Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

‘Absolute Truth’ Omlo ci se hi ven

DSC00246Rev. Dr. S. Pau Khan En thugenna:- Kum zalom 18 panin khantohna hunlap ‘modernity’ hong omto a, kum zalom 20 a bei kuan ciangin hunlap ‘modernity’ panin hunkhen ‘postmodernity’ sungah a lut ihi hi. Banghangin hih hong gen laizang ka hiam cihleh hih in i Christian nuntakna, i Christian kimakaihna, i Christian mission tampi hong huzap kha, hong sukha hi.

Hunlap ‘modernity’ panin hunkhen ‘postmodernity’ i tun ciangin a kikhel pipen banghiam cih leh – Thumaan icih, hih bek maan hi – ‘Absolute truth,’ ‘hih bek maan’ hi ci nawnlo-in a dangdangte zong maan thei ahihna ‘Relative truth,’ i tel ding kisam hi. Hia tak-a a maan le a maanlo thu hi nawnlo-in a enpa a ennu tungah kinga hi. A beisa hun kumzalom 19 a bei kuanin a maan icih ‘absolute truth’ khatbek om a, hih a maan leh adang teng khempeuh a khial hi, cih bangin kipai hi. Biakna lakah zong Christian biakna khempeuh a maan ahih leh a dang khempeuh a maan lo hi, zuau hi. Tua bang mahin Buddhism bek a maan ahih leh a dang khempeuh khial hi, ci hi. Tua pen kum zalom 20 bei kuan ciang i kipuakzia, i thu ngaihsutzia, i thukhunzia hi. Ahi zongin hunlap ‘modernity’ panin hunkhen ‘postmodernity’ i tun ciangin maan maanlo i cih pen i et tungah kinga zaw lo-in a enpa a ennu tungah kinga hi – ‘relative truth’ hi cih i theih ding.

Tua ahih manin thumaan i cih pen a na tungah om zo nawnlo-in ei a ente tungah om zawta hi ...A maan icih pen hih lai bekah om lo-in hua lai ah zong om hi, cih ahi hi. A beisa-in ahih leh a maan icih hih bek hi, hi lo peuhmah a maan hilo hi, ci-a midangte nawlkhin, pampaih-in i mawhsak hi. Tun tua hi nawnlo-in a maan leh a maanlo i cih pen na khempeuh maankim, khialkim, cih omlo in ei etzia tungah kinga hi, ci hi. Thumaan i cih hih lai bekah om lo-in hua lai ah zong om thei hi, cih i phawk ding deih ing. Hih in i Pasian thu pomzia, sianggen mahmah leng i Theology hong khel hi. Theology icih pen a beisa hunin nitumna lam pana hong pai hi-a, hih a maan hi ei, hih hi ei, ci hi hang. Tun tua hi nawnlo in ah, ko mun ko khua ko gam ko kiangah ko etdan ko maansak dan hih bang ahi hi, ci-in a maan pen ei etna tunga kinga ahi hi … Nidangin Christian biakna bek a maan ahih manin a dang teng khempeuh sucip ding, su mai ding, cih in hong kimakaih a, tun tua bang hi nawnlo in ah, biakna dangte ah zong Pasian thu a na omsa om a, tuate koi cih le hang gospel tawh zom thei ding ihiam, cih i kan ding ahi hi.

Hih postmodernity in kammal khat hong guan hi. Tua pen bang hiam cih leh ‘inclusivism’ ahi hi. Santheihna, huaikimna, kei aa lo peuh (exclusivism) ci-in nawnkhin lo-in ah, puasiah lo-in ah, ei aa lote zong a hoih om ding hi, ci-a i sunglutpihna – ‘inclusivism’ cih kammal i tel semsem ding. (Sia Enno genbang lian-a kong gelhkhiat ahi hi). Hih Sia Enno thugen pen Dr. Samuel Ngun Ling (MIT President) in a laibu gelh “Christianity through our neighbor’s eyes (2014)” sunga a thugente tawh kihual mahmah ahih manin Dr. Ngun Ling thugente zong tawm hong hel vet ning!

Laisiangtho bulphuh-a pawlpi doctrine bawl ding pen mi khempeuh leh hun khempeuh-azat dingin maanden lo hi, ci hi (139). Laisiangtho sunga thute pen ‘absolute truth’ hilo ahih manin Laisiangtho tunga i din ding hi theilo hi, a ci ahi hi. Pawlpi kipumkhatna “koinonia” ah biakna tuamtuam-a thu um khempeuh zong kihel a, gitlohna le siangtholohna khempeuh i vensak ding i vaipuak lianpen ahi hi, ci hi (140). Biakna khempeuh i ‘vision’ le ‘mission’ kibang hi, a ci ahi hi.

Hih dawngpak le hang - Laisiangtho sunga ‘koinonia’ kizatnate ah hih bangin khatvei zong kizang ngeilo hi, cih i phawkpak ding thupisa ing (Dr. Enno in zong ‘koinonia’ pen taang zat lua mahmah ahih manin Laisiangtho hong gendan tawh ki-kelki hi). Hih kammal pen thu-um mite sung vive-a kizang hi zaw a, khatvei bekbek thu-um lote tawh ‘koinonia’ neihna hong genkhopna kimu hi. Tua pen 2 Cor 6:14-na hi-a, thu-um lote tawh koici bangin kipawlkhawm thei ding, koici bangin hakkol puakhawm thei ding..khuavak le khuamial a kipawlkhop theihloh mah bangin thu-umte le thu-umlote in ‘koinonia’ nei khawm theilo hi, ci sawnsawn hi. Nungzuipi Paul in upna maanlo a neite, gupngah na dinga vun-atna kisam hi, a cite nangawn a sap ciangin khatvei beek ‘sanggamte’ ci ngeilo lai hi. ‘Koinonia’ a neihpih theihloh luat ding dan!

Hih Pasian bek maan hi i cih leh tua Pasian pen Christiante Pasian hi theilo hi (Christian Pasian pen mihing in tel zolo a, mihing kammal zong Christian Pasian i gen na dingin kicinglo hi). Tua ahih manin pawlpi in zuih tawntung ding ‘doctrine’ nei theilo ding hi. Christiante in doctrine nei kha mawk ihih manin biakna dangte tawh a kipawl theilo ihi hi, ci lai hi (265). ‘Absolute truth’ a theizo khat zong omlo ahih manin om hi, ko aa bek maan hi, cih teitei ding hilo hi. Thuthupi hi-a, kua man tel zolo ihih manin a mun a mual, a mite tawh kizui-a ‘relative truth’ icih zawk ding ahi hi, ci hi (283).Matt 8:11 sunga John tuiphumna pen mawhna kisikkikna lahna hilo-a, midangte tawh kipawlkhop theihlohna mawhna pana kisikkikna hi, ci hi (142).

Tuiphumte upna in Pasian kumpigam pen biakna namkim sunga om mi khempeuh sung leh mi khempeuh lak-a om ahi hi. Tua ahih manin biakna dangte tawh i kiho ciangin zong amau biakna sungah zong (Buddhist-te sungah zong) Pasian kumpigam om ahihna gen ding ahi hi, ci hi (168). Zeisu hong up na ding ua gen ding hi lo; Amau biakna ah zong Pasian kumpigam a om lam gen ziau ding, cihna ahi hi. Pasian hong khunsak lampi ahi Zeisu nuntakzia bek in Pa Pasian kiang hong tun ding hi. Biakna tuamtuam sunga omte zong Zeisu nuntakzia tawh a nuntak uh leh a theihloh kawmkal-un Christian hilel uh hi, ci hi (208). Upna hi kei, gamtatna hi zaw, Zeisu up kul sese kei, theih zong kul sese kei - ama nuntak bangin nungta le hang vantung kitung ding hi, a ci ahi hi. Zeisu nuntak bangin a nungta zote tung mah in teh! Ahi zongin kua mah nungta zolo hi, cih i thei hi.

Gengen lai leng bei pak lo dinga Laisiangtho Pasian kammal hi a ci tintente bang, na si uh khang keei phialta ding ahih manin hi ciang tawh khawlbawl phot ni. Piangthak taktak i hih leh Dr Nung Ling thugente pen (aman zong Raymond Panikkar gelh ‘The Unknown Christ of Hinduism’ cih khawng leh laibu dang tuamtuam pan-a a kaihkhop ahih manin a laigelhte bang ‘cut & paste’ tawh a kibat hun tam simsim hi) Pasian umlote ngaihsutna mawkmawk ahihna, Laisiangtho tawh kituak peuhmah lo ahihna thei pah lel ding hi hang.

Tu-in Dr. Enno thusun tawh kisai kikupna zomkik leng …

‘Absolute truth’ om hi, hih a maan, hih a maanlo, cihte pen missionary-te hong gen hi, tanglai upna hi, tu hun-a dingin maan nawn kei, ci pong hi hang. Hi hetlo hi. Piancil 1:1 enpak le hang ‘absolute truth’ tawh kipan hi. Christiante Pasian pen na khempeuh a bawl Pasian hi-a, Hindu-te, Buddhist-te pasiante tawh kibang theilo hi – bangci bangin a kibang bangin om thei ding ihi hiam? Piancial 1 sung simsuak le hang Pasian pen na khempeuh a bawlpa ahih manin amah bek Pasian ahihna (Pantheism hilo), a bawlsa nate sungah omlo ahihna (Panentheisim hilo), a bawl peuhpeuh ‘hoih’ ahih manin a sia le a pha piangkhawmlo (dualism hilo) ahihna, Pasian ngiat in hong bawl ahih manin ei thu le ei thu-a piangtawm hilo ihihna (Evolution hilo), Pasian kiho uh ahih manin mimal Pasian ahihna (personal), leitung vantung a bawl amah bek ahih manin amah bek Pasian ahihna (Monotheism) kimu thei hi. ‘Absolute truth’ in ‘absolute truth’ tawh na khempeuh pan ahih manin bangci bangin ‘absolute truth’ a nialte, biakna dangte tawh kibang thei ding i hi hiam?

(Laisiangtho hong hilh ‘doctrine’ khempeuh ‘absolute truth’ hi-a, ahi zongin nunzia tonzia leh puansilh nikten tawh kisai (practice) Laisiangtho hong hilh lianlohte ah bel ‘relative truth’ zat ding ahihna mangngilh kei ni. Dr Enno in ‘absolute truth’ om kei, a cih ciangin ‘doctrine’ le ‘practice’ a huam hi a, ken ‘absolute truth’ ka gen leh ‘doctrine’ a gen ka hi hi. Nunzia tonzia leh puansilh nikten tawh kisai ah bel kei zong ‘relative truth’ a um ka hi hi).

‘Postmodernism’ pen mipil tampi in kum zalom 20 beikuan khawnga hong kipan pan bang khatin gen mawkmawk uh hi. Thu mu thak kisa uh a, a ‘postmodern’ lote, ‘absolute truth’ a umte pen thu mulo bang khatin hong ngaihsun uh hi. Theology theilo bangin hong ngaihsun uh a, lungsim toi hong sa mahmah uh hi. Ahi mah ai tam? ‘Postmodernism’ pen Eden huan sunga kipan khin hi-a, thumuhna thak le ngaihsutna thak hi peuhmah lo hi. Gulpi in Eve a khemin ‘postmodern’ ngaihsutna tawh na khem hi – Pasian in ci takpi a hia?…Singgah na nek uh hangin na si taktak kei ding uh hi, ci se hi (Pian 3:1-5). ‘Postmodern’ lungsim pen ‘tua a kicih hangin tuaci taktak khol ken cia, ei mah in a maan theizaw ta hang,’ cih ahi hi. Kipilsakna lianpen khat hi-a, Satan namsau hiampen khat ahih manin kidawm ni.

Thu khat peuhpeuh maan maw maanlo cih pen a thu tungah kinga lo a, a ente tungah kinga zaw hi, cih zong Dr Enno in gen phapha hi. Laikhak tawh genteh le hang ‘Authorial intent’ hilo-a, ‘reader response’ hi, cihna ahi hi. Laikhak khat ih khiatna pen a gelhpa in khentat masa lo a, a simte in a khiatna bang hiam cih khentat zaw uh hi, a ci ahi hi. Tua hi leh laikhak gelhpa in a laikhak tungah thu nei theilo-in a laikhak ih khiatna zong theilo ding a, a simte in amau deih bangin a khiatna khia ding uh ahih manin kihona ‘communication’ taktak piang theilo ding hi.

Pasian in ‘mi that ken’ acih pen a simte in ‘galte leh Jew-te longal that lo ding, cihna ai ve,’ ci uh ahih manin leitunga a cikzet huai penpen thu tampi hong piang hi. A en/simte tungah a khiatna kinga zaw ahih takin leitung ah kilemna le kipawlkhop theihna koici pian ngei ding! ISIS-te muhna ah American-te a thatna uh pen a maan hi ven; Papi khat in numeino khat a buanlup pen ama muhna ah a maan hi ven; Gutapa in innteekte a thah khit ciangin a sumteng a laksakna zong ama muhna ah amaan hi ven! Minih a kitot ciangin khat in a khat a thah pen ama muhna ah a maan hi ven! Neih kibang kitenna zong a kitengte muhna ah a maan hi ven – ahih hangin Pasian a muhdah penpen khat ahi hi (Rom 1:26-27). A ente tungah thumaan le thumaanlo kinga zaw i cih lai teng leitungah thukhun khat zong kinei theilo ding a, tua tua hih kei in, ci-a kikham theihna ding zong khat zong omlo ding hi.

Pom ding pelh ding hong pia khat om (Moral giver) ahih manin mikim lungsim ah a maan le a maanlo om gige hi. Amau muhna tawh kisai lo-a, thukhun hong pia Pa tawh kisai zaw ahih manin mihing khempeuh in ‘morality’ a nei ihi hi. Tua ‘moral giver’ pen Pasian hi-a, tua Pasian pen ‘absolute statement’ a bawlpa ahih manin ei mihingte in a maan le a maanlo ei muh bangin khensat theih hi vetlo hi. Tua tawh kizui-in mihingte kipatna ‘origin’, mihingte bang hih dinga om ‘meaning’, leh mihingte koi ah pai ding ‘destiny’ pen Christian upna bek in dawng/hilh thei hi. Banghang hiam cih leh ‘Absolute truth’ i up hang ahi hi. Hih ‘absolute truth’ a um nuamlote tawh koici bangin mission semin kipawlkhopna ‘koinonia’ nei thei ding i hi hiam? A tomin gen leng ‘absolute truth’ i nial nak leh Pasian a nial ihi-a, Pasian mun a luahsawm ihi hi. Pasian in maan a cih leh a maan hi-a, khial hi a cihte a khial ahi hi. Pasian kam a dawngngam mi aw, nang in kua na hi hiam? A kibawlna khatin a bawlpa tungah, banghang in hih banga kei hong bawl na hi hiam? ci thei ding ahi hiam? (Rom 9:20, ZSV).

Ei kiangah ‘hong thau si cia’ ci le hang a kipahtawi ihi-a, USA ah va ci kha vial le hang thah dingin zong hong deihlo phial ding uh hi. Tua ahih leh ‘hong thau si cia’ cih pen a khiatna taktak bang hi ding? A genpa khiatzia a maan maw? A zapa khiatzia a maan? A zate in amau deih bangin a khiatna a khia thei uh diam? ‘Hong thau si cia’ ci-a nungak khat ka phatna pen a za nu, American nungak nu in ama khiatzia-in na khia leh a maan diam? Pasian hong hopihna Laisiangtho i sim ciangin Pasian in bang hong gen hiam? Bang a cihnopna hiam, ci-a kan ding ahi hi. Ei ut bang tekin khia le hang Pasian mihai a suah ihi ding hi.

Tua hi-a, Absolute truth om kei, icih leh i thugen a kitukalh pah ahi hi. Absolute truth om kei, cihna tawh absolute statement khat a bawl hi pah ihih manin i thugen pen amah le amah kitukalh pah ahihna kilang hi. Absolute truth om kei, cihna pen ‘postmodernism’ a kicih hangin thuthak hi peuhmah lo hi. Eden huan sung pana hong kipan ahi hi. Hih postmodernism hangin leitung mi khempeuh mimawh a suak i hihna mangngilh kei ni.

Biakna dangte tawh i kibatna om peuhmah lo hi. Christian biakna vantung pan kipan a, biakna dangte leitung pan-a piangtawm vive ahi hi. Christiante upna khempeuh pen Zeisu tunga kinga hi a, mimal (Zeisu) tunga kinga hi-in ngaihsutna (idea/philosophy) tunga kinga hilo hi. Christian Pasian zong a nungta mimal Pasian (living personal God) ahi hi. Biakna dangte ah mihingte in Pasian zong uh a, Christian biakna ah bel Pasian in ei hong zong hi. Hehpihna hanga upna tawh gupna a ngahte ihih man-a gamtat hoih a gamta ihi hi. Biakna dangte banga gamtatna tawh gupna a ngahsawmte ihi kei hi. Vantung tun na ding Zeisu in hong sepsaksa hi-a, biakna dangte ah sep ding, thalawh ding, cih hi tawntung hi.

Muslimte in Pasian pen Allah hi, a ci uh hi lel hi. Ei Pasian tawh a kibang hilel hi,ci mawkmawk uh hi. Allah Pasian pen Tapa khat bek a neihsun hong sawl Pa ahih kei leh tua Pa pen Christian Pasian hilo hi, cih i phawk ding thupi hi. Muslimte in Zeisu pen kamsang khat-in sang bek uh a, ahi zongin Zeisu sihna sanglo uh hi. Christian upna pen Zeisu Pasian hihna, mihing-a hong pianna, si-a a thawhkikna, cihte tunga kinga ahih manin Chirstiante le Muslimte a kibang hi lel hi hang – i Pasian a kibang hi, cih vet ding hilo hi. I Laisiangtho Thuciamlui kibang hi, kici pong hi. Tua nangawn zong kibang peuh mahlo ahihna i phawk ding kisam hi. Piangthak Pasian ta, Zeisu nungzui ihih nak leh Muslimte tawh bangmah nei khawm lo hi hang. Sarah le Hagar, Isaac le Ishmael,Jacob in Esau in bangmah a neihkhop loh uh mah bangin Muslimte tawh i neihkhop omlo a, neihkhop theih zong omlo hi (Gal 4:21-31; Rom 9:6-18).

Pawlkhatte in Pasian pen ‘Pa’ cih sese zong kullo hi. Nusian zong na hi kha thei lel in teh! Kua mah in mu ngeilo ihih manin Pasian pen ‘Pa’ cih tuan ding hilo a, ‘masculine gender’ (pasal) zong hihsak se ding hilo hi, a ci mawkmawk zong ki-om hi. Maan peuhmah lo hi. Pasian hihna khempeuh a vek-a hong lakkhia pen Zeisu hi-a, Zeisu pen ‘masculine’ (pasal) ahi hi. A zenzenin Zeisu pasal hihna tawh Pasian pasal hihna siangtak-in a kigen theih kei phial le zong, Zeisu in Pasian pen ‘Pa’ a cih ngiatngiatna hangin Pasian pen ‘Nusian’ hilo ahihna kilangh mahmah hi (Lungdamna John bu sung bekbek ah Pasian pen ‘Pa’ a kicih ngiatna 100val vei kimu). ‘Kha’ ahih manin mihingte bangin ‘gender’ (numei pasal hihna) nei dihdih khollo kha mah ding hi. Ahi zongin na khempeuh a kipatna hi-a, a lianpen hi-in Zeisu in ‘Pa’ mah na ci ngeungeu ahih manin en zong Pasian pen Pasian mahin i sansuk lel ding kisam hi. Nusian hi thei hi, ci sese nawn kei ni!

Kawlbiakna le Christian upna zong a kibang hi lel e, hahcih ding hilo hi. A kibatna khat zong omlo hi. Dr Ngun Ling in Kawlbiakna ah zong Pasian om, Zeisu om lua ahih lam i va gen ding bek hi; na mawhnate uh kisikkik un la Zeisu zuan un, cih khawng va gen mawkmawk ding hilo hi, ci hi (Raymond Panikkar cih a cih sawn). Kawlbiakna le Christian upna in zong bangmah nei khawm lo hi. Christian biakna ah i tup lianpen in Zeisu tawh kibat ding, vantung gam tun ding hi-a, kawlbiakna ih tupna lianpen in lunggulhna beina (desire-free) ahi hi. Bangmah lunggulh/deih nawnlo ding, cih hi lel hi. A taktak-in ci leng ‘lunggulhna omnawnlohna’ lunggulh uh ahih manin amau upna mahmah zong a kitukalh ahi hi. Christian upna ah Zeisu a kizui hi-a, mimal a kibia ahi hi. Kawlbiakna ah zuih neilo uh a, a biak uh zong theilo uh hi. Mimal Pasian ‘personal God’ zong um beeklo uh hi (milim bia hi kei ung, hong thuhilhnate uh a bia/ngaihsun hi ung, ci pong uh. Tua ahih leh thu na nget uh ciangin thuhilhna/idea tungah ngen maw, ka cih leh hong dawn thei het kei uh).

Tua hi-in Christian upna pen Absolute truth tung bek-a kinga ahi hi. Pasian in leitung bawl, mi bawl, cih-a kipan a kipat-a kipan absolute truth vive hi-a, nuntak tawntungna vantung gam (Hell gam zong) dong mah absolute truth vive ahi hi. Pa Pasian ngiat ‘truth’ hi-a (Ps 31:5), Tapa Pasian (John 14:6) leh Khasiangtho Pasian zong ‘truth’ mah ahi uh hi (John 14:17; 16:13). Pasian Kammal ngiat zong ‘truth’ mah hi-a (John 17:17; Dan 10:21), lungdamna thu gospel zong ‘truth’ mah ahi hi (Eph 1:13). Tua ahih manin To thum Pasian (Trinity), Pasian Kammal, leh Gospel-te pen ‘absolute truth’ vive hi uh a, kikhel theilo-in (relative hi theilo), zong kikhel ngeilo ding hi. Tua hi-a, Christian pastor khawng sem napi ‘absolute truth’ om kei i cih teitei mawk pen leitunga a haivai pen khat ahi hi. ‘Absolute truth’ in hong suaktasak nailo hi kha ding hi. LST simpha-in kisit pha ni. Nungzuipi John in, Ka thu ah na kipsuak uh leh ka nungzuite taktak na hi ding uh hi. Thuman thutak zong na thei ding uh a, tua thuman thutak in note hong suaktasak ding hi, a ci hi (ZSV, John 8:31-32). Thumaan thutak i theih ma teng suahtakna taktak a kingah nailo ahi hi.

Midangte tawh kilemna ding, mi khempeuh tawh kipawltheihna ding lunggulh luatna tawh Zeisu hemkhia kei ni. Thuman thutak nawlkhin kei ni. Christian makaite kithusiamsak mawkmawk-in Kawlbiakna makaite khawng tawh thungetkhop ding khawng i vaihawm mawkmawk hi. Hih pen Christian makai pawlkhat in hi thei a sak uh hangin Kawlbiakna makai tampi in hi thei kei, ci zaw bilbel uh hi. Christiante tawh i upna kibang keeilo pi, koici bangin biakna vai sem khawm thei ding ihi hiam, ci zawsop uh hi. Hih bang a cih zawkmawk uh pen ei Christiante aa dingin a zumhuai penpen khat ahi hi. ‘Human rights’ ultunsak nop luatna hangin Zeisu hong piak thute kitheihmawh bawl kei ni. A taktakin mihingte in ‘rights’ neilo hanga Pasian hong piak zahzah bek a nei/zangthei ihi hi. I ‘rights’ neih sunsun Hell gam tun na ding bekin zang ta lai!

‘Freedom’ i deihluatna lamin thuman thutak nawlkhin kei ni. Thuman thutak bek in hong suahtasak thei hi (John 8:32). Suahtakna taktak a om theih na dingin thuman thutak a om masak (i theih masak) kul a, ‘absolute truth’ i theih khit ciang bek-in ‘freedom’ taktak a piangthei pan ahi hi. Tua ahih manin ‘freedom’ ultunsak nop luat manin ‘truth’ nawlkhin kei ni. ‘Truth’ lo tawh ‘freedom’ a piangthei ding ahih takin Zeisu banghangin hong pai se ding! ‘Truth’ lo tawh kilemna piang thei ding ahih takin banghangin Daihna Kumpi (Prince of Peace) hong pai se ding! Daihna Kumpi i neih mateng a dai hithiat pen-a kingaihsun biakna ahi Kawlbiakna nangawn ah daihna om ngeilo ding hi.

Biakna khempeuh hoihin maankim lel ahih takin bang hangin Zeisu hong pai sese ding! Banghangin a pawlpi hong phut sese ding! Banghangin Hindu biakna pan Buddha paikhia sese ding! Hindu biakna maan salo-a a paikhia ahi hi. Thukhatin gen le hang Buddha in zong ‘absolute truth’ a up mana Hindu pana paikhia ahi hi. Banghangin kum zalom 16 lai-in ‘Reformation’ piang sese ding! Banghangin Christian tampite in Zeisu bek a cihna uh hangin thahna thuak sese ding! Nungzuipite ahi-a, pawlpi makaipite ahi uh zongin Zeisu min hang bek-a thahna a thuak ziahziah uh hi ven (Polycarp in Zeisu bek Topa hi, a cih ziauna hanga mei tawh a kihallum ahi hi. Na kammal dokkik ziau in, hong that nuam kei lua ung, acih liang uh hi na pi Polycarp in dokkik hetlo hi). Leitung tangthu ah gal sunga misi khempeuh sangin Zeisu upna hanga thahna a thuak mi tamzaw hi, ci uh hi. Biakna khempeuh a maan tak-in banghangin hih bang thute piang zenzen ding! Zeisu bek icih manin hong kimudah mah in teh – tua ding mah-a hong kisiam ahi hi. Zeisu in, leitung in kei hong mudah ahih manin ka nungzuite zong hong mudah ding hi, a cihsa hi (John 15:18-25). Mimuhdah utlo-a mi khempeuh tawh i kipawltheih sawm-a leh Zeisu nungzuite hilo ding hi hang. Pawlpi aa dinga kibuakhia sisante zahpih nawn kei ni! Upna huutna hanga thahna a thuak tulza tampite sisan khialsak mawkmawk kei ni.

Tu in Antioch khua ah Peter a hong pai ciangin mawhsak nading thu khat om ahih manin ama mai mahmah ah ka taii hi…. A dang Judah mite in zong Peter cingtak lohna zui uh a, Barnabas nangawn a kihel kha hi. Ahi zongin amaute in lungdamna thu tawh kipawl thuman thutak tangtak in a zuih lohna uh ka muh ciangin amaute khempeuh mai ah Peter ka taii a….Tua ahih manin thukham zuihna tawh hi loin Khazih upna tawh diktansakna i ngah nadingin Khazih Zeisu i umzo hi. Banghang hiam cihleh thukham zuihna hangin kuamah in diktansakna a ngah kei ding hi (Gal 2:11-17, ZSV). Paul in Peter a maanlohna hangin mi mai ah a tai giap pen ‘uang si e’ ci kha kei ni. Thuciam Thak bu 27 lak pan bu 24 in upna maanlote tai hi.

Hih bang i gen ciangin a mimal mahmah a kici hilo-a, a thu mahmah a kici hi zaw ahih manin mimal vai peuhmah tawh kisailo ahihna i phawk theih ding thupisa ing. A tunga ka gen siapite ahih uh leh Dr Samuel Ngun Ling bel mu ngei keng; Dr Enno ahih leh mimal-in ka zahtak pen khat leh ka it mahmah khat ahi hi.

 

By: Lian Muan Kim, PhD ( Columnist of Tongsan Media Group), Yangon

  • comments