Chin State, Tedim District Lentang a om Chinland Council pawlte ahi; PDA (Tedim), CDM CDF-Siyin, CNA, CDFs belpawlte’ phualsatna mun pen December 11, 2024 (9: 00pm) hunin ZRA (EC) pawlin va kap dihdih uh ahih manin, nai 2 kim sung ding nasiatak langnih kikaptuahna om cih thu kiza hi.
Zankim (11:00pm) dong akikaptuahna a om khit ciangin ,ZRA pawlte a omna lam zuanin tai kik uh cih thu Chinland Council pawlte’n Chin Media pawl khat tungtawn in gen uh hi. Hih kikapna sungah ZRA lamte a liam abai banah a si zong om kha thei dingin ummawh uh ci hi. Ahi zongin Chinland Council (CC) pawlte ahih leh Pasian kepna tawh asi aliam omlo danin gen uh ci hi.
Chinland Council pawlte’n a genna ah Revolution hun sungah Thau tawi khat leh khat kuamah kinawngkai sak loh ding a lunggulh uh gen uh a, tua mah bangin ZRA (EC) te SAC tawh kipawlin Revolution ah mapangte nawngkai sak bek tham loin, a galphual (Camp) te uh va buluh sak zel uh cih thu genbeh hi.
Chinland Council lamte’n ahih leh unau khat i hih manin, khat leh khat kithupisim leh kizahtak tuah ding thupi mahmah ahihna leh India gam Mizoram State pansan ahi; Zo Reunification Organization (ZORO) pawlte’n kilemna ding hong deihsakna tawh thusuah a bawlna tungtawn in kikaploh ding thukimna a tangko uh pen ZRA te’n awlmawhlo in palsat uh hi ci-in, pulakkhia uh cih kiza hi.
Hits: 6