Russia leh Ukraine in gal kido /kikapna pan kilemtheihna ding vai a (2) veina maitang kimuhna / kikupna pen Turkey gamah nei thei uh himah leh kilamdanna / thu hoih lam tawh mahial zolo in Meeting hial bawl uh ci hi. Ahi zongin a galmatte uh kikhektuah / khah khia tuak dingin thukimna nei thei uh hi. Ukraine lam pan thukuppihte in bel kikapna khawlsan ding vai a genna uh Russia lamte thukimzo nailo / nial uh ci hi. Tua pen USA leh Europe gam bel pawlte tawh Ukriane (Kyiv) lamte in a deihna bulpi uh ahi hi. Ahi zongin langnih kithukimna khat ahih leh galmat 12000 tuak khahkhia khawm dingin thukimna nei uh ci hi.
Russia lamte in ahih leh galmai nawkna mun pawl khat ni 2, 3 kikap nawnloh phot dingin pulakna nei uh himah leh thu leh la kiciantak genkhiatna nei nailo hi. Turkey gam ii khuapi Istanbul khuapi ah June 1, 2025 ni akinei langnih Kamkupna pen nai kal (2 hours) sung sawt a, langnih tuak pan kum 25 nuai siah galkap a liamte kikhektuah ding thukimna nei thei uh hi.
Hih kamkupna tungtang ah galmat kikhek ding vai pen kikup masak dingin a kilamen hetlo thu ahi hi. Langnih deihna leh lunggulhna ahih leh abeisa 2022 February kha sung a Russia in Ukraine tungah thagum / zawhthawh thu tawh a gam buluhsak akipan galkidona a piang pen bangci danin kilemkikna om theih ding cih tawh kisai pen ngaihsutna kilumlet / kilamdang mahmah hi. Russia in abeisa 2014 kum a zawhthawh thu tawh a gamlaksakna mun ahi Crimean peninsula leitaw lam 20% kim teng pen amau khut sung tung ta hi.
Kam kupna aman khit thu omzia tawh kisai in Ukraine Defense Minister Rustem Umerov in bel lei lam, tuilam leh van lam pan kikap/ kidonate ni 30 sungin ciangtan omlo thakhat thu in khawlsanna dingin thumna leh pulakna nei hi. Russia leh Ukraine kikal kido/ kikapnate khawlsanna ding thubulpite pen gam mipite theihsakna leh zaksakna nei nailo uh hi.
Hits: 7