Chin State ah mipite’ lunggulh Federal Democracy tawh kimakaih Chin State Thak phutkhiat zawhna dingin SAC khut sung pan Khuapi lakna maban zoptoh suaksuak dingin The Interim Chin National Consultative Council (ICNCC)in January 1, 2025 kumthak thupha puakna laipi sungah pulakkhia hi.
2025 kum pen Chin state mipi khempeuh ii gualzawh kum ahih theihna ding nakpitak hanciam dingin genkhia hi. Khuapi lakna ding a gen hangin, a tawsawn kipawlna minte kiciantak genkhiatna nei lo hi. Chin State ah khuapi (town) 9 omin, tuate’ sungah khuapi 5 te Chin Brotherhood leh Arakan Army (AA)te kipawlin a lakkhiat ahi hi.
Chin state leitaw lam a om Paletwa township pen adiak in AA te’ makaihna tawh kilakhia hi a, Mindat township, Matupi township leh Kanpalet township teng Chin Brotherhood pawlin lakhia uh hi. Chin state leilu lam a om Tonzang khuapi bel Chinland Council (CC) pawlin lakhia uh hi.
Hih akilakhiasa khuapite leh khuapi huam (township) te pen khuapi kepna, zunna leh puahtohna ding cihte pen mipite’ bitna / lungmuanna limtak om theihna ding, ki-ukna lam tawh kisai nasepnate akitodelh zawhna ding, mipite’ khuasak zia ding bulpite (human resources) ngah zawhna ding cihte kigeelsan laitak ahihna thute pulakna nei hi.
The Interim Chin National Consultative Council (ICNCC) pen abeisa 2020 kiteelpi ah gualzawhna ngah /teel cing Chin State Representatives MPte, CNF, Chin political party te, Kumpi ahilo kipawlna (NGOs) tuamtuam kipawlin abeisa 2021 April 13 ni-in kiphutkhia hi in, 2023 kum sungin CNF te ICNCC pan paikhia / khawl ta uh hi.
Hits: 5