Chin Brotherhood Alliance makaihna tawh Falam khuapi lakna tawh kisai-in, tukha Nov. 9, 2024 ni akipan kido/ kikap ngekngek a, SAC galphual No. 268, cih simloh Police station leh Department dangte khempeuh kilakhia zo bek tham loin, SAC galkap 40 valte Chin Brotherhood kiangah kipumpiak / hingmat uh ci hi. “Kidona tawh kisai ahih leh khawl loin kikaptuah ngekngek laitak hi a, Kalaymyo a om SACte’ Thaupi phualpi pan Thaupi (missile) namte tawh tampi vei mah kapto ngekngek uh” ci-in Falam pan gal a tai pasal khatin gen hi.
SAC lam pan galvan tawh aki-pumpiak (surrender) galkap 40te lakah galkap Ulian pawl khat om cih thuthang a kizak hangin, Chin Brotherhood lam pan thusuahna kician om nailo ahih manin, thuman kithei nailo hiphot hi. Kido/ kikap sungin Chin Brotherhood lam pan a si a liam om cih thu lengsawn kiza himah leh Chin Brotherhood thunei lamten pulakna nei nailo uh hi.
Hih Falam Khuapi lakna pen Chin Brothers kipawl khawmte in abeisa October 25 ni akipan galdo kipan uh ahi hi. Falam khuamite ahih leh a thahat khempeuh khua nusia in taimang uh a, kum tam uham leh damlote kinusia ci hi. SAC in bel Kalaymyo pan Thaupi (missile)namte tawh kapto in, nasiatak galhuh mahmah uh ci-in Chin Brotherhood lam thapiate khatin gen hi.
Chin Brotherhood kipawlna sungah Chin National Council (Mindat), Chin National Organization (CNO), Zomi Federal Union(ZFU/ PDF Zoland), Chin Defense Army (Kanpalet), Chinland Defense Army(Matupi) Brigade No(1), leh MTC cihte kihel uh hi. Tutung pen Falam khuapi bek hi loin, Mindat Khuapi zong tawh hun khat sungin do khawm uh a, SAC te’n zong vanlam pan bomb khiat ziahziah uh a, kidona pen nasia mahmah hi.
Chin Brotherhood te in abeisa June kha sungin Arakan Army (AA), Yaw Army (YA) leh Yaw Defense Face (YDF) te tawh kipawlin Matupi khuapi a om SAC galphualte do-in lakhiazo uh hi. Tua banah 2024 April kha bei lamin zong Magwe Division leh Chin State kal a om Kyindwe Khuapi zong Chin Brotherhood pawlte mahin lakhia khinzo uh hi.
Hits: 2