America gam, a om Chin biakna makaite leh Mizoram State ah kipawlna min nei Mizoram Civil Socity makaite in Indiana State, Indianapolis khuapi ah tukha July 3, 2024 ni-in tulaitak Myanmar gam Chin State sungah Chin minam sung buainate tawh kisai thukikupna nei uh cih kiza hi.
Hih holimna pen America gamah Chin Baptist pawlpi kipawlna lian khat ahi (Chin Baptist Churches of USA) ii innteel sepna tawh kinei hi a, Mizoram State pan Mizoram Baptist Church (BCM), Central Young Mizo Association (CYMA), Mizo Zirlai Pawl (MZP), Chin Baptist Association of North America (CBANA), Zomi Baptist Churches of America (ZBCA) cih kipawlna tuamtuamte pan makaite kihelthei uh ci hi.
Tua kikupna hunah tulaitak Chin State sungah i tuahkhak gal leh sa kitelkhialhna vai tawh kisai buainate pan kitelsiamna leh kilemkikna om theihna ding cih deihna tawh holimna kinei cih thu Social Media laimai tungah kikhahkhia hi. Tua banah Mizoram State pan CYMA President Pi Lalmachuana leh MZP President H. Lalthianghlima akipan Chin biakna makaite zong kihelthei bek tham loin, kikupnate zong khensatna leh suaikaihna cihte kinei theilo a, ahi zongin holimna kipatna kalmasa hi ci-in, CBCUSA in pulakkhia uh cih kiza hi.
Hih kimuhkhopna leh holimna ahChin biakna lam makaite leh Mizoram State ah kipawlna min leh thunei Mizo mipi kipawlna (Civil Society) te pan a nuai aa makaite kihelthei uh ci-in, Rev. Dr. Pau Khan Khai (President of ZBCA) in ama Facebook tungah kiciantak pulakkhia hi.
Thukikum a paikhawm Makaite:
Rev. Dr . Ceu Lian Thang – CBCUSA
Rev. Zathawngcin – CBCUSA
Pu Vanceu Uk – CBCUSA
Rev. Dr. Pau Khan Khai – ZBCA
Rev. Dr. Pau Khan Lian – ZBCA
Rev. Dr. Tun Cin Kap- ZBCA
Rev. Dr. Muana Khuptong – ZBCA
Rev. Dr. Ci Lian Kap- CBANA
Rev. Nun Uk – CBANA
Rev. Dr. Hre Mang – CBANA
Pu Lalruatkima- BCM
Pu Lal Hma Chuana- CYMA President
Pu H Lal Thiang Hlima- MZP President
Pu Chin Khan Manga – MZP GS
Hits: 3