Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

Malaysia Vanleng Vai Upmawh Thu Pawlkhat

Malaysia vanleng mang pen tuni ciangtan kimukik nailo hi. Mipalang, mikheltat pawlkhat in vanleng lim, video pawlkhat bawltawm in vanleng mang kimuta ci-in Internet sungah khahzau in kitaklah mahmah uh hi. Ataktak in kha (3) dektak bang gam tampi mapang khawm in azon hangun vanleng vanthem neng cinthem ciazong muzo nailo cileng man penpen hi. Tua kawmkal ah Malaysia kumpi lampan thusuah te amasa lamleh anunung lam kitukalh sim hi. Gtn. Malaysia PM Najib in vanleng MH 370 pen India tuipi khanglam ah kia-in, kuamah anungta omlo hi ci guapguap hi. Zaanlam deuh ciangin vanleng mang leh asung a tuang mite kimu zo nawnlo khading hi ci ngiangnuang nemnum zel hi. Vanleng hawlte leh leilak (Ground Controller) tawh kihona khempeuh uh a-aw (Audio) tawh hongkhah khia leuleu uh a, US lam experts te’n asittel ciangun tua kihona Audio pen mun 2/3 ah ki endik (edited) kik hi ci-in mawhkawk uh hi.

Vanleng tungpan kizopna thempeuh akhaktan ciangun vanleng etna namkhat ahi (Commercial Radar) pan mangthang suak hi. Tuazawh daak 4 sungbang lenglai hi cihpen amasa lamin Malaysia kumpi’n nialgawp uh a, anung ciangin himah ei cikik uh hi. Tua banah, tua daak 4 sungin Malaysia gamsung Penang tuikulh tungah leng hi cihzong sangthei paklo uh hi. Commercial Radar in amuh theih nawnloh hangin galkap vanleng etna (Military Radar) in muthei veve a, vanleng amin apuam kitheilo (Unidentified Aircraft) khat bangin Penang tuikulh, galkaplen tungah leng viavua ci hi. Galvil a om vanlam galkap mi (4) bang galvanleng tawh kigingsa standby a om sitset hinapi’n bangmah cihlo in lengsak viauviau lel uh hi. Gam thukhual zawdeuh te bangin hibangin theih ngeiloh vanleng khatpeuh amau gam sungah lengleh galvanleng tawh delh in, amau vanleng ahih leh ciahpih kik hi. Midangte vanleng ahih leh warnig pia-in hawlkhia uh a, athuman keileh kapkhia pah uh hi. Nunglam in Israel te bangin amau gam sungah lamkhial a, aleng Turkey te’ vanleng khat warning peselo in kapkhia ziau ngei hi. Hibang nianua tampi lakah mi tampi upmawh sansat pawlkhat ensuk leng:

Vanleng mangpen Malaysia kumpi’ tatkhialhna, tatsiatna hang a, alung kimlo mite sep hiding hi. Hihvai ah Malaysia kumpi polhteh, tuantual, kiallap lolua ci-in kimawhsak mahmah hi. Kumpi langpang party makai Anwar Ibrahim bangin vanleng mang dipdep daak (4) dong ngak kullo a, atung alimh in galvanleng tawh delhpah in, athu ala vakan leng vaisiang pahding hi acihleh kumpi lamte khasia mahmah depmawk ci hi. Pawlkhat in kumpi te’n thei gige a thu ahibang/aman bangin honggen nuamlo, imsim imcipnuam uh hiding hi cilai uh hi. Hibang dan in Malaysia kumpi’ tungah gammi atamzaw in muanmawhna lian mahmah ci hi.

Vanleng mangpen US te’ guk hiding hi. Adiak in CIA thukan te hiding hi. Vanleng deihgawh man hilo in, asung a van pawlkhat deihgawh man hikha ding hi. Vanleng sung a van pawlkhat pen kumpi’n pulak khia nuamlo/ngamlo cih Anwar Ibrahim mah in mawhsak hi. Malaysia PM lui Mahathir Mohamad nangawn in CIA te’n agamla panin control sak uh hiding hi. Tua panin akikap khiat theih nading munkhat ah lengsak in kapkhia uh hikha ding hi. Thu imcip/selcip khatpeuh om limlim ding hi. Hici bangin pumzon tawh kimu in umkeng ci hi. Hibang nasep asem zoding leh septheih nading pilna/vanzat nei pen US te lobuang leitungah kuamah omlo hi. Malaysia gammi tampi mah in hibang dan in ummawh uh hi.

Vanleng mangpen leitung mite sep hilo ding hi. Leitung dangpan ‘Aliens’ ahih keileh mihing ahilo nuntakna nei adang pawlpawl (beings from other dimensions) te hiding hi. Ahih keileh ‘dawimang kuhte’ sep hiding hi. Hihpen Malay dawilam siampu ‘Bomoh Ibrahim Mat Zin’ akipan, dawi/sikha siampu/pi tampi leh US gammi 10 ah 1 in ummawh cizen hi. Pawlkhat bangin tuipicing dawimangtal (Princes/Principalities) te’ sep hiding cilai uh hi. Gen kizom in gento hileng, hih dawimangtal te’ vangliat danpen vangtung mi Maang khat ahi Gabriel nangawn Daniel thungetna piading a, apai/aleng pen Persia gamcing dawimangtal khatin van leh lei kilak ah ni 21 sung khaktan/nangcip zo hi. Daniel 10:13.

Vanleng mangpen kikap khiakha hiding hi. Akap khiakha te’n akimuh zawhloh nading in ahih theihtawp un imcip/khaktan/phiat maimang uh hiding hi. Vanleng manlaitak Thai leh US in galkap kisinna South China Sea tuipi tungah nasiatak aneih laitak uh hi a, vanleng kapkhiat danzong kisin ding uh hi ci-in lai-at siam Nigel Cawthorne in laibu khat bawlin khawng mahmah dep hi. Alaibu sungah nidang in hibang dan a, galkap kisinna ah 1988 kum in Iran te’ vanleng Flight 655 pen Persian Gulf tungah kikap khiakha hi. 1988 kumsung mah in Scotland gam Lockerbie khua tungah aleng Pan Am flight 103 zong kikap khamkha hi cihte sitsan in at hi.

5.Vanleng pen migilo/mihiamtat (Terrorists) te’ zawhthawh heikhiat/peimang (hijack) hiding hi. Tua vanleng sungah atuang mi (2) pen Afghanistan pan, mi (2) leuleu pen Sengam Uighur minam, muslim te hi-in Senkumpi tungah lungkimlo te hi. Vanleng khat zawhthawh heikhiat (hijack) zawh nadingin atawmpen mi (4) kisam in, hi mi (4) teng hiding hi. Vanleng pen Sengam Mongol ah tusak uh hiding hi acipawl zong om hi. Hih pen pawlkhat te upmawhna hi. Atamzaw inbel piangthei salo hi, banghang hiam cihleh Sente’ Radar pen leitungah US te’ azah phial a ahoih mahmah ahih manin Sen kumpi theihloh in gamsungah vanleng guklut pen piang theilo ding hi ci-uh hi.

Tampi omlai in tu-a tengtawh hialbawl phot ni. Hihvai tawh kisai pen athu ala akicingin hong kitheih khiat masiah upmawh sansat pen om toto laiding suak hi. Kua a man, kua a khial gentheih omlo cihding hiphot hi. Mihingta kuamah athei zo omlo zong hitakpi thei hi. Atheisim khinkhian a-om lehzong genhuai, genhuailo khinkhai photding a, amau nuntakna alauhuai sakthei ding ahih lehzong imcip suak khathei laiding hi. Vanleng tunga tuangte leh atanau te’ akamsia himawk hi. Hihvai tawh kisai hong kipulak khialo Malaysia kumpi’n thusim pawlkhat nei, Gtn. Palik te’ muhkhiatna teng bang kipulak khialo hi. Zong ahimah ding hiphot. FBI thukan te’n zong amuhkhiatna teng uh gen pualpual sawmlo ciphot hi. Sen thukan te zong tuabang mah hiphot hi. A theilo tata teng pen upmawh sansat tawh aciak luahluah photding dan hi. Atawpna ah Leitung icihpen thusim/thulangh, sungthu/puathu deih taleng, deih takei leng a-om kinken nahi mawk ta hi.

Sourses: AFP | May 20, 2014, Yahoo Newsroom, The Malaysian Insider – Tue, May 20, 2014, The Guardian: Tuesday 20 May 2014 07.04 BST, The Star Newspaper, CNN Poll, ABC news.

By: Zam Sian Sum

  • comments