Kachin State, Bhamaw khuapi sunga om SAC te’ phualsatna mun 5 val pen KIA leh PDF kipawl khawmte’n tukal October 8-9, 2025 sung nasiatak akikapna pan Lakhia kik zo uh cih kiza hi. “Khah Lah Yah (47) Kakin Camp teng kilakhia khin ta. Tua banah Bahmaw pan Tai 2 gamlatna (East Golf Club) a om SAC phualpi 3 zong kilakhia zo hi. SAC galkapte tampi mah si in, galvan uh zong tampi mah kingah hi. Ko, KIA pawlte mainawt to in, amau pawl nung kikzel, tua mah bangin amau pawl zong mainawt zel, ko pawl nungkik zel cih danin nasiatak kikap ngekngek himai ” ci-in KIA galmainawkte’ tungtawn in kizasawn hi.
KIO/KIA thugenpi ahi Col. Naw Bu in, ” Bahmaw khuapi ah nisim kikapna om den a, SAC lam pan galvanleng tawh bomb khiatna leh Drone tawh bomb khiatna cihte hong kap ngekngek uh hi. Lei lam zongah a galkapte in hong buluah zawhna ding nasiatak hanciam laitak uh” ci-in gen hi.
Bahmaw khuapi pen SAC pawlin luahzo zaw ta uh cih thu Social Media pawl khatah kigelh himah leh a taktak ah Sah Kah Khah (21) sung bek limdo zawh uh hi. Bahmaw khuapibup phial pen KIA leh PDFs te mahin ki-ukcipzo zaw leh kithazawh zaw veve cih thu KIA galmai nawtte’n gen uh hi.
Bahmaw khuapi lakna pen abeisa 2024 December kha akipan KIA leh PDF kipawl khawmte in nasiatak akido toto hi a, tun kha 11 val sawt khin ta hi. Hih hun sungah SAC galphual mun thupite tampitak kilakhiazo hi. Abeisa August kha sungin SAC pawlin tui lam tawnin galkap nasiatak behlap in, hong kuanto himah leh tuni dong hong zozo tuanlo uh ci in, Col. Nawbu in gen hi.
Hits: 1