Thai kumpi in SAC galkapte’ bawl 2025 Kiteelpi pen thukimpihlo / thusimlo bek tham loin, tua kiteelna tungtawn in a zote kahtoh dingte zong muanna neilo/ thupisim saklo uh hi. Ahi zongin Thailand – Myanmar gamnih kikal kizopna leh nasepkhop zia ding tehkakna ah thahatna neih ding thu pulakkhia hi.
Tua mah bangin ASEAN makaipi panmun a len laitak ahi Phillippines in SAC galkapte’ makaih thumanlo kiteelna a san zawh lohna thu kician takin a pulak khiatna tawh kisai ASEAN gam sungah kitelkhialhna leh thukitukalhna tampi om hi. Hih bang a SACte’ kalsuanzia leh gamtatna tawh kisai in mihingte’ ngah ding hamphatna / thumanna (Human Rights) kipawlnate in lunghimawhna lianpi nei uh hi.
Thai kumpi tehkak kalsuanna in galkap thuneihna a ngeina bangin kalsuan / nasem sak ding, gam vai nasepna hangin mat leh hen thuak (thong kia)te a kikhahkhiatna ding le ngongtat gamtatna abei sakna ding, gam tuamtuam tawh sum lei sumzuakna lam kiam ding cihte gencianna nei uh hi. Thai kumpi kalsuanzia thak khat ahih leh Ukna buluh (SAC) galkapte’ gamtatzia / thuneihna pen thudik / thuman hi ci-in, thukimpih a hih loh hangin gamgi kizawng hihna tawh gamgi bit nading, kihuh/ kipanpihtuah nading le tualsung daihna om theihna ding kizopna lam lampi / kongpi tuamtuamte ciangtan nei-in honkhiatna ding cih thu ahi hi.
Myanmar tawh kilometre 2,400 val gamgi dung a om dongtuak galtaite le thumanlo nasemte awlmawh loh sangin, hih bangin kizopna neih ding a hoih zawkna thu, Thai thunei lamte in a muhna gen hi. Myanmar gam buaina pen ASEAN gam vekpi kithukimna tungtawn in SAC bawl thumanlo kiteelna pen Democracy lam kikna ding sangin, ukna a kipletzawh semsem nading ngimna hi ci-in mukhia uh hi. Thai kumpi kalsuanzia pen naupang kimawlna tawh kibang a, ASEAN ii dinkipna tungah bang ci bangin kisuktuahna / lutuahna om ding hiam, cih tualsung thumuhna lam siamte in lim takin encik uh, ci hi.
Hits: 2