ဟုမ္မလင်းမြို့နယ်၊ သောင်သွပ်စံပြကျေးရွာတွင် တပ်စွဲထားသည့် စစ်ကောင်စီ တပ်စခန်းများကို ပြည်သူ့ကာကွယ်ရေးတပ်ဖွဲ့များက တိုက်ခိုက်သိမ်းပိုက်လိုက်ကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာ(MOD)က ထုတ်ပြန်သည်။ သောင်သွပ်စံပြကျေးရွာမှ စစ်ကောင်စီတပ်စခန်းများကို ဇန်နဝါရီလ ၅ရက်နေ့၊ နံနက် ၆ နာရီတွင် အမှတ် (၁) စစ်ဒေသကွပ်ကဲမှုဖြင့် ပြည်သူ့ကာကွယ်ရေးတပ်မတော်(PDF) စစ်ကိုင်းတိုင်း အထူး တပ်ရင်းများ၊ ခရိုင်တပ်ရင်းများ၊ ပကဖတို့ ပူးပေါင်းတိုက်ခိုက် သိမ်းပိုက်ခဲ့ခြင်းဖြစ်ကြောင်းသိရသည်။
ကာကွယ်ရေးဝန်ကြီးဌာနက တိုက်ပွဲသတင်းကို ကနဦးထုတ်ပြန်ထားခြင်းဖြစ်ပြီး အသေးစိပ်အချက်အလက်များမဖော်ပြသေးပေ။ ထုတ်ပြန်သော သတင်းဓါတ်ပုံများတွင် သောင်သွပ်ရွာရှိ စစ်ကောင်စီလက်အောက်ခံ ရဲစခန်းနှင့် ပြည်သူ့စစ်စခန်းများကို တိုက်ခိုက်သိမ်းပိုက်ထားသော ဓါတ်ပုံများပါဝင်သည်ကိုတွေ့ရသည်။
ဟုမ္မလင်းမြို့နယ်တွင် ဒီဇင်ဘာလ ၁၉ရက်ကလည်း ဇီးပင်သာ၊နောင်ဆန်းကျင်နှင့်တီလောင်ရွာအနီးမှ စစ်ကောင်စီနှင့် ရှမ်းနီတပ်ပူးပေါင်းတပ်ဖွဲ့ ရှေ့တန်းစခန်းနှစ်ခုကို ပြည်သူ့ကာကွယ်ရေးပူးပေါင်းတပ်ဖွဲ့များ တိုက်ခိုက်သိမ်းပိုက်ခဲ့သည်။ ထို့အပြင် ဟုမ္မလင်းမြို့နယ်ရှိ ရွှေ ပြည်အေး မြို့ ကို တော်လှန်ရေး တပ် ဖွဲ့များက တိုက်ခိုက်သိမ်းပိုက်ထားသည်။
Hits: 0