Chin Brotherhood (CB) pawlin Chin State khanglam a om Khuapi 3 te SAC khut sung pan lakhia zoin thuneihna nei pah uh hi. Ahi zongin CNF makaih Chinland Council (CC)te in amau pawlte’ omna Khuapite ahi; Hakha District zong lazo nailopi-in Falam District sung CNO /CNDF te’ thuneihna leh Tedim District sung PDF- Zoland te’ thuneihna munte ah lutin galmai phuan bek tham loin, Revolution nasem teng amau leh amau (Zomi leh Zomi) kitelkhialsak / kidosak mikmek uh hi.
CNF in Chin State sungah abeisa kum 30 hun (Spring Revolution) hun ma pekin, Tedim gam sung Khua pawl khatah Hausa / upate leh mipite bawlsia in thatlum uh hi. Tua bek tham loin Tedim mipite’ phallohpi in Tedim khuapi ah CNF zumkhen (Liaison Office) hong uh hi.
Tu’n Spring Revolution sung zongah CNF/ CC te pawlin Zomite’ tungah mangngilh theihloh zah ding ngottatna leh gitlohna tampi hong bawl leuleu zel uh hi. ZRO/ZRA (EC) te tawh kitelkhialhna leh kilangpanna nei bek tham loin, tampivei mah kikapna omin a si aliam zong honkhat om hi. Chin Brotherhood (CB)te’ tup leh ngim zong buaisak den uh in do uh hi.
Abeisa 2021 Spring Revolution kipat cil lai in bel Chin Brotherhood sung a kipawlkhawm teng pen CNF tawh kipawl khawm uh hi a, ahi zongin CNF /CNA in Chin State buppi amau utut in ukcipna / thuneihna theihna ding thukhun bawl bek tham loin, kipawlna min zong Chinland Council (CC) ci-in, a laih uh ciangin adang teng (Chin Brother) kici teng tawh kikhen ta uh hi.
Tulaitak Tedim District sungah Chin Brotherhood (CB) te Ukna leh thuneihna teng nawngkai / buai sak bek tham loin langdo dingin kithawi ta uh hi. Tedim gamhuam Tuithang, Tungzang khuate akipan khuano pawl khatah lutin ki inntek sak mahmah bek tham loin, khuamite lauthawng / lunghimawh sak thapai uh hi. Abeisa Spring Revolution hun ma pek a Tedim gam sungah a gamtatnate sang suksia zaw in, nasem dingin akipan litlit ta uh ahi hi.
Tua bek tham loin, abeisa nung kum sungin zong Matupi khuapi SAC galkapte hawlkhiatna / kidona ah Chin Brotherhood (CB) te’n galdona nei uh a, Chinland Council /CNF te in a nung pan kap gawpin, nawngkai sak lai uh hi. Tua Falam leh Tedim lakna ding vai zongah Ukna buluh (SAC) te huh /dopih uh ahih manin, thu hoihlo khat suak hi. Tua hi a, tulaitak zong Tedim khuapi lakna ding tawh kisai Chin Brotherhood in a hanciamsan laitak in, Chinland Council (CC)te kitulmawh in, amau min tawh laksawm mawkmawk uh hi.
Thantlang khuapi simin la zolo uh ahih manin SAC te kap zeuhzeuh uh hi. Tua bang mahin Hakha zong tuni ciang dong mah kap / sim ngamlo in, amau tawh kisai kilkel lohna Tedim gam sungah sungtum pusuak in mipite leh CB te buaisak mahmah uh hi. Hih Chinland Council (CC) te gamtatzia pen diklo lua bek tham loin, amau mipite’n zong a muanna uh tampi kiam ta ci hi.
Hih Chinland Council gamtatna khempeuh ah thunei leh tawsawn bulpi pen CNF te a hihi. Thuciam palsat, mipicinglo gamtat bangin gamta phial mang mawk uh hi. Tedim District sungah ZRO/ ZRA EC leh CB teng pen amau mun leh gam ciatah galdo in, mipite lungnuam tak omsak nuam uh hi napi, Paletwa, Kanpalet, Matupi, Mindat, Mara gam, Tedim -Tonzang gam tengah galhiamtawi te amau leh amau kidosak in a sutuah pen CC/CNF te mah ahi uh hi. Mai lam khang sawn ciangin a maizum huai tangthu abawlbawl uh a hi uh hi.
ZFU/PDF -Zoland leh CB te in amau ukna gam sungah lutlo ding leh kibuaisaklo bek tham loin, siahkaih loh dingin zaksakna nei uh hi. Azenzen in CNF / Chinland Council (CC), pawl Tedim khuapi sung hong lut peuh mah leh khat leh khat kikal ah kitelkhialhna om pah ding bek tham loin, kigalbawlna leh kikapna dong om ding cih thu pulak uh hi. CB te huh dingin ZRA EC te zong a baihsa (ready) in om ta uh ci hi.
Chin State sung Zomi nam (Tedim kampau)te’ sungah Thautawi kipawlna a thupi zawdeuhte a nuai abang ahi hi. (1) Chin Brotherhood Alliance (CB) (2) Chinland Council (CC) / CNF (3) ZRO/ ZRA EC (ZPCC) cih teng ahi hi. Hih kipawlnate pan makaite leh Zo Reunification Organization (ZORO) Hqtr. tawh Aizawl khuapi, Mizoram state, India ah tampi vei kilemna ding thu leh vaite genpihna nei khin uh hi. Chin State khanglam khuapi khemnpeuh Chinland Council (CB) pawlin ukna nei uh hi.
Tua mah bangin Chin State leilum lam tengah Hakha District, Falam District,Tedim District bek omlai hi. Falam khuapi zong CB pawlin a dolaitak uh hi a, a sawt loin zosiang ta ding uh hita hi. Chin State saklam gam uk zawhna ding ZRO/ZRA EC leh Chin Brotherhood (CB) te makaih ahi PDF Zoland ii nasepna leh mun leh phual (areas) teng pen CNF makaih Chinland Council (CC) pawlin a buaisakna pan khawl / tawp in amau area Hakha leh Thantleng lam ah ciah kik ta ding uh cih kilamen hita hi.
CNF/CNA in Falam District leh Tedim District mun leh gam nei bek hi loin, a kem acing Chin Brotherhood (CB) member ahi CNO /CNDF leh PDF Zolandte’ Political Policy zahtak sakin gamgi hong kekloh ding kisam bek tham loin, amau mun leh gam ahi; Hakha leh Thantlang gam lamah a manlang in a ciah mengmeng a, a galdo ding uh ahi SAC galkapte a do / akapzial ding uh a hihi.
Tua hi a,CC /CNF pawlte in Zo suante kikhenthang ding leh Ukcipnopna lungsim bek tawh gamta uh a, amau pawlpih ding mi pawl bawl sawmlo bek tham loin, ukcip nopna leh kiliatsaknopna lungsim a neih manun, Chin State ah minam thautawi tuamtuamte sungah kilemlohna leh kikhenthangna a piang ahi hi.
Hits: 8