ကျင်ဒွေးမြို့သိမ်းတိုက်ပွဲ၌ ပါဝင်ခဲ့သော ချင်းတော်လှန်ရေးတပ်ဖွဲ့မှ ရဲဘော်များ ရှေ့တန်းပြန်လာစဉ် ပြည်သူလူထုက အောငိသပြေဖြင့် ကြိုဆိုခဲ့ကြသည့် မှတ်တမ်းဓာတ်ပုံများကို ချင်းကာကွယ်ရေးတပ်ဖွဲ့ ၊ မင်းတပ် (CDF-Mindat) သတင်းပြန်ကြားရေးနှင့်မှတ်တမ်းဌာနက ယနေ့(မေလ ၆ရက်) ထုတ်ပြန်သည်။
တိုက်ပွဲမှပြန်လာသည့် ရဲဘော်များအား မေလ ၅ ရက်တွင် လူထုကအောင်သပြေများ၊ပန်းများ ၊ ဖျော်ရည်များတိုက်၍ ကြိုဆိုခဲ့ကြသည်ကို မှတ်တမ်းပုံများတွင်တွေ့ရသည်။ “နွေးထွေးစွာကြိုဆိုပေးကြသည့်ပြည်သူများအား ချင်းကာကွယ်ရေးတပ်ဖွဲ့(မင်းတပ်)မှအထူးပင်ကျေးဇူးတင်ဂုဏ်ပြုအပ်ပါပါသည်” ဟု (CDF-Mindat) သတင်းပြန်ကြားရေးနှင့်မှတ်တမ်းဌာနက ထုတ်ပြန်သည်။
ချင်းပြည်နယ်၊ ကန်ပက်လက်မြို့နယ်၊ ကျင်ဒွေးမြို့မှ စစ်ကောင်စီစခန်းကို ၂၀၂၃ ဒီဇင်ဘာလ ၂၃ ရက်မှာ CDF ကန်ပက်လက် ၊ PDF ဂန့်ဂေါခရိုင်တပ်ရင်း ၊မင်းဘူးခရိုင်တပ်ရင်းတွေစတဲ့ တော်လှန်ရေးတပ်တွေကစတင်တိုက်ခိုက်ခဲ့သည်။ ၂၀၂၄ မတ်လ ၇ ရက်တွင် ချင်းညီနောင်စစ်ဆင်ရေး အဖြစ် ချင်းညီနောင်တပ်ဖွဲ့များ ၊အာရက္ခတပ်တော် နှင့် တော်လှန်ရေး ပူးပေါင်းတပ်များက ထိုးစစ်ကိုအရှိန်မြှင့် တိုက်ခိုက်ခဲ့သည်။ ဧပြီလ ၂၉ရက်တွင် မြို့အားသိမ်းပိုက်ရရှိကြောင်း ချင်းညီနောင်အဖွဲ့က မေလ၁ရက်တွင် သတင်းထုတ်ပြန်ခဲ့သည်။
တိုက်ပွဲကာလအတွင်း စစ်ကောင်စီက လေကြောင်းမှ အင်အားအများအပြားပို့ခဲ့သလို လေကြောင်းတိုက်ခိုက်မှုများလည်းပြုလုပ်ခဲ့သည်။ စစ်ကောင်စီဘက်မှသေဆုံးမှုများသလို အရှင်ဖမ်းမိထားသူ ၂၀ ကျော်ရှိခဲ့ကြောင်းထုတ်ပြန်ခဲ့သည်။ ထို့အပြင် စစ်ကောင်စီတပ်ဖွဲ့ဝင်လေးရာခန့်သည် စခန်းစွန့်ခွာ၍ တောအတွင်းထွက်ပြေးသွား၍ တော်လှန်ရေးတပ်များက လိုက်လံတိုက်ခိုက်ရှင်းလင်းနေကြောင်း CDF-Mindatစစ်ဒေသမှူးနိုင်းတမ် ကပြောသည်။
ကျင်ဒွေးမြို့သိမ်းတိုက်ပွဲ၌ စစ်ကိုင်းတိုင်း၊ မကွေးတိုင်းနှင့် မန္တလေးတိုင်းမှ ပြည်သူ့ကာကွယ်ရေးတပ်ဖွဲ့များ ပါဝင်တိုက်ခိုက်ခဲ့သလို အာရက္ခတပ်တော်(AA)ကလည်း ပူးပေါင်းတိုက်ခိုက်ခဲ့ကြောင်းနှင့် အားလုံးကို ကျေးဇူးအထူးတင်ရှိကြောင်းCDF-Mindatစစ်ဒေသမှူးနိုင်းတမ် က လူမှုကွန်ရက်မှတစ်ဆင့် ပြောကြားထားသည်။
“တော်လှန်ရေးအတွက်ရဲရဲဝံ့ဝံ့အသက်ပေးခဲ့ကြတဲ့ အာရက္ခသားကောင်းစစ်သည်တွေ၊ ချင်းနဲ့ဗမာစစ်သည်တော်တွေကို အလေးပြုပါတယ်။ရဲဘော်တို့ရဲ့သွေးကြွေးအတွက် ကျန်ခဲ့တဲ့သူတွေ ဆက်လက်တိုက်ပွဲ ဝင်နေကြပါတယ်”ဟု ၎င်းကပြောကြားထားသည်။
Hits: 0