အရှေ့တောင်အာရှ ဒေသတွင်း နိုင်ငံတွေမှာ ရေကြီးမှု၊ မြေပြိုမှုတွေကြောင့် သေဆုံးသူ ၃၀၀ ကျော်ထိ ရှိလာကြောင်း သိရပါတယ်။ အဆက်မပြတ် သည်းသည်းထန်ထန် မိုးရွာသွန်းမှုတွေ၊ မုန်တိုင်းဆန်တဲ့ ရာသီဥတု ကြုံတွေ့ရတာတွေရဲ့ နောက်ဆက်တွဲ သဘာဝ ဘေးအန္တရာယ်တွေကြောင့် ထိုင်း၊ မလေးရှားနဲ့ အင်ဒိုနီးရှားတို့မှာ လူရာနဲ့ချီ သေဆုံးခဲ့ကြတာ ဖြစ်ပါတယ်။
မုတ်သုံမိုး သည်းသည်းမည်းမည်း ရွာသွန်းလေ့ရှိတဲ့ ရာသီနဲ့ တိုက်ဆိုင်ပြီး မုန်တိုင်းရပ်ဝန်း တစ်ခုကလည်း ဖွဲ့စည်းဖြစ်ပေါ်နေတာကြောင့် အဲဒီ ၃ နိုင်ငံမှာ ပြင်းထန်တဲ့ ရာသီဥတု အခြေအနေတွေ ကြုံလာရတာ ဖြစ်ပါတယ်။ မလေးရှား၊ ထိုင်းနဲ့ အင်ဒိုနီးရှားတို့က ရေကြီးတဲ့ နေရာအများအပြားမှာ ဒေသခံတွေဟာ အိမ်ခေါင်မိုးတွေပေါ်တက်ပြီး ရေဘေးရှောင်ရတဲ့ထိ အခြေအနေဆိုးတွေ ကြုံခဲ့ရပါတယ်။
အင်ဒိုနီးရှားမှာတော့ အာဏာပိုင်တွေဟာ ဆူမားတြား ကျွန်းပေါ်က အဆိုးဆုံး ရေဘေးသင့်တဲ့ ဧရိယာတွေဆီ ရောက်ရှိနိုင်ဖို့ ရုန်းကန်နေရဆဲလို့ ပြောပါတယ်။ ဆူမားတြားမှာ နိုဝင်ဘာ ၂၉ ရက် မနက်ပိုင်းထိ အခြေအနေအရ ရေဘေးကြောင့် လူ ၁၇၄ ဦးထက်မနည်း သေဆုံးပြီး ၈၀ ဝန်းကျင် ပျောက်ဆုံးနေပါတယ်။
အရှေ့တောင်အာရှ ဒေသတွင်းမှာ နောက်ထပ် ဆိုးဆိုးရွားရွား ရေဘေးသင့်နေခဲ့တဲ့ နေရာတစ်ခုကတော့ ထိုင်းနိုင်ငံ တောင်ပိုင်းက ဟတ်ယိုင်မှာ ဖြစ်ပါတယ်။ ဟတ်ယိုင် အပါအဝင် ထိုင်းတောင်ပိုင်း ဒေသတချို့မှာ ရေဘေးကြောင့် လူ ၁၄၅ ဦးထက်မနည်း အသက်ဆုံးရှုံးခဲ့ကြောင်း ထုတ်ပြန်ထားပါတယ်။ ကယ်ဆယ်ရေးတွေဟာ လှေတွေကို အသုံးပြုပြီး ရေဘေးသင့် မြို့ရွာတွေထဲမှာ ပိတ်မိနေတဲ့ ဒေသခံတွေကို ကယ်ဆယ် ရွှေ့ပြောင်းပေးခဲ့ရပါတယ်။ မလေးရှားမှာတော့ ရေကြီးမှုတွေကြောင့် လူ ၂ ဦး သေဆုံးခဲ့ပြီး နိုင်ငံမြောက်ပိုင်းက ပါလစ်ပြည်နယ်ရဲ့ ဒေသအများအပြား ရေမြုပ်ခဲ့တယ်လို့ သိရပါတယ်။
အရှေ့တောင်အာရှ ဒေသရဲ့ မုတ်သုံရာသီဟာ ပုံမှန်ဆိုရင် ဇွန်လကနေ စက်တင်ဘာလထိ ကျရောက်လေ့ရှိပြီး မိုးသည်းထန်တာ၊ မြေပြိုတာ၊ ရေကြီးတာတွေ ဖြစ်ပွားလေ့ ရှိပါတယ်။ ဒီနှစ်မှာတော့ မုတ်သုံရာသီဟာ မုန်တိုင်းတွေ ဖြစ်ပေါ်မှုနဲ့ ဆက်စပ်ပြီး သာမန်ထက် ပိုမို ရှည်ကြာနေပါတယ်။ ပညာရှင်တွေကတော့ ကမ္ဘာ့ရာသီဥတု ပြောင်းလဲမှု ဖြစ်စဉ်တွေက မုန်တိုင်းတွေ ပေါ် ပေါက်လာမှု ဖြစ်ရိုးဖြစ်စဉ်တွေကနေ အံချော်လာစေတယ်လို့ ပြောကြားခဲ့ပါတယ်။
ကမ္ဘာကြီး ပိုမိုပူနွေးလာခြင်းဟာ အစိုဓာတ်ကို ပိုမို ကြာရှည် ထိန်းသိမ်းထားသလို ဖြစ်လာပြီး ပိုမိုသည်းထန်တဲ့ မိုးရွာသွန်းမှုတွေ ဖြစ်စေသလို ပိုပူနွေးလာတဲ့ သမုဒ္ဒရာ ရေပြင်ကလည်း မုန်တိုင်းစုဖွဲ့မှုတွေကို ပိုအားကောင်းလာအောင် ပံ့ပိုးပေးကြောင်း ကမ္ဘာ့ရာသီဥတုဆိုင်ရာ သိပ္ပံပညာရှင်တွေက ရှင်းပြထားပါတယ်။
Hits: 0