Thai-Myanmar gamgi Myawaddy khuapi leitaw lam a om Bledo khuaneu ah phualsat Ukna buluh (SAC) te’ galphualpi mun 3 pen Karen National Liberation Army (KNLA), Karen National Defense Organization (KNDO) leh PDF kipawl khawmte in zanni May 23, 2025 ni-in buluh in Camp buppi lakhiazo ta uh hi. Tua Camp lakna ah SAC galkapte 20 si-in, 30 val hingmat uh a, galvan nam kim a lompi in ngahkhia uh cih thu KNLA galkap Ko Ye Min in genkhia hi.
SAC pawlte’ galphual Bledo khuaneu Camp leh Bledo khua Phungzi sang mualtung a SAC galphual banah Khua khung a galphual khat tawh kigawm vekpi galphual 3 lakhia mangzo cih Ko Ye Min in gen hi. “Thangah huai lua mai! Galvan cileng lah tam lua himai! SAC galkapte’ luanghawmte bel mei tawh haltum khin ta. Galmat 30 valte zong kepna ding mun kipuakkhin pah suak hi! KNLA pan Captain Dabaw in a genna ah na taimang nop uh leh taimang un! Na tainop kei uh leh lah a tawp dong duallo ding hi ung” a cihna thu Ko Ye Min in gen hi.
Ahi zongin lungnop hetlohna khatah bel SACte’ Camp lakna ah KNLA leh PDF lamte 3 in hong nusia cih thu Ko Ye Min in genkhia hi. Karen National Liberation Army (KNLA), Karen National Defense Organization (KNDO) leh PDF kipawlkhopna tawh akilakhiazo Bledo khua a om SAC Camp 3 lakna tungtang ah galvan puak apai AAC Ko Ye Min pen tuni May 24 ni-in, a phual va tung thei hi. Bledo khua a om SAC Camp 3 ah SAC galkap 100 val kikoih ahi hi.
Hih Bledo khuaneu a om SAC Camp 3 kilakna tungtawn in SAC galkap 62 Thailand lamah taikhia uh cih thu Thailand Media khat ahi Khaosod News in genkhia hi. Thailand gamah om theihna ngen uh a, a galvan puakte uh piakhia uh cih Khaosod Media in genbeh hi. SAC galkap 62 sung pan 11 te liamna ngah uh a, 4 te nasia mahmah cih kiza hi.
Hits: 5