Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

2018 Kumthak Sungah Khamit Zawkna Ding

2018 kum sungah Pasian in ni 365, kha 12, nai 8760, minute 525600 le nipi 52 letsong in hong piak ahi hi. Hih zahta-a, a tam nai le nite ii zat siam leh nang le kei a hampha ii hi-a, ii zatsiam kei leh khanna om lo-in, kiamsukna le supna tampi ii ngah lawh ding hi. A thupi penah Pasian' a it piangthakte adingin, kum khat khit kum khat Pasian' thu sungah picinna (Khamitna) lamah ii khantoh ding Pasian hong lamet penpen ahi hi. Ahih hangin, tuhun ciangin Pasian' kammal Lai Siangtho hong hilhna tawh kizui-in, 26116470 10213731570390967 8792119820347404008 opastor tampi-in, ii mipite Pasian' kammal nawizu tawh ii vaak saangin, si le sa nopsakna or akimuthei khantohna ahi neih le lam, sum le paii khantohna le hauhna lam bekbek ah kikimakaih zaw ta i hih manin dahhuai mahmah hi. A mipite-in lah tua lam nuam ii sa zaw mahmah mai-a, 'Kha lam picinna / Khamitna' lam ii manawh cih sangsik in, ci le sa lamah i paipai zawk lam ii theithei kei lai hi.

Tua hi-a, kum thak sungah Pasian' Kammal Lai Siangtho in 'Khamitna maan le dik tatak ii kitheihna dingin, bangci piciang tawh teh ding ii hi hiam cih i kikum ding hi. Hih Kha sungah picinna / Khamitna i cih pen mi pawlkhatte-in, mite geel tawm 'sep ding-seploh dingte' bangzah hih zo, bangzah kideek zo' cihte tawh teh thei uh hi. Hih in thu Kham bang lianlian a sepna (Legalism) ki ci hi. Pawlkhatte leuleu in, kha mitna bangci teh u hiam cih leh mawhna bawl theih nading a om thu tampite sung pan, mawhlo ek' na  tawh teh leuleu uh hi. Hih pen mawhna bawl theih nading a, phalna (license) ahi hi.        

A tunga thunihte in Pasian le a kammalte' sianthona thupi laaklo tuak uh cih kimuthei hi. Hih thu ih in mite' deihna banga zuihna hi-a, Pasian in diksa maw? Diksalo cih ngaihsut lo hi. Mi khat peuhpeuh in amah le mah bang bangin a kingaihsut phial zongin, ni khat ni ciangin Pasian in i kha mitna tawh kisai-in thu hong khen ding hi. 'Tua ahih ciangin, Sawltak Paul in," Hih leibuk ah i om a, hua lai mun (Vantung)ah i om zongin, Pasian lungdam sak ding i tupna ahi hi. Banghanghiam cih leh Khazih thukhenna tokhom mai-ah eite khempeuh i ding ciat dinga, i pumpi a i bawl asia apha zui-in thaman i sang ciat ding hi (2 Cor. 5:9-10).

Khai leh!  tu-in, Pasian in kha mitna maan tatak in banghiam cih le, Christian nuntakna-ah bang hanciam ding cih thute theilo-in, khuamial sungah hong pum nusiat cih bang hi lo hi. Pasian in ii nuntak zia, i gamtat luheek zia ding thupi a sakte Lai Siangtho sungah hong lak hi. Paul in Zawmah Christiante tunga, a gen thu-in, i khamit nading a bulpite ahi hi. Tua-ahih ciangin, note Hopihna pen a Sian banga mite hong gen theih dingin om kei un. Pasian' upna in neek le dawn thute hilo-in, Kha Siangtho hanga dikna, lungnopna le lungdamnate ahi hi. Hih thute zui-a, Khazih nasem mite tungah Pasian lungdam a, mite in zong a sang thei hi.(Rom. 14:16-18).cih Paul in gen hi. Hih mun in bang hong hilh hiam cih le Pasian in kha lam thu thupisa zaw ahih man in, ci le sa nuntakna lunglut masa lo hi, cih kimu thei hi. Lai Siangtho mun tampi-ah Pasian in kha lam thu-ah ei ading a, a kician mahmah tupnate a neih hong lakkhia hi.

I. KHA MIT'NA I TEH DING SAWLNA:   Corinthian pawlpi mite-in, kiphatsakna tawh Paul in Khazih a neih tatakna a nuntakna tawh a sit ding 'to' bawl uh hi (2Cor. 13:5). Hih dotna in, 'Bang hangin amaute'n sittel nuam uh hiam? cih dotna hong nei sak hi. "'No mihingte-aw, Aman hong gen khin zo hi. TOPA in note tung pan hong kalh nate-in: Thu maan sem ding, Itna kip nei ding le Kiniamkhiatna tawh Pasian' thuman ding hi lo hiam?'(Micah 6:8). Nungzuipi John in Khamitna ding kal masa, hih thu tawh hong pan hi. 'Pasian' Tapa' min a um note-in nuntak tawntungna na neih lam uh na theih nading un, hih thute kong gelh hi (1 John. 5:13). Bangci bang nuntakna in nuntak tawntungna i neih lam hong lak ding hiam? John in Khenpi thum in khen a, tua dotna te tungah i thu a kinga ahi hi. Tuate tomkim in en leng:
(1) A thu ka mang hiam? Ama hong thupiakte i zuih leh amah a thei i hi hi cih I kitheih hi (1Jhn.5:13)
(2) Itna ka nei hiam? A sanggam a it lo mi-in, sihna sunga a om lai ahi hi (1 John.3:14)
(3) Zeisu Khazih thuman ka thei tatak hiam? Eite-in Pasian pan i hi hi. Pasian a theite-in eite thu a ngai uh a, Pasian pan a hi lote-in, i thu a ngai kei uh hi. Hih bangin thuman thutak kha le thuzuau kha i thei thei hi (1Jhn. 4:6)

II. KHA MITNA TEHNA:   A tunga thute pawl khatte a dingin, phattuamna om kha dinga, pawl khat in thupi zo tatak ii sa mel kei ding hi. I sungah kikhelna tatak a om masakloh in, kha mitna lam ah ki-kalsuan thei peuhmah lo hi. Piangthak masak ding thupi penpen hi. Khaileh!

(1) Zeisu hong hilhna tawh kizui-in: Mate 5:3-12 sungah 'Kha thu ah akiniamkhiatte thupha ngah dingte' ci hi.
(2) Paul hong hilhna ah: 'Kha Siangtho gahte in; Ki-itna, lungdamna, kilemna, lungduaina, migitna,hoihna, muanhuaina, thunemna, pumpi ki-ukzawhnate ahi hi. Tua thute tawh a kilangpan thukham a om kei hi (Gal. 5:22-23).

'It na-in lungduai-in migi, kuamah a haza kei, kisial kei, kiphasak kei ..a kilawm loin gamta kei ..angsung a khual kei . . heh baih kei . .midangte siatna ciamteh kei, na khempeuh a huu, ,a um, lamen .. a thuak keeikai zo hi,... ci hi  (1 Cor. 13:4-7). Na pianthak taktak leh hih thute tawh kisit dih ve!

(3) Peter hong hilhna ah: Hih thute hangmah in, upna banah hoihna, thutheihna, pumpi deihna khamna, thuakzawhna, Pasian biakna-ah nopsakna . . kisanggam itna,  itna neih thuah ding na hanciam un. Hihte nei-in khang sak le uh teh Topa Zeisu Khazih theihtel ding na thadah kei dinguh a, gah neilo-in zong na om kei dinguh hi (2 Pet. 1:5-8) ci hi.

Hih thute hoihtak sim a, ii zuih zawh nailohte ciamteh in, Peter hong hilh bangin, hanciam a, ii khansak ding, Zeisu theihtelna lam ah thadahlo-a, gah i gah ding hong hanthawn hi. Lai Siangtho-in, i nuntak sungin, 'mawh ngeilo ding' cih hong hilh ngeilo hi. I mawh khak mah leh ci-in, hong maisak nading James 5:16; 1 John. 2:1-2 hong pia hi. A tunga thute bangci na ngaihsut tam? Kimangngilh bawl lel ou! Kuama'n zong hih zo ngap ken teh! peuh na ci mai hiam? Kei hoih mahmah khinta ing, bang ka kisam lai hiam? Lai Siangtho hong hilh a thupi penpen i en lai ding hi. Hih a tawpna thu lo-in, i zonzon 'Kha mitna' ki-cing thei ngeilo ding hi.

III. A SANGPEN DINMUN- LUNGKIMNA:  Phillip Keller pen 'Khamitna tatak i cih banghi mawk hiam?'ci-a, a khanpa ahi hi. Amuh khiat thu-in, 'Pasian' khut sungah a vai khempeuh a-ap zo peuhpeuh in, lungkimna, lungmuanna nei-a, tua lungkimna a neihna tawh a kiciamteh pen in kha mitna maan nei pen hi', ci-in gelh hi. Nang le kei 'Pasian hong koihkoihna bangin i lung akimzo hiam? Paul in Philipih pawlpi mite, kha thu lam ah lungkimna a neih nading uh thu li na gen hi.
Tuate in;

(1) Pasian' Vangliatna sungah Lungmuanna Nei un!

'Tu-in hun sawtpi khit ciangin, kei nong huhna uh hong palhkhia kik ahih manin, Topa sungah ka kipaak mahmah hi. Huhna kisam ing cihna tawh hih thu hong gen ka hi kei hi. Bang bangin om ta leng a lungkim dingin, ka kisin khinzo hi. Cihmawhna, cihtheihna, gilkialna le gilvahna, kitasapna, na khempeuh pan in ka sinzo hi. Hong thahatsakpa Khazih hangin, na khempeuh ka hihthei hi (Phil.14:10-13).

Paul in a nuntakna sungah ze-et haksatna sung pan a hong gen hi-a, a vanglian mahmah Pasian a up tintenna sung pan hong phulkhia thute ahi hi. Tua Pasian in nang le kei nuntakna le hih leitung a vangliatnapi tawh a uk pa ahi hi, ci-in lungmuanna nei hi. Tua hi-a,
        Lungkimna-in amasa pen in Pasian mitsuanna (Phil. 4:10)
        Lungkimna sin theih hi (4:11-12)
        Lungkimna kiim le paam tawh kisam lo (4:11-12)
        Lungkimna mimal cihtheihna tawh kisailo (4:13)
        Lungkimna' a naak in Khazih hatna sung hi (4:13)

(2) Pasian Hongsik ding Lungmuanna Nei-in!

'Bangbang hi ta leh ka haksat sungin nong thuak pih uh hi. Hih bang kicih ciangin letsong ka deihna hi lo-in, gah pha na neih semsem nadinguh kong deihsakna hi zaw hi. Na khempeuh kicingtak in ka nei ta hi. Ka kisapna teng kicing ta hi. Tuate pen Pasian in a san theih, Amah a lungdamsak mahmah a namtui biakpiakna ahi hi (Phil.4:14-18). Paul in Philipih pawlpi mite tungah Pasian in amite sehnel gamah a vaak hilhial bangin, hong vaak ding lamen kei un, ci-in a hilh ahi hi (Thuhilh.8:3-4). Tua sangin Pasian in ama' ki-sapnate amaute tungtawn a, a piakna tawh na hanthawn zaw hi.

(3) Pasian' Kamciamte tung Lungmuanna Nei-in! 

'Ka Pasian in Khazih Zeisu sunga, Ama vantung hauhna zui-in, Na kisap a khempeuh uh hong sik ding hi (Phil. 4:19). Hih mun in Lai Siangtho sunga-om,kamciam thupi mahmah te sung pan khat ahi hi. Hun sim hun sim a, Christiante-in, i thalakna le i nuntakpih mahmah Laisiangtho mun khat zong ahi hi. Paul in, 'Ama' kisapte amaute-in a piak mah bangin, Pasian in zong amaute pia ding hi', ci-in hanthawn kik hi. Hih banga, Pasian hong kamciamna pawl khat en lai ni
# Ama Israelte tawlngakna a pia pa TOPA in thupha ngah ta hen. Ama kamciam nasa tawh kizui-in, a nasempa Moses tungtawn a, Ama' kamciam hoih khat zong mai mawhlo hi (1Kumpi. 8:56).
# Khazih tungtawn a Pasian' hong kamciamna khempeuh aman vive hi-a,kote hanga Pasian min athan theihna dingin "Amen" cih ding ahi hi (2 Cor. 1:20).
# Amah in a thupi mahmah le a manpha mahmah kamciamnate tua vangliatna mah tawh hong pia zo hi (2Pet.1:4a).

(4) Pasian' Tawntung Geelnate tungah Lungmuanna Nei-in!

Tua ahih ciangin a kikhawmte khempeuh' omna ah David in Topa phat hi. Tua ciangin David in; 'Nang, TOPA, ka pu-uh Israel Pasian aw, a tawntungin thupha ngah ta in. TOPA aw, Liatna le vangliatna,minthang, vantung le leitungah a om khempeuh in Nangmah aa ahi hi. TOPA aw, kumpi gam in Nangma' aa hi-a, tuate khempeuh tungah Nang a lutangin hong kisangsak hi. Huhna le minphatna Nangma kiang pan hong pai-a, Nangmah in na khempeuh tungah na uk hi. Na khut sungah vangliatna le thahatna om hi; Tu-in Nangma tungah ka nuam uh hi; kote Pasian aw, a minthang Na min kong phat uh hi (1 Khang. 29:10-13).

Tua hi-a, ii nuntakna 'kha thu tawh' i et ciangin, mimal nuntakna-ah Pasian' minthan nading nambat khat in koih den in, Ama' deihna sungah ii ki-ap leh tua-in 'lungkimna man pen' ahi hi. I nuntakna ah bangbang hong piang zongin, Pasian in hong thakhauhsak in, hong keem in, hong zawhpih dinga, a piang bangbang kei-ading in, a hoih pen in Aman hong kihelsak ding hi cih lungmuanna tunga, kingak zawhna in 'lungkimna man' ahi hi. Lungsim pumkhauh a thuak zo cih hi lo-in, Pasian' tung kingakna hang a thuakzo cih hi zaw hi. Paul in, 'Lungkimnatakpi tawh Pasian biakna in hauhna lianpi ahi hi. Bang hang hiam cih leh leitungah bangmah keng lo-in i piang a, bangmah puakhia lo-in i ciah ding hi, cih a kitel hi. Tua ahih man in anneek ding, puansilh ding i neih zahzah tawh lungkim ni (2 Tim. 6:6-8) ci-in hong hanthawn hi. Lungkimna omlo nuntakna-in, a kicing Pasian' itna (complete godliness) hi theilo-a, kha lam khantoh nading hong khaktan thu lianpi khat ahi hi.

 Thukhupna:

Hong mawhsak thei, hong bahsak thei leitung thu tuamtuamte hangin, i khamitna ding hong khaktan tampi om thei ding hi. Hi-mah-ta-leh, Paul in Philipih pawlpi mite hih bangin na hilh hi. 'Tuate ngah khinzo ing, picing khinzo-ing a ci ka hi kei hi. Khazih Zeisu-in tuate a ngah dinga kei hong mat bangin, kei zong tuate ka mat zawhna ding a delhdelh ka hi hi. Sanggam te aw, tuate a len khinzo a kingaihsun ka hi kei hi. Ahi zongin ka hih khat om a, ka nung lam a om nate mangngilh in, ka mailam a om nate ka deih hi. Pasian in tunglam pan Khazih Zeisu sunga hong sapna ahi pahtawina ka ngah nadingin, kung lam ka delh hi (Phil.3:12-16) ci hi.

Tua ahih manin kumthak 2018 sungah 'Hanciam Tentan' in kalsuan dih ni. A simkha khempeuh tungah Pasian in thupha tampi hong pia hen la, Lai Siangtho hong hilh bang 'Khamitna maan' ah hong kalsuanpih ciat ta hen.

 

By: Rev. Thang Khawm Pau (Founder and Director of Cornerstone Children Academy, Tedim)

Posted: Tongsan Media Group Inc.

  • comments