Maikai cih pen nungzui aneite ahi hi. Nungzui nei lopi’n “kei makai hi’ng” a cih leh a mah kia lamsiau hi lel hi. Makai i cih pen mipite’ lungsim a huaizo mi a hihi. Koi mun koi mun ah mi’ lung sim a huaizo mi makai a om ciangin kithutuahna le khantohna om hi. Gam khat, minam khat,pawlpi khat khantohna dingin makai tungah kinga penpen hi. Makai hoih a nei gam, minam, khua le tui, kipawlnate le biakna pawlpi pen khangto hamtang hi. Tua mah bangin makai hoih a neilote kiamsuk lam manawh pah hi. Gtn: Singapore gam bang khua khat, tuikulhno khat hi lel hi. A gam sungah bang mah pianglo hi. Mehteh mehgah a kipan buhtang khat zong a pianlohna gam ahi hi. Ganno khawi theih nading mun zong omlo a, nahtang kung khat zong omlo hi. Dawn ding le kisil nading tuisik nangawn Malaysia panin tui pipe tawh la-in a lei uh hilai hi.
Yangon taihkhante ah innkuan khatin tui puaktohna dingin tuiset khatta thuah kul a, S’pore gam a taihkhante ah tuiset thuah kulse loin tuimuk hong peuh le’ng tui siangtho deih zahzah kingah lai hi. Tui pailoh hun cih bang omlo bek tham loin, i zat zahzah tuiman kipia hilel hi. A tunga i gen mah bangin nahtang kung khat zong kisuanlo napi’n nahtang a limcipente nezo uh a, butang tang khat zong pianglo hi napi’n buh limpente ne zo uh hi. Lenggui kung khat zong ciinglo napi’n lenggal limci pente ne zihziah lai uh hi. Tua mah bang in lengmaw, apple cihte zong a limci pente mah tua gamah kipuakin lei-in ne zo uh hi. Bangmah pianlohna gam hi napin S’pore gammi taktakten nisa khasa thuakin nasep ham semlo uh a, amau sep noploh teng sem dingin sum thalawh nuamin gamdangmi tampi pai-in a na uh va sepsak uh hi. A gammite in a sepna a thaman uh kham mahmah uh hi.
Leitungah a kidawk zolo ding, bangmah pian lohna tuikulhno khat bek hi na pi’n tu’n leitungah gam haupen khatin kiciamteh a, leitung mun tuamtuam panin mi tampi tak a va hawh nopna, nasep nopna gamhau khat le gamnuam khat suak hi. A vanleng tualpi bang uh leitung ah vanglengtual hoih khatin kiciamteh a, S’pore vanleng bang leitung a vanlengte lakah a hoih penin kiciamteh hi. Leitungbup ah a khua siangtho penin kiciamteh hi. Bangmah pian lohna tuikulhno khat ahi S’pore, bang hangin hih zahtak in khang to hiam cih leh makai hoih a neih man uh ahihi. Tua a hih ciangin gam khat, khua khat, minam khat,pawlpi khat khantoh nading pen makaite tungah kinga vilvel hi. Lai Siangtho sung i et ciangin Israelte zong Pasian a zahtak makai hoih a neih uh ciangin a gambup le a minambup khangto uh a, makai hoih lo, Pasian a zaktak lo makai a neih uh ciangin a gambup, a minam buppi in kiamsuk lam manawh bek tham loin, a galte un sila in kum tampi man uh hi.
Tua ahih manin Zomite in makai hoih i nei theihna dingin thungen ding hi hang. Makai hoih khat i neih khakna pen a manphatzia kisehthei lo hi. LST Samuel masa sung i et ciangin Israel mite in Pasian’ aw a zakloh uh hong sawt ta a, Pasian lamlahna ngah loin khuamial tawh a kibat laitakin Hannah thungetna Pasian in dawng hi. Pasian a zahtak, Pasian lamlahna a ngah makai hoih Samuel a ngah uh ciangin a gambup, a minambup kilamdang pah hi. Zomite in Pasian’ letsong lianpen ahi Pasian a zahtak Makai hoih nei leng i khua, i pawlpi le i minam sungah khantohna lianpi hong om ding hi.
Pasian hong hehpihna tawh Full Gospel Assembly pawlpi pen Kawlgam a khangto pen, khamangthang tam a manpen, sangmang nasepna a nak seppen, local pawlpi khat adingin hunbit Pasian’ nasem a tampen, sumpi zong tam a ngahpen le a piakhia pen pawlpi khatin a kiciamteh ahi hi. Hi bang ka gen ciangin kisialhna le kiphatsakna tawh ka gen hi peuhmah loin kiniamkhatna lianpi tawh minthanna khempeuh Topa tungah pia kawmsa’n a gen ka hi hi. Tua bang khantohna tuamtuam hong pian theih nadingin a makai ahi kei pen cihlohna le thanemna tampi kawmkalah Pasian hong teel, Pasian hong sap ahih lam ka kitel sinsen hi. I munmun, i gamgam, i pawlpi tekah Pasian teel, Pasian sapna a ngah makai i neih ding kisampen ka sa hi. Ka makaihzia ding, ka hihzia ding Topa Kha Siangtho in hong hilh hi. A mal simin kong gen ding haksa hi.
Tua ahih manin makaiten Topa lamlahna tawh makaih ding thupi hi. Nisim in i zia i tong ding hong hilh thei Khasiangtho ahi hi. Nipi sim ka hunzat ding, ka thugen ding Pasian’ tuute Kha ankuang lui ding hong hilh, hong pia Kha Siangtho Pasian ahi hi. Biakinn ah hong kikhawmte, haksakna, buaina le lungkhamna tuamtuam tawh hong kikhop hangin ka sung pan hong luangkhia Kha siangtho nuntakna guntui hangin Pasian’ tate, Pasian’ mite lungdamsa, vanzangsa, Pasian lawnna le hopihna ngahsa’n ciah kik tawntung uh hi. Makai ahi kei tungah Pawlpi mite tung bangci lungsim pua ding cih zong Pasian in hong hilh hi. Ka Pasian’ naseppih Siate tawh ahi zongin, ka kizopzia ding ka hopihzia ding, a maute ka makaihzia ding Topa’n hong hilh den hi. Mite tungah itna ka neih theih nading ahi zongin, kiniamkhiatna le nunnemna tawh ka kizop theih nading ahi zongin Topa’n hong hilh hi. A kulna munah pilna le hangsanna, kalsuan ngamnate hong pia hi.
Tua ahih manin, ka pawlpi sung uh pen tu-in kum 23 bang pha ta a, pawlpi sung ah ki-itna kilemna kithutuahna le khat le khat nop kisakna, nosuahnate om tawntung hi. Ka pawpi sung uh ah khangno lam hi ta le, nupi lam hi taleh, naupang sunday school lam hi taleh, Mission nasepna lamah hi taleh, amau mun tekah lawi in nuamsa thei mahmah uh a, khantohna kinei ciat hi. Ken zong amau mun ciatah muanna tawh suahtakna kipia a, tha ka piak sim loh ka va ukuk se kei hi. A khantohnate uh ka muh ciangin ka lungdam mahmah a, ka lungdamna ka kilangsak hi. Kei lam pan ka sep theih tua ciang bek hi a, ahih hangin mite amau munmun ah suakta kisa-in lungdam thei mahmah uh hi. Pasian a muang le a zantak Pasian’ tate ihih mah bangin i gam i minambup le i pawlpi tek a khantoh nadingin thungetna mah thupipen ka sa hi. Thengen le’ng Pasian tawh i kinai a, Pasian kiang panin lungsim siangtho, ngaihsutna navak, pilna le ciimna kingah hi. Tua in i makaihna hong matutpih ding thalianpen ahi hi.
Thu i nget ciangin Pasian in sathau hong nilh a, tua ciangin i makaihna huang sunga om mite tungah zong ei zon ei hanciam tawm le ei kineihtawm hi loin thuneih zawhna i ngah hi. Mite in i thu hong mangin lungsim peulen cih bang omse nawn lo hi. Tua ahih manin makai cih pen Topa piak loh peuhmahin kingah zo lo ding hi. Topa’n hong piak leh vanzang tak tawldam tak le maitai takin i makaih zo ding a, tua bang mite’ makaihna huang sunga om kha mite zong hampha kisa-in nuamsa mahmah ding uh hi. Lodum le tuiluang sialsial geia kikhah tuuno bang ding uh hi. Pasian’ sathau nilhna a ngah lo makai ahih leh a makaihna sunga om kha mite hingim mahmah ding uh a, mite kiphel loin kihen tektek ding uh hi. Pasian sathau nilh makaipa ahih leh mite kihen loin kiphel ding a, suaktain nuamsa mahmah ding uh hi. Pasian’ sathau nilhna a ngah lo khat in hun hong zat ciangin mipite thungaiten vangiksa-in ciahding uh a, Pasian sathau nilhpa in thu a gen ciangin mite in nuntakna, nopna, suahtakna, damna ngah ding uh hi.
Thupi mahmah ka sak khatah Pasian in ei koi munah hong koih a, hong zang nuam hiam cih i theih ding thupipen hi. I vekin Khazih’ pumpi nate vive i hi a, pumpi nate in amau om nading mun ciatah omin, a pan nading mun tek panin ma hong pan uh ciangin pumpi cidamin nuamsa ahih mah bangin, khazih’ pumpi sungah a om eite’n zong i pan nading mun tek thei-in i pan khak leh a cidam a nuamsa i hi ding hi. I pan nading lopi ah kilam-en khialin i pan khak leh i gim mahmah ding a, i lawhcing kei lai ding hi. Tua ahih manin la makai dingten la makaih ta hen, hunzang dingten hunzang ta hen. Hunzang lo dingpi khat hunzat nading munah ding kei ta hen. Pastor sem ding ten sem ta henla, Pastor sem lo dingten sem kei ta hen. A uk dingte’n uk henla, a makai dingte’n makaih nasem ta hen. I seploh nading munpi ah a pang kha lo dingin Topa’n thupha hong pia ta hen.I gam le i minam bupin Topa lamlahna (Pau.29:18) ngahin, i panna ding tek pan ma pangin i gam, i minambup laamto in i Pasian’ kumpi gam a tangzai sak Zomite i hihna dingin i biak Pasian in thupha hong pia kim ciat ta hen.
