Sagaing Division, Kalaymyo Khuapi sungah mipite in SAC galkapte leh Palikte’ omna phualpi tawh kinai-in omloh ding deihna tawh December 15, 2023 ni akipan Kalay- PDF in tangko khia uh a, mipi tampitak Kaalaymyo pan Khamtung (Zogam) khuate leh mundang khuapi tuamtuamah kihemkhia / taikhia ziahziah ta uh cih kiza hi.
Abeisa November 16, 2023 ni-in Kalay (PDF)te in tangkona a neihna ah Dec 15 khit akipan galdona kipan kha thei dingin gen uh ahih manin, a diakdiak in SAC galkapte leh palikte omna phualpi tawh kinai a omte kidawm in, a hih theih lai teng kihepkhiat zawk dingin thusuahna nei uh hi. “Hih a lai suahkhiat uh limtak sim leng khuabup a kihepkhiat ding cihna om kei ee, galkapte omna phual tawh a kinai zawdeuhte kihep ding leh kidawp ding dan hi zaw” ci-in CDM sang Sia khatin Tonsan Media ah genkhia hi.
Abeisa December 1, 2023 ni akipan Kalay leh Tahan pan mi pawlkhat India gam leh Chin state (Zogam) lam, Tahan khua kim a om khuanote ah tai ngeingai uh hi. Taina ding a neilo pawl khatte in sehnel tawh kibukna ding leidum bawl uh hi. “Ko, bel taina ding zong om tuan lo ahih teh banglo galkhat peuh a pian zenzen leh thuak ding hi mai lo dia! Inn huang sungah bel kibukna bawlsa in koih khol hiphot ing”ci-in Sanmyo veng a teng Papi khat in gen hi.
Nov 21, 2023 ni-in Kalaymyo khuam Dowaing Chuang khua ah PDF leh SAC galkapte kikap uh a khua bup in Tahan lamah gal tai uh hi. Tulaitak in bel Tahan lamah inn sap ding a zong mi tampi omta uh a, inn sap ding nangawn haksa peuh ci hi. “Tahan sungah zong inn sap ding a kimuzo nawnlo himai! Inn sap man lah khang semsem ahih manin,ka inn leh ka khua mah ngai ing! Khua ciah kik nuam lua ta ing” ci-in galtai numeino khat in Tongsan Media ah gen hi.
Hits: 3