မြန်မာ−အိန္ဒိယနယ်စပ် စစ်ကိုင်းတိုင်း တမူးခရိုင်အတွင်းရှိ ခါမ်းပါတ်မြို့ကို ၄ ရက်တာ ထိုးစစ်ဆင်ခဲ့ပြီးနောက် ယနေ့ (နိုဝင်ဘာ ၇ ရက်) တွင် သိမ်းပိုက်လိုက်ပြီဟု ကာကွယ်ရေးတပ်ဖွဲ့များက ပြောသည်။ KIA စစ်ဦးစီးချုပ် ဗိုလ်ချုပ်ခေါင်လွန်း စစ်ဒေသမှူးအဖြစ် တာဝန်ယူထားသည့် အမှတ်(၁) စစ်ဒေသ၊ တမူးခရိုင် ကွပ်ကဲမှုအစီအစဉ်ဖြင့် ကချင်လွတ်လပ်ရေးတပ်မတော် (KIA)၊ ပြည်သူ့ကာကွယ်ရေးတပ်မတော် (PDF)၊ ပြည်သူ့ကာကွယ်ရေးအဖွဲ့ (ပကဖ)နှင့်တော်လှန်ရေးအဖွဲ့များက ခမ်းပတ်မြို့ကို သိမ်းပိုက်နိုင်ခဲ့ခြင်းဖြစ်သည်ဟု အသိပေးသည်။
တော်လှန်ရေးအဖွဲ့များအနက် တမူးခရိုင် တပ်ရင်း (၂) ၊ စစ်ဒေသအထူး တပ်ရင်း (၂) ၊ အမှတ် ၁ စစ်ဒေသ လက်နက်ကြီး အဖွဲ့ ၊ ရှေ့တန်းကွပ်ကဲရေးအဖွဲ့ ၊ CNDF ၊ TDA ၊ RCDF နှင့် KNA-Burma တို့ ပူးပေါင်းပါဝင်ခဲ့ကြောင်း ဖော်ပြသည်။ကလေး-တမူး အာရှအဝေးပြေးလမ်းပေါ်ရှိ ခမ်းပတ်မြို့ကို နိုဝင်ဘာလ (၃) ရက်မှ စတင်၍ ဝိုင်းပတ်တိုက်ခိုက်ခဲ့ရာ ယနေ့ နံနက်တွင် နယ်မြေလုံခြုံရေးအတွက် ရှင်းလင်းမှုများ ဆောင်ရွက်လျက် အပြီးသတ် သိမ်းယူနိုင်ခဲ့ခြင်း ဖြစ်သည်ဟုဆိုသည်။
အမှတ် (၁) စစ်ဒေသသည် C3C ၏ အစီအစဉ်ဖြင့် KIA စစ်ဦးစီးချုပ်က စစ်ဒေသမှူးအဖြစ်လည်းကောင်း၊ KIA အရာရှိများက ခရိုင်ကွပ်ကဲရေးမှုးများ အဖြစ်လည်းကောင်း တာဝန်ယူလျက် PDF တပ်ရင်းများနှင့် ပကဖအဖွဲ့များကို လေ့ကျင့်ပျိုးထောင်ကာ အနီးကပ်ကွပ်ကဲမှု ရယူထားသော စစ်ဒေသဖြစ်သည်ဟုလည်း ရှင်းလင်း အသိပေးထားသည်။ တိုက်ပွဲနှင့်ပတ်သတ်သော အသေးစိတ်အချက်အလက်များကို ဆက်လက်ထုတ်ပြန်သွားမည်ဟုလည်း ဖော်ပြသည်။
နိုဝင်ဘာ ၃ရက်တွင် KIA ဦးဆောင်သည့် စစ်ကြောင်းက စစ်ကိုင်းတိုင်းရှိ နေရာအများအပြားကို တစ်ပြိုင်တည်း ထိုးစစ်ဆင်ပြီး စစ်ကောင်စီတပ်စခန်း၊ ရဲစခန်းများကိုသိမ်းပိုက်ခဲ့ရာ ကောလင်းမြို့ကို ယမန်နေ့က သိမ်းပိုက်နိုင်ခဲ့ပြီး ခမ်းပတ်မြို့ကို ယနေ့ ထပ်မံ သိမ်းပိုက်နိုင်ခြင်းဖြစ်သည်။ ၂၀၁၄ ခုနှစ် သန်းခေါင်စာရင်း အစီရင်ခံစာတွင် ခါမ်းပါတ်မြို့ကို မြို့နယ်ခွဲဟု ဖော်ပြထားပြီး လူဦးရေ ၃၈,၀၀၀ ကျော် နေထိုင်လျက်ရှိသည်။ ရပ်ကွက် ၅ ခု၊ ကျေးရွာအုပ်စု ၈ ခုဖြင့် ဖွဲ့စည်းထားသည့် မြို့နယ်ခွဲတစ်ခု ဖြစ်သည်။
ဧရိယာ စတုရန်းမိုင် ၁၂ မိုင် ကျယ်ဝန်းသည့် ခါမ်းပါတ်မြို့တွင် အခြေခံပညာအထက်တန်းကျောင်း အလယ်တန်းကျောင်း၊ မူလတန်းကျောင်း ၁ ကျောင်းစီနှင့် ခုတင် ၂၅ ခုဆံ့ ပြည်သူ့ဆေးရုံရှိပြီး ကချင်လူမျိုး အများစုနေထိုင်သည်သည့် မြို့ဖြစ်သည်ဟု ၂၀၁၇ ခုနှစ် တမူးမြို့နယ်အထွေထွေအုပ်ချုပ်ရေးဦးစီးဌာန၏ စာရင်းတွင် ဖော်ပြထားသည်။ မဟာမိတ်ညီနောင် ၃ ဖွဲ့က ၁၀၁၇ စစ်ဆင်ရေးအမည်ဖြင့် အောက်တိုဘာ ၂၇ တွင် စတင် ထိုးစစ်ဆင်နေရာ အာဏာသိမ်းစစ်ကောင်စီ၏ စခန်းပေါင်း ၁၀၀ ကျော်ကို သိမ်းပိုက်ရရှိထားပြီး၊ ဆက်လက်၍လည်း ထိုးစစ်ဆင်တိုက်ခိုက်နေသည်။
Hits: 0