ချင်းပြည်နယ်၊ ဖလမ်းမြို့နယ် ဆွမ်ဟရန်ကျေးရွာတိုက်ပွဲတွင် စစ်ကော်မရှင်တပ်သား ၄ ဦး သေဆုံးခဲ့ပြီးနောက်၊ စစ်ကော်မရှင်က အနီးနားရှိ တိုက်ပွဲဖြစ်ပွားခြင်းမရှိသော ငန်ဇောလ် (Nganzawl) ကျေးရွာကို လေကြောင်းမှ ဗုံးကြဲတိုက်ခိုက်ခဲ့သဖြင့် အသက် ၇၀ အရွယ် အဘွားအိုတစ်ဦး သေဆုံးသွားကြောင်း သိရသည်။
ဇန်နဝါရီလ ၃၁ ရက် နံနက်ပိုင်းတွင် ဖလမ်းမြို့အရှေ့ဘက်ခြမ်း ဆွမ်ဟရန် (Sumhrang) ကျေးရွာ၌ အခြေစိုက်ထားသည့် စစ်ကော်မရှင်စစ်ကြောင်းကို ချင်းတော်လှန်ရေးပူးပေါင်းတပ်များက ထိုးစစ်ဆင်တိုက်ခိုက်ခဲ့ရာ စစ်ကော်မရှင်ဘက်မှ ၄ ဦး သေဆုံးပြီး ၃ ဦး ဒဏ်ရာရရှိခဲ့သည်။ အဆိုပါတိုက်ပွဲဖြစ်ပွားပြီးနောက် နံနက် ၁၁ နာရီခွဲခန့်တွင် စစ်ကော်မရှင်က တိုက်ပွဲဖြစ်ပွားခြင်းမရှိသည့် ငန်ဇောလ်ကျေးရွာအတွင်းသို့ ဂျက်ဖိုက်တာဖြင့် ဗုံး ၄ ကြိမ် ကြဲချခဲ့ခြင်းဖြစ်သည်။
ယင်းတိုက်ခိုက်မှုကြောင့် အသက် ၇၀ အရွယ် ဒေသခံအဘွားအိုတစ်ဦး သေဆုံးခဲ့ပြီး အရပ်သားနေအိမ် ၁၀ လုံးခန့် ထိခိုက်ပျက်စီးသွားခဲ့သည်။ “ရွာမှာ တိုက်ပွဲမရှိဘဲနဲ့ လေယာဉ်နဲ့ လာကြဲတာ။ အဘွားအိုတစ်ဦး ဆုံးသွားပြီး အိမ်တွေလည်း တော်တော်ပျက်စီးကုန်တယ်” ဟု ဒေသခံတစ်ဦးက ပြောသည်။
ဇန်နဝါရီ ၃၀ ရက် ညနေပိုင်းကလည်း ဖလမ်းမြို့နယ် ဆိမ်ဒီဟိုင် (Sim Dihai) ကျေးရွာကို စစ်ကော်မရှင်က အကြောင်းမဲ့ လေကြောင်းတိုက်ခိုက်ခဲ့သဖြင့် အရပ်သားနေအိမ် ၃ လုံးခန့် မီးလောင်ပျက်စီးခဲ့သေးသည်။ ဖလမ်းမြို့နယ်အတွင်း စစ်ကော်မရှင်တပ်များ စစ်ရေးအရ အထိနာသည့်အခါတိုင်း အနီးနားရှိ လူနေကျေးရွာများကို ပစ်မှတ်ထားကာ လေကြောင်းမှ လက်တုံ့ပြန်တိုက်ခိုက်လေ့ရှိကြောင်း ဒေသခံသတင်းရင်းမြစ်များက ဆိုသည်။
Hits: 0