Arakan Army (AA) thuneihna ahi Chin State, Paletwa Township, Shinletwa District sungah tualsung mite 300 kim bang sungpai / zavat (diarrheal disease) natna ngah uh a, tuate’ sung pan mi 30 kimte zato inn ah zatui/ zattang tawh kibawl / kikem uh cih thu ULA /AA Public Healht Department in gen hi. Tua sungpai /zavat natna pen Paletwa township tawh gamgi India gam, Longtlai District, Kaki khua, Tuitin khua, Longtin khua cihte pan kilawh danin kimukhia a, tulaitak cinate dinmun ahih leh noptuam lam manawh ci hi.
Hih sungpai /zavat natna ngahte pen kintak in bawl theihna ding kipawlna khat phuankhia uh a, Paletwa District local Organization, NGO/ CSO te tawh kipawlin zatui tawh bawlna leh natna dalna nasiatak kisem ci-in, ULA / AA Public Health Department in genbeh hi.
Tua banah Paletwa District tawh akizom munte ah natna dalna zatui, zatangte piakna leh natna tawh kisai thusin sakna (Awarness) nasepnate limtak kinei-in, natna akilawhbeh lohna ding dinmun dongah nasiatak hanciamna kinei ci hi.
November 4, 2025 ni akipan natna dalna tawh kisai nasiatak kisemkhia a, tuni ciangciang natna kilawhna 5% (five percent) ah kiasuk ta cih thu ULA /AA Public Health Department in gen uh hi. Mizoram State, Longtlai District, Kaki khua ah November kha kipat lam akipan sungpai natna kipan a, khuamite leh adiakin Kawlgam pan galtai kigawm mi 5 sikhin ta cih thu Mizoram a om News tuamtuam ah kisuaksak hi.
Hits: 12