August 14, 2023 || Tongsan Media Group ||
ရှမ်းပြည်နယ်မြောက်ပိုင်း လားရှိုးမြို့နယ်တွင် တအာင်းတပ်မတော်(TNLA)နှင့် စစ်ကောင်စီတပ်တို့တိုက်ပွဲဆက်လက်ဖြစ်ပွားခဲ့ကြောင်း TNLAက ယမန်နေ့ညပိုင်း၌ သတင်းထုတ်ပြန်သည်။ လားရှိုးမြို့နယ် နမ့်လောင်းကျေးရွာအနီးတွင် ဩဂုတ် ၉ရက်နှင့် ၁၀ရက်က နှစ်ဖက်တိုက်ပွဲများ ဖြစ်ပွားခဲ့ပြီးနောက် ဩဂုတ် ၁၁ရက်တွင် ဟိုလောက်ရွာအနီး ထပ်မံတိုက်ပွဲဖြစ်ခဲ့သည်ဟု ဆိုသည်။
ဩဂုတ် ၁၁ရက် ညနေပိုင်းမှ စတင်ကာ TNLAက စစ်ကောင်စီတပ်စခန်းကို ထိုးစစ်ဆင်တိုက်ခိုက်ရာမှ စစ်ကောင်စီတပ်လက်အောက်ခံ စကခ (၁၆) ခလရ-၆၈၊ ရမခ/ခလရ – ၁၇ စုပေါင်းအင်အား ၆၀ ခန့်နှင့် တိုက်ပွဲပြင်းထန်ခဲ့ခြင်းဖြစ်သည်ဟု အသိပေးသည်။ TNLA တပ်မဟာ(၆) စစ်သေနယ်မြေရှိ ဟိုလောက်ရွာအနီး တိုက်ပွဲသို့ စစ်ကောင်စီဘက်မှ စစ်ကူအင်အားအများအပြား ပို့ဆောင်နေကြောင်း ယမန်နေ့ သတင်းထုတ်ပြန်ချက်၌ ဖော်ပြသည်။
လက်ရှိ စစ်ရေးအခြေအနေနှင့်ပတ်သက်ပြီး TNLA သတင်းပြန်ကြားရေးဌာန တာဝန်ရှိသူ အချို့ထံဆက်သွယ်ခဲ့ရာ လတ်တလော အဆက်အသွယ်မရသေးပေ။ လားရှိုးမြို့နယ်တိုက်ပွဲအတွင်း စစ်ကောင်စီတပ် ထိခိုက်သေဆုံးမှုရှိကြောင်း ယခင်TNLA သတင်းထုတ်ပြန်ချက်၌ဖော်ပြထားပြီး အရေအတွက် မသိရသေးဟု ဆိုသည်။ သို့သော် ယမန်နေ့တိုက်ပွဲ၌ထိခိုက်ကျဆုံးရှိ၊မရှိကို ဖော်ပြမထားပေ။
TNLAနှင့် စစ်ကောင်စီတပ်တို့သည် ဇူလိုင်နှင့် ဩဂုတ်အတွင်း တိုက်ပွဲ ၁၂ကြိမ်ထက်မနည်းဖြစ်ပွားခဲ့သည်။ လားရှိုး၊ မူဆယ်၊ကွတ်ခိုင်နှင့် ကျောက်မဲမြို့နယ်များ၌တိုက်ပွဲဖြစ်ပွားခဲ့ရာ အချို့တိုက်ပွဲမှာစစ်ကောင်စီတပ်ကထိုးစစ်ဆင်လာ၍ ဖြစ်ပြီး အချို့တိုက်ပွဲမှာTNLAက သွားရောက်တိုက်ခိုက်ခြင်းဖြစ်သည်။
Source: People’s Spring
Hits: 0