August 22, 2023 || Tongsan Media Group ||

Thailand thukhente’n ama theihloh kalin Thong khum ding khensatna aneih uh Thailand Prime Minister lui Mr. Thanksin Shinawatra pen abeisa 2008 kumin gamdang ah tai -in, kum 15 sung a bukcipna pan khit tuni August 22, 2023 ni-in Thailand gam ciah kik ta hi. Bangkok Don Mueang airport pan Thailand Palik te’n na manin, thukhen zum tunsuak in tua lai pan Thong lamah puak suak pah ci hi.

Kum 74 a pha Thailand PM Thanksin Shinawatra pen Vanleng tual ah a dawn a om ziahziah ama Party memberte leh Mediate khutlen leh khutvan man bekin, kua mah hopih manlo ci hi. Tua khitteh Palikten Vanleng tual pan thukhen zum lam zuatpih in kum 8 thongkia dingin Raman Thong (Prison) lam kipuaksuak pah ci hi. Ahi zongin Thong thuneite’ Thanksin a cidamna a etcianna tungtawn in, a cidamna hoihlo ahih manin, Thong sungah zatui zaha tawh kibawl / kikepna ding lemlohna hang tawh a tawm pen Ni 10 sung Thong zato room ah omsak dingin gen uh hi.

PM Thanksin pen a kum tam khin ta ahih zahin, upa natna Tuap leh lungtang natna nei cih thu Thong vaisaite’n mukhia uh hi. Thaksin pen kuama theihloh ama nung lam pan thunei ahi Pheu Thai Party (PTP) ii kidempih Conservative pawlte tawh kipawlin Kumpi ukna thak (New coalition government) phutkhia dingin akithawi laitak Thailand PM thak khat akiteelkhiat ni lianin Thailand a tung ahi hi.

Ama party PTP te’n Conservative te tawh a kihona ah Thanksin ii suahtakna ding kikupna nei maw cih thu bel kitheician nailo ci hi. Thanksin pen abeisa 2006 kumin Thai galkapte’n Ukna buluh uh a, a gualzo ama PTP party pen thuneihna pialo bek tham loin, Thukhen zumah mawhsakna pawl khat tawh thubawl uh hi. Thanksin in bel mawhna bang mah ka nei kei a, hong kimawhsakna khempeuh gamvai (Politics) bek a paulap nopna hang uh hi ci-in dawng hi.

Thanksin in gampua ah Kum 15 a om sungin, Thailand a ciahnopna thu a gen zelzel hangin, tutung bekin a ciah thei ngawngaw suak hi. Hih a ma inn ciahna tungtang ah adawn / a muak mipite tungah a innkuanpihte’n lungdamkohna a pulak uh hangin, a pa uh Thanksin akimatna tawh kisai bang mah pulakna nei thei nailo uh ci hi. PM lui Thanksin pen Phue Thai Party a phuankhia pa hi-a, tuni dong mah Party kalsuanzia leh ngimna tupnate khempeuh zong ama thuneihna leh lam lahna nuai vive mahah a kalsuansuan lai ahihna Party memberte’n gen uh hi.

Source: Burma Media Consortium

Translated: Tongsa Admin Team

Hits: 9

Byadmin

Leave a Reply

Your email address will not be published. Required fields are marked *