Chin State, Tonzang township sungah CDF- Tonzang pawlin Khangnote galkap dingin zawh thawh thu tawh galkapzia siamsinna nei sak uh ahih manin, khangno hon khat bumang uh cih kiza hi. Tua khangno a tam zawte pen kum 16-35 kikalte hi uh a, SAC galkapte leh ZRA galkapte dona ding ngimna tawh galkap zia sinsak uh cih CDF- Tonzang lamte in genkhia uh ci hi.
Tua galkapzia sinsakna ah Thuang masate (1st Batch) mi 120 kim pha uh a, nitom/ hun tom thusinna nei sak uh a, tu Nipikal sungin khangno 80 kimte galkap zia siamsinna nei sak uh ci hi. ” Galkapzia siamsinna ah inn khat pan khat ta sinsak uh hi. A thuang masa (1st batch) te sinsak hun sung mahin pawl khat tai sim uh hi. Thusinna apia makaipa in a tawp dong sin hamtang ding ci ahih manin, ko zong man phet leh a kitaimang hipah hi.
Tu’n zong a thuang nihna (2nd Batch) pawl a sinsak laitak hi-in, a taimang khin zong om leuleu” ci-in khuami khatin gen hi. Galkap zia thusinna a zo khinte’ lakah CDF-Tonzang sungah a lut nuamte kilutsak dinga, a lut nuamlote amau khua ciat a cing/ akem dingin CDF-Tonzang galkap dan mahin koih ding cih kiza hi.
” Mipite a kem/ a dal ding (Security) himai ve! Ukna buluh (SAC) leh ZRA te a do/ adal ding cih min tawh Khangnote galkapzia a sinsak uh hiveh aw!. Tonzang Township sung khuaneu hausate’ thukimpihna leh khensatna tawh khua kim pan khangnote galkaozia sinsakna kinei hi. Tua banah Township Councilte’ thukimpihna tawh a sawlciat hi. Nakzaang khua leh Bungmual khua Inn kihalna vai tawh zong kidalkholhna/ galvenna ding ci-in, galkap zia sinsakna kinei ahi hi” ci-in CDF- Tonzang makaipi Pu Thang Suan Mung in gen hi.
Tu’n Tonzang Township pen Chinland Council (CC) belpawlte in abeisa May 2024 sungin SAC khut sung pan akibuluak khit banah Mipite kem leh dal nasepnate akikalsuan laitak ahi hi ci-in Pu Thang Suan Mung in genbeh hi.
Hits: 8