Chin State, Falam khuapi lakna ah tulaitak kikapna nasia mahmah in, SAC battalion Infantry Military (268) pan makaipipa (Commander) ahi Lt. Col. Wai Lin Htun pen tukha March 17, ni-in Chin Brotherhood (CB) tawh kikapna pan sita cih thu galkap phualpi pan kiza sim hi. Chin Brotherhood pawlte in nasiatak a khakcip uh ahi SAC te’ galphual khat bek a om lai ahi, Infantry Military battalion (268) pen a khah suah lohna dingun pan tentan uh a, abeisa March 16, ni-in gal huh puak beh uh a, a zingciang March 17, ni lianin battalion Commander Lt. Col. Wai Lin Htun kikapna pan sipah ci hi.
Chin Brotherhood galphual lam pan a genna ah, ” Falam khuapi pen a sawt nai hetlo in Lt. Col. Min Khan Aung ii makaih Khah Mah Zah (391) battalion ah Vanleng tawh gal huh ding galkap 50 val deuh puak uh a, Helicopter 2 vei tusuk hi. Galkap kicing puak zolo uh cih akitheihna pen a zingciang March 17, ni-ciangin Infantry Militant (Chamber 268) battalion ah Commander Lt. Col. pen kikapna ah si hi ” cih thu kiza hi.
Asi Falam khuapi pansan Infantry Militant( Chamber 268), battalion makaipi Lt. Col. Wai Lin Htun (Kum 40) pen 46th graduate of the Military Academy zokhin sa hi-in, a teenna Mon state, Mawlamyine khuapi a inn ah sihvui hun bawlna zong kineikhin cih thu CDM lut Captain Zin Yaw in Media pawl khatah pulak hi. Falam khuapi ah SAC galphual a om sun khat bek ahi (Chamber 268) Camp sungah CB galkapte’n buluh zo ta uh a, Point tampitak lakhiazo uh ahih manin SAC te in zong Van lam pan a zalom a sim bomb tang khiat ziahziah uh cih thu kiza hi.
Tua hi in, Falam khuapi pen Chin Brotherhood Alliance pawlte in abeisa 2024 November 9, ni akipan gal mai nawk uh a, Falam khuapi sungah SAC galphualte khempeuh buluakzo uh hi. SAC galkapte’ neihsa galphual a om lai hih (Chamber-268) Camp lakhiat siang zawhna ding nasiatak kihanciamsan mahmah cih kiza hi.
Hits: 7