Chin State sungah Ukna buluh (SAM) te a lut kikna-ah bangci danin do leh hawlkhia kikzo ding cih thu tawh kisai Chin Brotherhood (CB)te in a belpawl pih uh Arakan Army (ULA /AA) makaipi General Tun Myat Naing leh makaipi hon khat tawh CB makaite Rakhine State ah nung kaal sung a hawhna ah thukikupna nasiatak nei thei uh ahihna CB thugenpi Salai Zaw Mang in genkhia hi.
Arakan Army (ULA/AA) makaipi akipan makai dangte leh Chin Brotherhod (CB) makaite’ kikupna tawh kisai-in, November 8, ni akinei CB member khat ahi PDF-Zoland te’ sumbul zonna Online tungah CB thugenpi Salai Zaw Mang in a genkhiat ahi hi.
” AA te tawh kimuhkhopna tawh kisai bel nung October kha sung hi-in, kimuthei bek tham loin, holimna zong nasiatak kineithei hi. A thupi pen ah SAM te dona dingin koici danin kipawlkik a, bangci lampi tawh kihuhtuah thei ding cih thu bulpi hipen ” ci-in CB thugenpi Salai Zaw Mang in genkhia hi.
Chin Brotherhood makaite in abeisa October kha sungin Rakhine State sungah zinkhiatna nei uh a, AA makaipi General Tun Myat Naing, ULA makaipite tawh lungkim huai takin kimuthei uh hi a, Galvai ah kibeelpawl bek tham loin, mai lamah Politics, Economic, cihte ah kilawmtatna leh sepkhopna nei khop theihna ding ciang dong kikupna nasiatak kineikhawm thei cih thu Salai Zaw Mang in genbeh hi.
Thau tawi kipawlna 6 te’ kipawlkhopna ahi, Chin Brotherhood (CB) sungah CDF- Mindat, Chin National Organization (CNO/ CNDF), Zomi Federal Union (PFD-Zoland), MRO /CDF- Matupi, CDF-Kanpalet leh Mara Tribes Council (MTC/MDF) teng kipawl khawm uh ahi hi.
Hits: 2