စစ်ကိုင်းတိုင်း၊ ရွှေဘိုခရိုင်၊ ခင်ဦးမြို့နယ်အနောက်ခြမ်းကို စစ်ကြောင်းထိုးလာတဲ့ စစ်အုပ်စုနဲ့ ပျူတွေဟာ နိုဝင်ဘာ ၁၂ ရက်နဲ့ ၂၃ ရက်မှာ စစ်ကြောင်းပျက်တဲ့အထိ တော်လှန်ရေးတပ်ဖွဲ့တွေက ချေမှုန်းတိုက်ခိုက်ခဲ့ရပြီးနောက် နိုဝင်ဘာ ၂၇ ရက်မှာ နေ့လယ်ပိုင်းမှာ ကန့်ဘလူမြို့နယ်ဘက်ကို ပြန်လည်ဆုတ်ခွာသွားတယ်လို့ ဒေသခံ သတင်းရင်းမြစ်တွေက ပြောပါတယ်။
ချေမှုန်းတိုက်ခိုက် ခံရပြီးနောက် ခင်ဦးနယ် မုံလှရွာထဲမှာအထိုင်ချထားတဲ့ အဲဒီ့စစ်အုပ်စုဟာ ရေဦးနယ် အောင်သာယာပျူစခန်းနဲ့ ကန့်ဘလူနယ် ကာဘိုးရွာပျူစခန်းကို ဆုတ်ခွာသွားခဲ့တာဖြစ်ပြီး ကျန်ရှိနေသေးတဲ့ စစ်အုပ်စုတပ်တွေရဲ့ရုပ်အလောင်းတွေကို တော်လှန်ရေးတပ်ဖွဲ့တွေက မီးသင်္ဂြိုဟ်ရှင်းလင်းတာတွေ လုပ်ဆောင်ပေးခဲ့ရတယ်လို့ ခင်ဦးမြို့နယ် ပြည်သူ့အုပ်ချုပ်ရေးအဖွဲ့ တာဝန်ရှိသူက ပြောပါတယ်။
“စစ်ကြောင်းကတော့ ကန့်ဘလူဘက်ပြန်ဆုတ်သွားပြီပေါ့။ အခုကတော့ နယ်မြေရှင်းလင်းရေးတွေ လုပ်နေတာ။ အခု တိုက်ပွဲမှာ သေသွားတဲ့ခဲ့ (စခ)ရုပ်အလောင်းတွေကို မီးရှို့ရှင်းလင်းပေးနေတာ။ သူတို့ရဲ့ ရုပ်အလောင်းတွေကို ပြန်ကောက်မသွားဘူး။ တိုက်ပွဲဖြစ်ပြီးတာ ဒီကနေ့ဆို ခြောက်ရက်ရှိသွားပြီဆိုတော့ ရုပ်အလောင်းတွေက အတော်လေးကိုဆိုးဆိုးရွားရွားနဲ့ ဖြစ်နေပြီ။ အတော်ကို ပုပ်နေပြီ။ လုပ်ရကိုင်ရတာ အတော်လေးကိုဆိုးတယ်။ mask ကို နှစ်ထပ်သုံးထပ်တပ်ပြီးတော့ ရုပ်အလောင်းတွေကောက်ပြီး မီးရှို့ရှင်းပေးခဲ့ရတာ။ တိုက်ပွဲဖြစ်ခဲ့တာက လယ်ကွင်းထဲမှာဆိုတော့ (စစ်အုပ်စု)ရုပ်အလောင်တွေက ဟိုတစသည်တစနဲ့ ပြန့်ကျဲနေတာကို လိုက်ကောက်ပြီး ရှင်းပေးခဲ့ရတာ။ ကျွန်တော်တို့ အတော်လေးခက်ခက်ခဲခဲနဲ့ ရှင်းလင်းခဲ့ရတာပါ” တယ်လို့ ခင်ဦးမြို့နယ် ပြည်သူ့အုပ်ချုပ်ရေးအဖွဲ့ တာဝန်ရှိသူက ပြောပါတယ်။
ပြီးခဲ့တဲ့ စက်တင်ဘာလအတွင်းက ခင်ဦးမြို့နယ်တောင်ခြမ်းကို ရွှေဘိုမြို့ဘက်ကနေ စစ်ကြောင်းထိုးလာတဲ့ စစ်အုပ်စုတွေကို တော်လှန်ရေးပူးပေါင်းတပ်ဖွဲ့တွေက စစ်ကြောင်းပျက်တဲ့အထိ တိုက်ခိုက်ချိန်ကလည်း သေဆုံးခဲ့တဲ့ စစ်အုပ်စု ရုပ်အလောင်းတွေကို တော်လှန်ရေးတပ်ဖွဲ့တွေကပဲ မြေမြှုပ်သင်္ဂြိုဟ်ပေးခဲ့ရပါသေးတယ်။ လက်ရှိမှာ ခင်ဦးနယ်အနောက်ခြမ်းကနေ စစ်အုပ်စုနဲ့ပျူတွေ ဆုတ်ခွာသွားပြီဖြစ်တာကြောင့် စစ်ဘေးတိမ်းရှောင်နေကြရတဲ့ ဒေသခံပြည်သူတွေလည်း တဖြေးဖြေးနဲ့ ကျေးရွာတွေကို ပြန်ဝင်နေကြပြီလို့လည်း စစ်ရှောင်တွေကို ကူညီပေးနေသူတွေက ပြောပါတယ်။
ပြီးခဲ့တဲ့ နိုဝင်ဘာ ၁၂ ရက်က ကန့်ဘလူမြို့နယ် ဝက်တိုးရွာ စစ်အုပ်စု အထိုင်စခန်းကနေ ခင်ဦးမြို့နယ်ဘက်ကို ထွက်လာတဲ့ ခြေမြန်တပ်မဌာနချုပ်(တမခ-၃၃) လက်အောက်ခံ ခြေလျင်တပ်ရင်း အမှတ် – ၁၁၁ က စစ်အုပ်စု အင်အား ၁၀၀ ကျော်ပါ စစ်ကြောင်းကို တော်လှန်ရေးပူးပေါင်းတပ်ဖွဲ့တွေက ယင်းတိုက်ရွာအနီးမှာ ချေမှုန်းတိုက်ခိုက်ခဲ့ရာ စစ်အုပ်စု စစ်ကြောင်းမှူးအပါ ၆၀ နှင့် ၈၀ အကြား သေဆုံးခဲ့ပြီး အကြမ်းဖက် စစ်တပ်ထံမှ ငါးကြင်းမှီး ၁ လက်၊ MA-1 ၁၀ လက်၊ MA-2 ၃ လက်၊ BA-100/ 60mm ကွန်မန်ဒို စိန်ပြောင်း ၁ လက်၊ MA-3 ၃ လက်၊ MA-4 ၁ လက်၊ G-3 ၄ လက်၊ MAS Sniper ၁ လက်၊ M1- ၅ လက်နှင့် ဆက်စပ် ကျည် ခဲယမ်း အစုံ၊ အများအပြား သိမ်းဆည်းရမိခဲ့သည်။
Hits: 0