vaihawm sak hi. Tua bangin kilemna ding kam kikup sung kikapna tawlngak sungin Kayin te 200 pawlin kikap khawlna metbawl in thukimna palsat in Insein pan paikhia in a paina uh lampi a om khuate mei tawh halin susia uh hi. April 6 ni-in General Saw Bo Zan in KNDO te galvan khiatna ding thu pen Kumpi galkap pawlkhawm te kiangah ap hi. April ni 7 ni-in Saw Ba Oo Gyi pen Insein lut kikin hong pusuak nawnlo in, kilemna ding thukimna palsat ahih manin April 8 ni-in galkidona kipan kik hi.

Tua gal kidokikna sunga a minthang kidonate in Minn Dhama Kung kidona, Point 312 kidona, Sawbua Gyi kidonate ahi hi. Hih kidonate in Insein kidona gualzawhna ding khentatna apia Chin Battlalion te i a nunung pen galsimna te ahi hi.
U Set taih sanghuang ah phualpi a sat No (1) Chin te in Sawbua Gyi kung a om No (2) Chinte tawh akikal a om Minn Dhama kung le Point 112 te nasia takin sim uh hi. Kinaitak in kikapna ahih manin langnih tuak ah asi, aliam abai tam mahmah hi. No (1) Chin in zo ahih manin KNDO te Insein lamah nung kik uh hi. Tua hun lian mahin No(2) Chin te in Sawbua Gyi kung a omlai KNDO te sim uh hi. Kinai takin kikapna mah ahih manin a langnih tuak in asi, aliam tam mahmah hi. No (2) Chin te in Sawbua Gyi kung khempeuh la khin in Seminary hill sung zong siansuah in BOC lamka dong la uh hi.

1949 April 10 ni-in kidona ah No(1) le No (2) Chin ten Insein lutna a KNDO te galphual te sim khawm uh a, nikhat sungin No (1) Chin ah Bo le nautang 15 si-in,36 liam uh hi. Tua ni mahin No (2) Chin pan galkap nautang 5 si-in 15 liam uh hi. 1949 April 22 ni-in KNU le KNDO te Insein panin nung kik uh hi. Isein nitumna lam panin saklam ah Taunggo a om KNDO te tawh kigawm uh hi. Hih bangin Chin Battalion ten Insein a om KNDO te tung gualzawhna lakna tawh Yangon khuapi le Belpawl gam kemzo uh hi.

Hih hun tawmno sung kidona ahi Insein kidona ah Chin Battalion (1) le (2) ah Bo leh galkap kigawm asi le aliam 300 bang pha hi. Tua hunin galkap santhum Taihk Htun in Myanmar gam galhang min phatna sang pen Aungsan thuriza buaih ngah hi. Tualo galkap dang pawl khatte in zong galhang minphatna ngah uh hi. Hih teng i et ciangin Insein kidona bangzah in nasia ding cih kingaihsun thei hi. Hih kidona sung ah No(1) Chin Battalion Commender Lt Col Hrang Thio in Insein galmai ah amah mahin makaih hi. No (2) Chin Battalion Second Commender Major Thual Khup in, Insein galmai ah makaih in Commender Lt Col Son Kho Pau in galnung Mingalardone ah akisam bangin vaihawmna lam sem hi. Hih Insein kidona khempeuh ah tualai a khanglam galkap ukpi Col Kyaw Zaw (a nunglam ah Brige) le aseppih Col. Ballet, Lt. Col. Kyi Maung te ahi hi.

Hih Tualgal sung a thupiang te:

a. Taziat a om No (1) Burma Battalion te gam sungah tai in Pyi khua a om Burma Communist te tawh kipawl hi.
b. Nyaungliben a om No (2) Burma Battalion te Kayin te tawh kido in lel uh ahih manin, Mingalardone tung hi.
c. No (3) Burma Battalion pawl khat gamsung ah tai in Burma Communist te tawh kipawl hi.

e. No (4) Burma Battalion te in Patein,Mau Pyin leh gunkuam a teng kem uh hi.
f.  No (5) Burma Battalion te in Yakhine gam ah Mujahit gamsung mite do uh hi.
g. No (6) Burma Battalion ah Platoon nih te in Thasi a galphual nang uh hi.
h. No (4) Burma Regiment in Gurkha galkap te hi in gamsung kem na tuamtuam vai puak la uh hi.
i.  No (1) Kachin te in Mawlamyine le Thathong gam sung kem uh hi. A cil lamin Platon khat Isein galmai ah panmun la hi.
j.  No (4) Kachin pan Captain Naw Sai pawlten KNDO tawh kipawl in Meihthila pan alak vanlengte tawh Maymyo (tun Pyin Oo Lwin) la uh hi. A cian laite in Pyinmana ah leitang kemin om uh hi.
k. No (4) Chin pan Platon thumte in Thasi a pawlkhawm galphual kemin, a dangte in Methila ah KNDOte tawh kinawk in a nunglam ah Pegu le Daih Oo kidonate ah huh uh hi.
l. No (1) Kayin ten Taunggo la uh a, Insein KNDO te huh dingin a tuaksuk Pegu pan kumpi galkapte tawh kido uh hi. Tuanggo ah kilehkik a, a nung lamah Myanamr gam leilu lam mual gamah pai suak uh hi.
m.No (2) Kayinte omna Pyi panin Insein a KNDO te huh dingin tuak suk a No (3) Burma te tawh kido in kithehthang uh hi. Bo pawl khat kiman in pawl khat Taunggo a KNDO te tawh kipawl hi.
n. No (3) Kayin ten a kipatcil lamin Mandalay ah galvan ap in Maymyo ah a tawlngak laitak uh KNDO ten Maymyo a lak uh ciangin KNDO te tawh kipawl hi.

1956 kum panin Chin Battalion ah Bote Kawlgalkapte lakah kipiangsak in Kawlgal kap bote Chin ah kipiangsak ahih manin, Chin Battalion ah Zomi 20 pan 30 kawng bek omlai hi. Adang minam zui a kipawl Battalion te zong damdam in bei ta uh hi.


Hih lai munah Chin Battalion te i vaipuak bulpi pen Yangon khuapi la ding cih KNDO te i ngimna khaktan ding ahi hi. Kumpi galkapte le KNDO te kikal ah leitang tawm bek omin galkikap na ding mun toi mahmah ta hi.Tua ahih manin thaupi bek tawh kigalkap uh hi. Tua bang ciang in kumpi galkap te in KNDO te thu galvai hoihtak in kanin galdo dan ding gel in kiging uh hi. KNDO te galvai ah mun hoih teng la khin ahih manin kumpi galkapte in KNDO te gal maitang phut in simding gel uh hi. Galdona ding dum to in hoihtak in galmai nawk dingin kiging uh hi. Tua bangin kumpi galkapte in KNDO te laksa leitang teng damdam in hong lakhia kikzo uh hi. Tua bangin aban nawktoh ciangin kidona nasia mahmah ahih manin asi a liam zong tam mahmah uh hi.

Hih galmai a kidona liante' lakah USetkaih sang kidona pen a masa pen a hi hi. No (5) Burma Rifles pan pawlkhat le tua phungyi sang a om KNDO galkapte kidona a hi hi. Hih kidona pen nasia mahmah in langnih tuak ah aliam a bai le asi tam mahmah uh a, Major Hla Taung zong si hi. Hih kidona ah kum pi galkapte bei siang dektak a hih manin nung kik uh hi. Tua ciangin Chin (1) te in galmai vai puak la in galmai phu uh a, a si a liam tampi tak tawh Usettaih la zo uh a Captain Taih Chuan in Myanmar gam galhang minphatna lian pen Aungsan Thuriya buaih ngah lawh hi.

Myanmar gamin suahtakna ngah khit a sawtlo in tualgal piang pah a, tuni dong tua tualgal bei siang nailo hi. Hih tualgal te lak ah a minthang pen phial le Myanmar kumpi ading a lauhuai pen ahi Insein kidona ah Myanmar gam hutna dingin Zomi i pu i pate bangzah ciangin, kipiakhia in mapang uh cih thu khangthak ten i phawk kik theihna ding deihsakna tawh hong kipulakkhia kik ahi hi.

 

Source: Zomi Post

Posted: Tongsan Media Group 

 

  • comments