Qatar gam, Hamad International Vanglengtual khawlmun zunbuuk sungah naungek suakcil khat vanlengtual nasemte in mukhia uh ahih man in Doha pan Qatar Airways tawh Australia pai ding numei khempeuh boarding ahih ma un mimal in siavuan siamte sunglam in sitna kinei.
Tua sungah Australia gami numei 13 pha in, vanleng taina tual ah zato mawtaw sungah a sungten uh suahkhia ding in ki sawlin, ahizong banghang kisawl leh banghang kisit cih genkhialo uh ahih man in mitampi tak lauthawng sakin, lungnuam hetlo uh cih zongki za hi.
Kuamah in bangthu bangla cih theilo ahih man in a lungkimlo pawlkhat om in, Australia kumpi thunei te in Qatari thunei tawh kaki kup laitak uh hi ci hi. bangthu bangla hiam cih mipi tetung a sawtlo in hong genkhia ding hi cih Australia Foreign Affairs and Trade spokesman in gamsung media te kiang pulak uh hi.
Qatar Airways te in bangmah thupulakna nei nailo uh hi.
Hamad International Vanlengtual spokeswoman genna ah "Siavuan siamte in hih naungek i Nu’ pen nausuak khin phet ahih man in a cidamna leh kikep kikhoina ding ka lunguh nuamlo ahih man in vanlengtung a tuangma in kikep ki khoina neiphot leh cih" deihsakna genhia uh ci hi.
Naungek pen ahih leh siavuan siamte leh tangpi nasemte in kem in khoiphot uh a, vanglengtual thunei tein a naungek i Nu a kankan laitak uh hi cih zong kiza hi.
