Ukna buluh (SAC) te’n Sagaing Region, Depayin Township, Oth Theng Dwin khua a om Sang inn khat pen kido/ kikappih cih om lopi-in, tuni May 12, 2025 ni zingsang (10:00Am) hunin gal vanleng tawh lb. 500 thahat bomb va khiat uh a, sangnaupang leh Siama kigawm vekpi 22 lom sih uh a, 60 val liamna ngah cih kiza hi.
” Bomb khiat thithe uh ahih manin, sang kikhak zelna teng tawh lai sin hun zong om theilo suak.! Sang khak hun sung aitang dingin, Nipi kal dangah kisam in lai kisinsak hi. Bomb kinawh khiatna mun leh khuate a om sangnaupangte pen lau uh ahih manin, bomb khatvei akikhiat a theih khitteh sang kikhakkik pahpah hi. Bomb khiatna a tawm deuh ciangin, sang kihongkik pah suak hi. Hih sang kihonkik hun sung lian-in, bomb nasiatak hong khiat suk suak hi” ci-in Sang siama khatin genkhia hi.
Hih bomb khiatna hangin, sangnaupang 20 leh Siama 2, akigawm vekpi 22 a sih banah ko, liamna baina a thuak sangnaupangte, Sangnaupang numeite leh Siama 60 pha ding cih Free Rangers Depeyine pawlin tangko uh hi. A si sangnaupang numei leh pasalte’ sungah G2 pan mi 6, G3 pan mi 4, G5, G7, G9, G10 leh G11 cih teng pan naupangte akihel vekpi gawm 20 val si cih kiza hi.
SAC a panpihte leh SAC te’ kalsuanna munte a Sang innte pen Bomb khiat lo uh a, PDF pawlin Sang inn ah bawl tawm bomb abawlte uh kitapsuahna hang hi. Tua banah sang khak hun sungin, sangnaupangte sang akah sakna hang hi ci-in, SAC te’n a mau nasep teng a selcipna dingin mipite khembawl uh hi.
Hits: 5