အခုပြန်လွှတ်ပေးလိုက်တဲ့ စစ်သုံ့ပန်း မိသားစုဝင်တွေဟာ စစ်ကောင်စီ ထိန်းချုပ်မှုမရှိတဲ့ ဒေသလူတွေဖြစ်ပြီး အခမ်းအနားနဲ့တကွ ပြန်လွှတ်ပေးလိုက်တာလို့ Arakan Army (AA) က ပြောပါတယ်။ “လောလောဆယ် သုံ့ပန်းမိသားစု ၁၁၆ ဦး၊ ပြီးရင် အရပ်သား အကျဉ်းသား ၂၆ ဦးကို ကနဦး လွှတ်ပေးတာပါ။ နောက်ထပ်စစ်ဆေးပြီးတော့ ပြန်လွှတ်လို့ရတဲ့သူတွေကို ပြန်လွှတ်ပေးဖို့ ရှိသေးတယ်။ ရာဇဝတ်မှု ကျူးလွန်ခဲ့တဲ့သူတွေကိုတော့ အပြစ်ပေးထားတာတွေရှိတယ်” လို့ AA က ပြောပါတယ်။
စစ်ကောင်စီတပ်ရဲ့ လေကြောင်းအန္တရာယ် စိုးရိမ်ရတာကြောင့် ဘယ်မြို့နယ်ကနေ ပြန်လွှတ်ပေးတယ်ဆိုတာ ထုတ်ဖော်မပြောဆိုလိုကြောင်း သူက ပြောပါတယ်။ ရခိုင်ပြည်နယ်အတွင်း စစ်ကောင်စီတပ်ရဲ့ လေကြောင်းတိုက်ခိုက်မှုကြောင့် စစ်သုံ့ပန်းတွေနဲ့ မိသားစုဝင် တစ်ရာကျော် သေခဲ့ဆုံးပြီး ၁၂ဝ ကျော်ဒဏ်ရာရခဲ့တယ်လို့ AA နဲ့ နီးစပ်သူတွေက ပြောပါတယ်။
AA က ထိန်းသိမ်းထားသည့် စစ်သုံ့ပန်းများရှိရာနေရာကို စစ်ကောင်စီက လေကြောင်းတိုက်ခိုက်မှုများလည်းပြုလုပ်နေသည်။ မြောက်ဦးမြို့နယ်၊ ရမ်းချောင်းအနီးတဝိုက်ရှိ စစ်သုံ့ပန်းမိသားစုဝင်များထားရှိသည့်နေရာကို ဇန်နဝါရီ ၁၈ ရက်တွင် စစ်ကောင်စီက ဂျက်ဖိုက်တာဖြင့် ဗုံးကြဲတိုက်ခိုက်မှုကြောင့် ကလေးငယ်နှင့်အမျိုးသမီး စုစုပေါင်း ၂၈ ဦး သေဆုံးခဲ့ပြီး ၂၅ ဦးဒဏ်ရာရရှိခဲ့သည်။
Hits: 0