Leitung mipilte in mihing pen ahon om nuamte hi (𝗛𝘂𝗺𝗮𝗻 𝗕𝗲𝗶𝗻𝗴𝘀 𝗔𝗿𝗲 𝗦𝗼𝗰𝗶𝗮𝗹 𝗔𝗻𝗶𝗺𝗮𝗹𝘀) ci uh hi. Nialna ding om loin man mahmah hi. Tua bangin i hon om nopna in Makai hong kisamsak pah lian hi. Innkuan sung, khuasung tuisung, behsung phungsung, gamsung leh leitung buppi dongin makai i kisam hi. Upna tawh a kiphut Pawlpi (𝗙𝗮𝗶𝘁𝗵 𝗖𝗼𝗺𝗺𝘂𝗻𝗶𝘁𝗶𝗲𝘀) te zongah makai i kisam sem hi. Tua manin i pu i pate in, “𝘚𝘪𝘮𝘣𝘦𝘯𝘨 𝘻𝘰𝘯𝘨 𝘬𝘪𝘮 𝘤𝘪𝘵𝘤𝘪𝘢𝘵 𝘵𝘢𝘯𝘨𝘻𝘢𝘯𝘨 𝘬𝘪𝘯𝘦𝘪𝘩” na ciziau uh hi. A cihnopna uh thuk in muibun pha mahmah hi.
Atung a i gensa mihon kipawlna khempeuh a nopcitna dingin, a khantohna ding leh a kilem diamdiam theihna dingin Makaite thupi pen hi, cih bel akinial theilo thu ahi hi. Tua ahih manin hih lai ah 𝗠𝗔𝗞𝗔𝗜𝗧𝗘’ pianzia i gen dinga, tua zongah upna bulphuh kipawlna Makaite hel nai lo photin, kipawlna dang Makaite thu i masak ding hi. I telcian theihna dingin gam Makai (𝘗𝘰𝘭𝘪𝘵𝘪𝘤𝘢𝘭 𝘓𝘦𝘢𝘥𝘦𝘳𝘴) te leh mihon Makaite i bulphuh phot ding hi.
𝗠𝗔𝗞𝗔𝗜𝗧𝗘 𝗜 𝗖𝗜𝗛 𝗖𝗜𝗔𝗡𝗚𝗜𝗡
1. Makai hih nopna lungsim, lungput (motivation) kiciantak leh thuk tak nei-in, nang leh nang kipholaak kizuaktawm kul lo-in makai gina khat na suah theihna dingin na lungsim kisekin kisin tawmtawm in Makai hoih khat hih ding lunggulh ngiat ding kisam hi. Nang lunggulh gige peuh lecin amah’n nang hong zuan lel ding hi.
2. Makai gina khat suahna dingin man (cost) piak kul pha mahmah hi cih phawk in. Na pau nop bangin pheng paulo a, na ki-iipna leh makaite’ sep ding a kilawm nasep khat nasepna pen makai hoih khat suah ding na lunggulhna leh man (cost) na piakna hipah hi. Nang leh nang “makai ut ing,” ci-in kigenkhia takei lecin mi in hong thei lua hi.
3. Na makaih ding mihonpi nautaangte, taangpi taangta te thuakna, thumna tauna aw zak sawm in la, itna leh veina (𝘩𝘦𝘢𝘳 𝘵𝘩𝘦 𝘤𝘳𝘪𝘦𝘴 𝘰𝘧 𝘵𝘩𝘦 𝘱𝘦𝘰𝘱𝘭𝘦 𝘢𝘯𝘥 𝘦𝘮𝘱𝘢𝘵𝘩𝘪𝘻𝘦 𝘵𝘩𝘦𝘮) nei in.
4. Na makaih ding mipite koici nuntak sak nuam a, koilai mun tunpih nuam na hiam? cih ngimna (𝗴𝗼𝗮𝗹) kician / siang sinsen in theih sawm in! Tua banah na makaih ding nautaangte zong telsak in. Kimuh khawmna nei den in.
5. Laisim hahkat in. Na makaih nading vai tawh kisai, Nainganzi (politics) akipan Sumbawlna (economic), Company khat peuh ah mi hong hawmthawh het loh dingin laisim in la, kanbeh hamtang in.
6.Mi tawh kilholh siam ding thupi ngaihsut in!
Tua in na makaihna hong kilamdangsak ding hi. Mi’ deihna panpih thei in la, mite in zong nang hong panpih theih nadingin leptuah (negotiate) siam in. Hih thu na siam kei leh Democracy hun ah daupai-in na khuasuak ngei kei ding hi.
7. Thuman (honest), citak-in thuman phot phot in. Na kisik kei ding hi. Tua in mihing manphatna taktak ahi hi.
8. Vaang (power) leh minthanna (porpularity) deih lua in hong kimuh khak ding peuhmah ut ke’n la, kidawm in. Nang om siam peuh lecin tuate in nang kiang hong zuan zaw ding hi.
9. Mipi’ mai a thugen (public speech) siam tum in. Nagen leh nasep kibang sak in. Tua na thumaanna(integrity) in nang vaang hong pia ding hi. Gen a tuam, sep adang hisak ngei ngei ke’n!
10. Khensat ding a om ciangin hangsan takin khensat gemgem in la, na khensatna dinpih gimgem in (taking accountability).
11. Na vaang (dignity) zahtak in la, pheng om, phengciak kha het kei in. Na vaang tang in la, vaang kemcing in.
12. Thu zawikaih (diplomacy) na siamna ding hanciam theih tawpin hanciam in. Hih thu, siam lo-in makai siamna suak zo ngei kei ding hi. Ahita zongin khauh akul leh a kisapna munah khauh gemgem lel in. “𝘔𝘢𝘬𝘢𝘪 𝘬𝘩𝘢𝘵 𝘣𝘦𝘭 𝘬𝘪𝘯𝘪𝘱 𝘥𝘦𝘯 𝘬𝘪𝘯𝘦𝘦𝘮 𝘥𝘦𝘯 𝘵𝘩𝘦𝘪 𝘭𝘰 𝘩𝘪” ci-in Singapore te Makai siam 𝗟𝗲𝗲 𝗞𝘂𝗮𝗻 𝗬𝗲𝘄 in gen in zong zui takpi pah hi (A leader cannot and should not be too soft always).
𝗠𝗔𝗞𝗔𝗜𝗛 siam i cih pen suahpih suahken (𝙗𝙤𝙧𝙣) bek hi lo-in atum leh alunggulh taktakte’ ading in sintawm theih (𝙡𝙚𝙖𝙧𝙣𝙚𝙙) luat ahi hi. Nikhat khakhat kumkhat thu tawh a kingah pah hizenzen lo-in makaih kawmkawm a sin tohtoh ding (process) ahi hi.
Midangte’ khialh khaknate pan leh ei mahmah khialh khaknate nangawn i Sia hoih pen hong suak thei hi. Leitung makai minthangte zong a lellel, a kiakia pimah ahihi. Ahi zongin ta hetlo a, kuhkal takin pang tentan, a hanciam tentan ciang bek un a gualzo Makai apiangzo pan uh ahi hi.
NANG ZONG TUABANG A A PIANG THEI LUA NA HI HI.
LUNGKIA KEI IN! (Hih Thului (Article) pen 𝑆𝑖𝑎𝑝𝑎 𝑖𝑛 abeisa September 6, 2020 𝑛𝑖-in 𝑔𝑒𝑙ℎ “𝐴 𝐷𝑎𝑢𝑝𝑎𝑖 𝑀𝑎𝑘𝑎𝑖𝑡𝑒” 𝑎ℎ𝑖 ℎ𝑖).
Hits: 13