COVID- 19, Natna maban a piangsak thei Lungno (Virus) thak nam khat Thailand gamah kizel kik cih thu September 30, 2025 ni-in Thailand cidamna lam vaisaite’n pulak uh hi. Thailand kumpi zatui lam pilna neite’n a genna ah tua COVID-19 a piang sak thei lungno min pen XFG kici-in, Thailand mi 33 kim tungah kimuhkhia ci hi. Tua lungno ngah a tamzawte pen Bangkok khuapi pan ci hi.
Hih XFG in COVID-19 a piang sak thei lungno (Virus) dangte zogawp in, tulaitak leitungbup zongah natna kilawh theihna a tampen hipah kici hi. Ahi zongin XFG hang a piang natna omziate pen adang natna lungnote’ sangin a lauhuai zawkna kimulo ci hi.
Thailand kumpi cidamna lam vaiaite in bel a masa pen hih XFG natna kilawh thei Lungno pen abeisa April 2025 sungin kimukhi hi a, April 1, ni akipan September 24, 2025 kikal sungah XFG natna lungno ngah cina 33 kimukhia ci hi. Tua cinate sungah mi 23 te pen Bangkok khuapi ah teng uh ci hi. Cidamna lam vaisai makaipi (The director of the Ministry of Health), Dr. Yunyot Sammabuddee in bel cinate penkhuasik, bukkhuh, gawlna, naptui, lutangnatna cih bangin om uh a, ahi zongin Zato kipuak liang cih omsam lo ci-in gen hi.
Abeisa April 1, 2025 ni akipan September 24 kikal sungah Thailand gamah hih natna vai tawh kisai sisan kisit COVID natna nei vekpi 608 pha a, XFG hang tawh natna ngah huampi etna ah 5.4 % bek om ci-in genbeh hi. Lam khat panin Thailand ah XFG pen COVID natna a piang sak thei adang Corona Virus ciangte lawhgawp zolo suak ci hi.
XFG hangin a piang Natna muhkhiatna cihte bel tua zahin a nasiat luat loh hangin, Mimal khat ciat utbang a om suk gawp huailo veve ci hi. Khut sil denin siantho sak ding leh mipi om khopnate zong a hithei zahin pelh ding cihte pen zuih huai mahmah hi. Ei leh ei ciat pilvangna tawh kikemsiam ding mah thupipen ci-in Dr. Yunyot Sammabuddee in genbeh hi.
Hih COVID- 19 leitungbup pulnatna dinmun pan tampi kiam suk ta a, a cil lam danin si ziauziau cihte om nawn samlo hi. Ahi zongin kum tam uhamte, pumpi cidamna thanem natna gil neite ading in bel lauhuai lai veve hi. Tukum abeisa July 14, 2025 ciangciang Thailand ah Covid-19 natna ngah 589342 kimukhia a, a si vekpi 239 bang kimukhia cih Thailand cidamna lam a do pawl (The Department of Disease Control)te’n pulakkhia hi.
Source: Bangkok Post
Translated & Posted: Tongsan Media Group
Hits: 9