Chin State, Falam khuapi lak kik ding a hanciam Ukna buluh (SAC) te pen Mipi thau tawi Chinland Council (CC) leh Chin Brotherhood(CB) te kipawlin Falam khuapi kiang Khuangli leh Zawnglei khua kim tengah Febuary 3, 2026 ni zingsang tungin kikapna nasiatak nei uh a, SAC galkapte Major 1, akihel a vekpi 36 si-in, 20 val liam uh ci hi. Tua banah Thaupi, thauneu leh thautang nam tuamtuam a lompi ngah khia uh a, Mipi galkap lam pan zong 4 si-in, 7 liam cih kiza hi.
” Zanni Feb. 3, ni kikapna ah SACte Major 1, leh adang galkap kigawm vekpi 36 te’ luang mukhia thei ung! A liam abai bel 20 hi-in, tua sangin tamzaw tham lai ding hi. Tuni kikaptuahna ah CC leh CB mapang khawm thei ung. Ko, Mipi galkap lam pan zong bel galhang 4 in hong nusia in, 7 liam ung” ci-in mipi galkapte lam thunei te’n gen uh hi.
” Kikapna bel nisim bang hun cih kigentheilo om den himai. Tuni kikapna om kei sam veh ee.. cih om ngeilo himai hi. Falam khuapi lam zuan a hong pai Uital (SAC)te bel lampi om khempeuh pan kikhaktan zo ahih manin, mai lam nawt zolo banah a nung lam panin zong kikhakcip suak ahih manin, bang hun cih om loin kikaptuahna bel om den ding dinmun suak ” ci-in Chinland Council, Defense Ministry pan thugenpi Salai Nai John Kim in gen hi.
Tutung SAC te tawh kikaptuahna pan Mipi galkapte in Thaupi leh thauneu kigawm 30 val kingah khia a, thautangnam tuamtuam zong tampitak mah kingah khia ci hi. SAC pawlin gallel lua ahih manin, kikap hun sungin Vanleng tawh kapna, Drone leh Thaupi cihte nasiatak zang ziahziah cih kiza hi.
Falam khuapi lakik ding a lampi 2 pan a lut Ukna buluh (SAC)te pen Khuangli leh Sumhrang khuaneu kiangah Chin mipi galkap CC leh CB pawlin nasiatak khaktanzo uh ahih manin, SACte nungkik theilo/ mai lam lah nawt zo loin om uh hi. Abeisa January 20 ni akipan Kalaymyo pan gal huh ding 300 kim a puakto uh hilai hi. Tua banah SAC ten Khuangli khuaneu lamah E-20 Vanleng tawh annek tuidawn leh galvan puak beh uh ci hi.
Falam khuapi banah Chin State sung a khuapi dangte ahi; Mindat, kanpelet, Matupi, Tonzang, Cikha, Rih Khawdar, Lailenpi, Kyin Dwin, Makuiamnu, Naring, Rih Zua, Sur khua cihte Chin Revolutionary Joint Force ten ukcipzo ta uh a, Paletwa leh Sami khuapite nih bel Arakan Army (AA) te’n ukcip phot lai uh hi. Ukna buluh (SAC) te’n bel Hakha, Thantlang, Tedim leh Khaikam khuapi teng bek kemzo lai suak uh hi. Abeisa tawlkhat lai a Mipi galkapte’ lakkhit sa Waibula khuapi bel SAC pawlin ngah kik uh cih hiphot hi.
Hits: 0