ချင်းပြည်နယ်မြောက်ပိုင်း၊ တီးတိန်မြို့နယ်အတွင်းရှိ ဘိန်းခင်းများတွင် လုပ်ကိုင်နေသည့် နေ့စားအလုပ်သမား ၂၀၀ ကျော်ကို ချင်းတော်လှန်ရေးတပ်ဖွဲ့ PDF Zoland က ဖေဖော်ဝါရီလဆန်းပိုင်းတွင် ဖမ်းဆီးခဲ့ပြီး၊ ၎င်းတို့အနက်မှ သတ်မှတ်ချက်နှင့် ကိုက်ညီသူများကို တပ်ဖွဲ့ဝင်အဖြစ် စုဆောင်းသွားမည်ဖြစ်ကြောင်း သိရသည်။
PDF Zoland ၏ နိုင်ငံရေးဦးဆောင်အဖွဲ့ဖြစ်သော ဇိုမီးဖက်ဒရယ်အစည်းအရုံး (ZFU) က ဖေဖော်ဝါရီ ၈ ရက်တွင် ထုတ်ပြန်ရာ၌ အသက် ၁၈ နှစ်မှ ၃၅ နှစ်အတွင်းရှိသူများ၊ ကျန်းမာရေးကောင်းမွန်ပြီး မိသားစုတာဝန် လွတ်ကင်းသူများကို စစ်သားအဖြစ် လေ့ကျင့်ပျိုးထောင်သွားမည်ဟု ဖော်ပြထားသည်။
၎င်းတို့သည် ဖေဖော်ဝါရီ ၅ ရက်က လေသာတောင် (ကနေဒီတောင်) ပတ်ဝန်းကျင်ရှိ ဘိန်းခင်းများမှ အလုပ်သမား ၂၀၀ ကျော်ကို ဖမ်းဆီးခဲ့ခြင်းဖြစ်ပြီး ကိုယ်ဝန်ဆောင် အမျိုးသမီးများအပါအဝင် အချို့ကို ပြန်လွှတ်ပေးခဲ့သော်လည်း အမျိုးသား ၁၉၀ ကျော်မှာ ဆက်လက်ထိန်းသိမ်းခံထားရဆဲ ဖြစ်သည်။
ဒေသခံများ၏ အဆိုအရ ပြန်လည်လွတ်မြောက်လာသူအချို့တွင် ရိုက်နှက်ခံထားရသည့် ဒဏ်ရာများ တွေ့ရှိရသည်ဟု ဆိုသော်လည်း PDF Zoland ဘက်ကမူ ယင်းကို ငြင်းဆိုထားသည်။ ထို့အပြင် ဘိန်းစိုက်ပျိုးမှု ပပျောက်ရေးအတွက် အလုပ်သမားများကို ဖမ်းဆီးခဲ့သော်လည်း လက်ရှိအချိန်အထိ ဘိန်းခင်းများကို ဖျက်ဆီးခြင်း မရှိသေးကြောင်း ပြောရေးဆိုခွင့်ရှိသူက အတည်ပြုသည်။
လက်ရှိတွင် တော်လှန်ရေးကာလ ကြာမြင့်လာသည်နှင့်အမျှ လက်နက်ကိုင်အဖွဲ့အစည်းများအကြား တပ်သားသစ်ရရှိရေး အခက်အခဲနှင့် ရင်ဆိုင်နေရချိန်တွင် ယခုကဲ့သို့ ဘိန်းလုပ်သားများကို ဖမ်းဆီးကာ စစ်သားစုဆောင်းသည့် လုပ်ရပ်အပေါ် “လက်တွေ့မကျသည့် မူဝါဒ” ဟု ဒေသခံများက ဝေဖန်နေကြသည်။
ကုလသမဂ္ဂ (UNODC) ၏ ၂၀၂၅ အစီရင်ခံစာအရ ချင်းပြည်နယ်တွင် ဘိန်းစိုက်ပျိုးမှု ၂၆ ရာခိုင်နှုန်းအထိ မြင့်တက်လာနေပြီး စစ်ဘေးနှင့် စီးပွားရေးကျပ်တည်းမှုကြောင့် ဒေသခံများမှာ ငွေရလွယ်သည့် ဘိန်းစိုက်ပျိုးရေးဘက်သို့ ပိုမိုခြေဦးလှည့်လာကြခြင်း ဖြစ်သည်။
Hits: 0