Chin State, Thantlang khuapi huam Kuhchah khua-ah January 22, 2026 zan (11:00pm) hun pawlin papi khatin a zi le a tanu thau tawh kap lumin, a kapkhit ciangin amah le amah kikaplum leuleu cih thu kiza hi. January 22, zan laitak in Pu Ceu Hnin Thang (Kum 33) in a ihmu laitak a zi Pi Ni Cer Hnem (kum 34) le a tanu nau lai Iang Par (kum 12) gual thau tawh kaplum hi. A zi pen a lupna tung mahah sipah a, a tanu pen khuamite in zato puak pah uh himah leh a liamna nasia lua ahih manin, lam kalah a nuntakna bei ci hi.
Amau innkuan pen mimal 5 pha uh a, tua sung pan a tanu neu pen le Hakha ah sangkah a om a tanu u pen suakta uh hi. Thau a gin laitak mahin a pu le a kim a pam a omte in delh pah uh a, Innteek pa Pu Ceu Hnin Thang ii tawi Thau a suhkhiat uh hangin sutkhia pak zolo uh ahih manin, Pu Ceu Hhin Thang in a kheme tawh Thau zangno sik suk pak kha thei ahih manin, a khaguh kha zanin a phual ah si pah, ci hi. January 23 ni-in misi luanghawm teng vuina nei, ci hi.
Pu Ceu Hnin Thang pen a innkuanpih a zi a tate a it mahmah khat hi a, abeisa 2025 Christmas Lungdam bawl khit deuh akipan lungsim lam damlohna ngah ci-in khuamite in gen uh hi. Mi in hong thah sawm hi ci-in, a lungsim buai-in a lauthawng thei den ci hi.
Mi pawlkhat in zukham lua hi kha ding cih a gen om uh hi mah leh khuami khat genna-ah misi pa in zu dawn ngei het lo a, ngaihsutna khuak buaina le lungsim lam manlohna nei hizaw, ci hi. A lungsim dam lohna hangin a innkuanpihte le khuasung mite in sun tawh zanin kem le kemin a om laitak hih bangin cikziat huai leh lipkhap huai thu a piang ahi hi.
Hits: 1