အီရန်မှာရှိတဲ့ နျူကလီးယား နည်းပညာဆိုင်ရာ သုတေသန စခန်း ၃ ခုကို ဗုံးကြဲတိုက်ခိုက်ခဲ့တဲ့ B-2 Spirit မဟာဗျူဟာမြောက် ဗုံးကြဲလေယာဥ်တွေဟာ အမေရီကန် နိုင်ငံကို၊ မဇ္ဇူရီပြည်နယ်ကို ဇွန် ၂၂ ရက် (အမေရီကန်စံတော်ချိန် ) ပြန်လည်ဆင်းသက်လာကြပြီဖြစ်ပါတယ်။
အီရန်နိုင်ငံကနျူကလီးယားစီမံကိန်းတွေဖြစ်တဲ့ ဖော်ဒို၊ နထန်ဇ် နဲ့ အက်စ်ဖာဟန် တို့ကို အာရှအချိန် ဇွန် ၂၁ ရက် ည(အမေရီကန်အချိန် ဇွန် ၂၁ ရက်မနက်ပိုင်း )မှာ ဘန်ကာဖျက်ဗုံးတွေကြဲပြီးမိုင်ထောင်ချီပျံသန်းကာ အမေရီကန်နိုင်ငံ၊ မဇ္ဇူရီပြည်နယ်ကစစ်တပ်သုံးလေဆိပ်ဖြစ်တဲ့ Whiteman Air Force Base ကို ဇွန် ၂၂ ရက်မှာပြန်လည်ဆင်းသက်ခဲ့ကြတာဖြစ်ပါတယ် ။ B-2 Spirit လေယာဥ်တွေဟာ အသွားအပြန် မိုင်ပေါင်း ၁၅၀၀၀ (လေကြောင်းမိုင်အရဆိုရင် မိုင် ၁၃၀၀၀ )လောက် ၃၆ နာရီကျော်ကြာပျံသန်းခဲ့ကြတာဖြစ်ပါတယ်။
အမေရိကန်က Midnight Hammer လို့အမည်ပေးထားတဲ့ဒီ စစ်ဆင်ရေးမှာ အမေရီကန်စစ်တပ်က B-2 ဗုံးကြဲလေယာဉ်ကြီးတွေအပါအဝင် လေယာဉ် ၁၂၅ စီး ၊ ဧရာမ ဘန်ကာဖျက်ဗုံး ၁၂ လုံး နဲ့ စစ်လက်နက် ၇၅ ခုထက်မနည်း အသုံးပြုခဲ့တယ်လို့အမေရိကန် ကာကွယ်ရေး ဝန်ကြီးဌာနက ထုတ်ပြန် ထားပါတယ်။ အမေရိကန်သမိုင်းမှာ လေတပ်ရဲ့ စွမ်းဆောင်ရည် အမြင့်ဆုံး၊ တန်ဖိုးအကြီးဆုံး မဟာဗျူဟာ ဗုံးကြဲ လေယာဉ်တွေဖြစ်တဲ့ B-2တွေကို အရေအတွက် အများဆုံး အသုံးချခဲ့တဲ့ စစ်ဆင်ရေးလို့ အမေရိကန် စစ်ဦးစီး အရာရှိချုပ် ဗိုလ်ချုပ်ကြီး ဒန်ကိန်းက ပြောပါတယ်။
ရေဒါနဲ့ ထောက်လှမ်းမှုကို ရှောင်ကွင်းနိုင်တဲ့ B-2 ဗုံးကြဲလေယာဉ် စုစုပေါင်း အစီး ၂၀ ထိ အမေရိကန် လေတပ်က ပိုင်ဆိုင်ထားပြီး အခုစစ်ဆင်ရေးအတွက် ၇ စီးနဲ့ အယောင်ပြပျံသန်းမှု မစ်ရှင်အတွက် နောက်ထပ် B-2 တချို့ကိုအသုံးပြုခဲ့တယ်လို့ သိရပါတယ်။ Midinight Hammer စစ်ဆင်ရေးရဲ့ ဦးစားပေး ပစ်မှတ်ဟာ တောင်တစ်လုံးအောက်မှာနက်နက် ရှိုင်းရှိုင်း တူးဖော် တည်ဆောက်ထားတဲ့ ဖော့ဒို စခန်းဖြစ်ပါတယ်။ အဲဒီ စခန်းကို B-2 ၆ စီးက တစ်လုံးကို ပေါင် ၃၀၀၀၀ အလေးချိန်ရှိတဲ့ ဧရာမ ဘန်ကာဖျက်ဗုံး ၂ လုံးစီ၊ စုစုပေါင်း ၁၂ လုံး ကြဲချခဲ့တာပါ။
Spiritလို့ နာမည်ပြောင် ခေါ်ဝေါ်လေ့ရှိတဲ့ B-2 ဗုံးကြဲလေယာဉ်ကြီး ၇ စီးဟာ အမေရိကန် စံတော်ချိန်အရ ဇွန်လ ၂၁ ရက် မနက်ပိုင်းမှာ မဇ္ဇူရီပြည်နယ် အခြေစိုက် စခန်းကနေ အီရန်နိုင်ငံဆီ စတင် ပျံသန်း ထွက်ခွာခဲ့ကြပါတယ်။ ၁၈ နာရီကြာ ခရီးစဉ် အတောအတွင်း လမ်းခုလတ်မှာ B-2တွေကို လေထဲမှာတင် ပျံသန်းရင်း ဆီဖြည့်တာတွေလည်း လုပ်ခဲ့ရပါတယ်။ ဗုံးကြဲပြီးတဲ့နောက် ဇွန် ၂၂ ရက်မှာ မှာ မဇ္ဇူရီပြည်နယ် ၊Whiteman Air Force Base ကို ဇွန် ၂၂ ရက်မှာပြန်ရောက်ခဲ့တာဖြစ်ပါတယ် ။
Hits: 0