Log in Register

Login to your account

Username *
Password *
Remember Me

Create an account

Fields marked with an asterisk (*) are required.
Name *
Username *
Password *
Verify password *
Email *
Verify email *
Captcha *

Tongsan Media Group pan Dahpihna Thupuak

17554383 10154300269505025 2083674198490135837 nZomi (Tedim kampau) te' ading Laisiang tho hong letkhiatsak masapa Rev. Dr. Kam Khaw Thang,(Kum 90), B.Th, D.D.,(The first Tedim Bible translator),in Shewgondai Specialist Clinic,Yangon khuapi pan March 30,2017 nitak lam (8:20 PM) hunin tawntung mun hong zuat san ta ahih manin, Zomite' Thukizaktuahna " Tongsan Media Group Inc" pan Dahpihna i pulak hi.

Siapipa luanghawm pen Yangon khuapi, Sanchaung Tsp., a om ama kikhopna pawlpi ahi Chin Baptist Church (CBC) biakinn ah March 31,2017 (10:00 Am) hunin Zomi khempeuh in pahtawina l khakna hun bawlpih uh a, hun man khit phetin Tedim Baptist Convention (TBC) i ngetna le ama lunggulhna omsa bangin, Zogam-Tedim khuapi ah a luang hawm kipuato pah a, Tedim khuapi a om Sangmang huang sungah akibawlsa amaa Han innpi ah Zomi bupin thupitak vuiina nei ding cih Rev. Vung Suan Mung (General Secretray of TBC) tung pan kizasawn hi.

Sia Thang pen Zomi Pasian nasemte sungah thumanna,cihtakna,hangsanna, thukhualna le itna cihte ah abeisa hun le mai lam dongah kua mah i batzawh ding ahi lo Pasian thupha piak ngiat ahi hi. Amah (Sia Thang)a om nawn loh hangin, Zomibup in a ma' hong bawlsak Tedim Lai siangtho i zat lai teng Rev. Dr. Kam Khaw Thang a si ngeilo ding ahihna phawk kawmin, Tongsan Media Group Inc. pan pahtawina le zahtakna lianpi i pulak phapha hi. 

---------------------------------------------------------------------

Rev. Dr. Kam Khaw Thang i Tangthu (Biography):

Rev. Kam Khaw Thang pen Tuithang khua mi Pu Sim Tung Nung leh Pi Ciin Za Dim te' sung pan October 17, 1927 ni-in Tedim gamhuam Tuithang khua ah suak hi. Tua hun lai in Tuithang khua ah sang om nailo ahih man in Tonzang ah 1937-1941 dong sangkah hi. 1946 kum in tan (6) zo a, 1947 ciangin tan (7) kah ding kimlai apa' leh Rev. Vial Nang i deihsakna tawh sangkah khawl in, Laisiangtho sang Rev.F.O Nel Son tonu sangah 1947-1950 sung kah hi.

1952 kum ciangin Tedim pan Kam Khaw Thang Hakha pan Lun Cung Nung leh Falam pan Lal Hnin te kiteel in, Insein ah Special Course kah ding acih pen Special course hilo-in Regular course kahsak in alawm dang te in sangkah zom zolo-in khawl uh a, Kam Khaw Thang bekin sangkah zom suak in 1956 kumin a tuam vilvel in B.Th degree kipia hi. March 19, 1957 ciangin Tedim Baptist Association (TBA) General Secretary semin, kum (2) sung GS a sep sungin Tedim Labu nihvei hong puah hi. 1960 kum ciangin Myanmar Bible Society te sehna tawh kizui-in Zolai Laisiangtho tei hong kipan a, Late, Isaiah, Piancil cih bangin hong sem toto hi. Thuciam lui (OT) pen 1976 kum in zo a, Thuciam thak (NT) pen 1983 kumin zo leuleu hi.

A nu leh pate Tapidaw innkuan pan khangkhia hi a, Tonzang ah sangkah in a om sung Dec.15,1939 kum in Rev. Vial Nang in Tonzang gam Kongpi lui ah tuiphum hi. Frebuary 17,1959 kum TBA kumcin ki khoppi a (12) veina Phaiza khua pan in Siampi za (Ordination) kipia hi. Pasian nasep leh lai lam nasep thuah in nasem toto a, 1980 kum ciangin Zomi Christian Literature Society (ZCLS) hong piangkhia in, tua laiah 1984 pan lai nasep semto suak leuleu hi. Sangmang te nungzui-in Tedim kiim teng ah Gospel pai kawikawi a, mangkam leh manglai siam ahih man in Sangmang te kampau phen sak hi. Laibu zong nam (5) bang thoh khin ta hi. Zogam bek hi lo khamtung gambuppi Tuiphum Pawlpi te thudotpi muanhuai khat hong suak hi.

1999 kum ciangin ama nasep na leh service tungtawn in thupi leh minam pawlpi ading a kipiakkhiatna le asepnate pahtawina in Yangon Evangical Bible Seminar (EBS) sangte in Doctor of Divinity (D.D) degree pia uh hi. Tuni ciang Zomi Pasian nasem Siate sungah akum tam pen khat hi-in Pasian nasepnate zong ahih theih zah in mapang lai hi. Yangon (TBC-Y) pawlpi ah member in om a, kum 2010 in a zi S/M Niang Khan Ciin in nusia hi. A zi nuasiat hangin, atate in kem in tulaitak Yangon khuapi ah teng hi. A zi tawh Pasian thupha tapa 4 l4 tanu 2 nei hi. A tapa Ubel Nung Khan Kham kum 1990 in Thailand Bangkok ah Electric mei hangin hong nusia khin hi. Pasian nasep sungin Tuiphum mimal (1235) tuiphum a, Nupa kop kiteensak (letthat) kop (41) teng sak hi.

 

Sources by:
- Tedim gam (TBA) Siate' Kipawlna Laibu (2004)
- Zogam Tuiphum Pawlpi tangthu (1999), Kam Khaw Thang gelh.
- Khamtung gam sangmang masa pen Dr.Carson tangthu bu (2003), Kam Thaw Thang gelh.

 

Dahpihna lianpi tawh,

TONGSAN MEDIA GROUP INC.

10857177 10205132522180136 6911084532541802497 o

  • comments